Tlangcung hriamtlai phu phukhat nih Min Aung Hliang sin an chimmi cu a mak ngai!

SSPP Nih SAC Chairman Sinah Burma State Ser Dingin A Chim!
=========
SAC Chairman Min Aung Hliang le SSPP hruaitu hna cu September 26 ni ah tonnak an ngei I cu tonnak ahcun SSPP lei nih “Burma State” nan ser hau tiah an chim tiah theih a si.

“State cuzah a um lai timi kong kan chim lo, abiapi bik cu ramkhel siningah kan I khat ko tiah kan ti ahcun Burma mi zong nih ruah ding a si, atu ah ramkulh le ramthen hi ai khat ko ti kan chim ahcun Federal puung he ai kaihmi a si ti lo! Pyine pakhat le pakhat kha tlukruan a hau” tiin an chim tiah theih a si.

Asinain SSPP hruaitu hna nih an chimmi cung tu ahcun SAC chairman Min Aung Hlaing nih bia pakhat hmanh lehnak a tuah hna lo tiah theih a si. Tutan tonnak ah hin SSPP lawng siloin UWSP, NDAA hriamtlai phu zong an i tel i an duhmi cio an chim cio tiah theih a si.

Maraland Defense Force (MDF) Nungak Pakhat A Nunnak A Liam! Maraland Defense Force (MDF) nungak pakhat cu ralkap Training a tuah cuahmah lio ah a cung lei in thing a kiak mi nih a tlak caah vanchiat ah ruah lo tuk in a nunnak a liam tiah kan theih . A nih hi Rakhine ram AA sinah ralkap training a kai cuahmah mi a si tiah kan theih. Cu traning an tuah cuahmah lio ah cun thli fak tuk in a hran caah thingte a rak tla i, cu nih cun a tlak ruangah a nunnak a liam hi a si.

Relchap, Kalaymyo ah the ramṭhen commander le ramṭhen chief minister an phan, Sagaing ramṭhen, Kalaymyo vanlawng tual ah ni hnih chung pehtlai in SAC ralkap vanlawng a ṭum, nihin September 30 ni zong ah khuachung ah ralvengtu an chiah, ṭhatuk in ral vennak an tuah tiah Zalen nih a langhter.

Tualchung mi hna nih an chimning ahcun ramṭhen commander le ramṭhen chief minister an phan i, thaizing zinglei ah Mawlait(မော်လိုက်) ah helicopter in an kal lai tiah kan theih tiin an chim. Curuang ah Mawlait(မော်လိုက်) um SAC ralkap kuttang rianṭuantu hna cu zinglei suimilam 8:30 ah bawi donnak tuah ding a si caah timhcia tein an umter hna tiah theih a si.

SAC riahcaw phurtu motor 2 AA nih an tlaih, Rakhine ramkulh, Yataetaung(ရသေ့တောင်) pengah SAC ralkap riahcaw phurtu motor 2 cu September 29 chunhnu ah AA nih an kah hna hnu ah an lak khawh tiah tualchung mi nih an chim. Maungdaw pengah SAC ralkap hna caah riahcaw a phurtu tualchung mi hna motor 2 cu Maunghnamah(မောင်နှမ) khua pawngah AA nih an tlaih tiah theih a si.

Maungdaw khuami pakhat nih cun ” SAC ralkap hna caah riahcaw khat tein a phurtu motor 2 cu Maunghnamah(မောင်နှမ) khua pawngah AA nih an kahdoh i an tlaih, AA ralkap cu an i tel lo, cu motor chungah cun Gangyinṭan(ကညင်တန်း​) khuami driver 2 le ṭuanvo latu minung 2 tiin an dihlak minung 4 cu SAC ralkap riahcaw thilri he AA nih an tlaih hna hi a si. SAC ralkap nih cun Maungdaw chaklei um an ralkap hna caah riahcaw chanh dingah anmah tein kal ti loin, tualchung mi hna an fial hna tiah theih a si.

Monywa University of Economics ah umhmun khuarmi SAC ralkap cu mah kutser hriamngan in an kah hna i minung 2 an thi, Monywa University of Economics sianginn ah umhmun khuarmi SAC ralkap hna cu tualchung hriamtlai phufonh nih September 29, zaan suimilam 7:00 ah anmah kut ser hriamngan 40mm he kan kahdoh hna, SAC ralkap 2 an thi tiah Chindwin Attack Force in chim phuannak nawl ngeitu nih a chim.

University sianginn ah umhmun khuarmi SAC ralkap hna an cawlcangh ning cu kan ngiatthlai hna hnu ah a thli in kan doh hna tiah a chim. “An umnak hmun ah kan kahmi hriamngan a tla, cuhnu tlawmpal ah an pawngkam ah mithi phurtu motor kan hmuh” tiah Chindwin Attack Force in chim phuannak nawl ngeitu nih cun a chim.

Madaya ah mi thil a chut i a firtu misual(damiah) minthang phu pakhat cu Shwebo PDF battalion 18 nih an tlaih hna, Mandalay ramṭhen, Madaya pengchung ah mi thil a fir i a chuttu, voi tamtuk mi thil chuhnak a tuahtu minung 15 an i telnak minthang misual phu pakhat cu an thilri le hriamthil hna he Shwebo pengkomh PDF battalion 18 nih tlaih in hmalaknak an tuah hna tiah Bo Sunyee nih a chim.

Misual(damiah) phu hna cu an i putmi thilri le hriamthil hna he Seinpankone(စိန်ပန်းကုန်း) khua ah Sagaing ramṭhen, Shwebo pengkomh battalion 18 nih September 23 ah an rak luhhnawh hna i, tualchung hriamtlai phu lei hliamhma tuarnak umlo in misual(damiah) phu hruaitu Naing Win le Ngyein Zaw telh in minung 15 cu an thilri tampi he an tlaih hna tiah theih a si.

“Tlaih a tongmi misual(damiah) phu hna hi NUG sin ah report pek an si i, hmalaknak cu MOD zulhphung tein tawlrel a si lai tiah theih a si, zei tuahding an kan chimh hlan cu sakhan ah hren chung an si lai” tiah hriamtlai phu chungtel pakhat nih a chim.

Myanmar mi siangakchia 6,000 leng Mizoram ramkulh chung ah ca an cawng, India, Mizoram ramkulh hmunkip um cozah le private sianginn hna ah ca a cawngmi Myanmar rammi siangakchia 6,195 an si tiah ramkulh fimcawnnak lei vuanci nih a chim. Siangakchia 5,221 cu cozah sianginn ah an kai i, siangakchia 186 cu cozah nih a bawmhmi sianginn ah an kai, cun siangakchia 790 cu private sianginn ah an kai hna tiah theih a si.

Mizoram ramkulh chung fimcawnnak lei department in director Dr.H Lal Tlang Lian nih ” Myanmar ram lei in a rami siangakchia tamdeuh cu Chin mi an si caah holh lei ah cun harnak tamtuk a um lo, Mizo he nunphun le zulhning tibantuk an i khah leng ah Mizo holh zong an holh kho” tiah a chim. 2021-2022 cacawn kum ah Myanmar rammi siangakchia minung 68 cu tanghra exam caah cazin ah telhchih an si tiah Lalthlangliana nih a chim.

Mizoram ah sianginn a rak kaimi Myanmar rammi hna chung ah chuekhat cu ralzaam chung in an si i, cheukhat cu ramchung sianginn an kai khawhlo caah nu le pa nih Mizoram ah sianginn kaiter mi zong an um, cun cheukhat ramri khuate lei ummi ngakchia hna cu Mizoram lei ah sianginn an kai hna tiah theih a si. A tulio Mizoram university ah Institute of Chin Affairs (ICA) nih Mizoram mino hna caah Burmese language le social studies subjects diploma sianginn on ding in timhtuahnak an ngei tiah theih a si.

Loikaw vanlawng tual ah vanlawng kahnak kong he pehtlai in SAC nih cathanh a chuahmi KNPP nih lehnak a tuah, Nihin September 30, zinglei ah a cangmi Loikaw vanlawng tual ah khualtlawng mi hna phortu vanlawng kah a tonnak kong he pehtlaiin, SAC nih KNPP le PDF tuahmi a si tiah sualpuh in cathanh an chuahnak kong ah KNPP nih kan silo tiah lehnak an tuah ve.

Minung 63 a phormi ATR-72 khualtlawng phortu vanlawng cu zinglei suimilam 8:45 hrawng vanlawng tual ah a ṭumlio ah kah a tong, cu vanlawng cu Yangon-Naypyidaw-Loikaw a kalmi Myanmar National Airlines (MNA) vanlawng a si tiah SAC nih an thanhmi ah cun an langhter.

” KNPP cu kum 70 leng tiang kahdohnak ah a lutmi a si, mizapi tluk ruannak, a dikmi rianṭuannak le mah tein ṭuanvo i laknak tlamtling in a ngeimi kan si. Cucaah hramhram thilsual tuahnak cu kan tuah lai lo, atu zong ah tualchung mi hna nih zulhmi vanlawng hi kanmah nih kan kahmi a si lo, kah kan duh a si ahcun SAC ralkap umnak hmunchung kan kah khawh ko, vanlawng tual he ai naih te” tiah KNPP in chim phuannak nawl ngeitu nih BBC ah a chim.

Curuang ah a tubantuk in SAC nih phu min bunh in sualpuhnak biachim hi, tat-te umlo in sualpuhnak menmen biachim a si tiah KNPP lei nih an lehrulh hna. Myanmar National Airlines (MNA) lei in vanlawng kah a ton ruangah, Loikaw in khualtlawng dingmi nicaan hna cu rikhiah umlo in ni an thawn, cawk ciami vanlawng tickets cu khirh khawh a si tiah an thanh.

PDF chungtel minung 4 cu PDF chungtel sinak in chuah an si tiah Tamu-PDF nih thanh, Sagaing ramṭhen, Tamu hrambunh tualchung hriamtlai phu PDF battalion 3 chungtel 4 cu dingrep zulhding phung buar in anmah duh tein an chuak/an zaam caah PDF chungtel sinak in chuah an si cang tiah Tamu-PDF battalion 3 nih nihin September 30 ah cathanh an chuah.

Maung Ngyi Min Khant, Maung Hein Phyo Oo, Maung Ye Htat Paing le Maung Yan Naing Oo hna cu anmah duh tein a luancia zarhkhat luan hrawngah khan battalion in an chuak tiah theih a si.. Battalion nih phungning tein PDF chungtel sinak in chuahmi minung 4 hna kong ah, buainak pakhatkhat a can le a chuahsual a si ahcun zeihmanh ṭuanvo kan la lai lo tiah Tamu PDF battalion 3 nih cathanh an chuah.

Myanmar-India ramri Tamu hmunram ah PDF telh in tualchung hriamtlai phu dihlak phu 6 hrawng nih cawlcanghnak tuah a si i, atu le tu titluk in SAC ralkap le tualchung hriamtlai phu kar kahdohnak a chuak tiah theih a si.

Afghanistan ah private sianginn pakhat ah nunnak thap in bomb puah hnawhnak a chuak, minung 19 nunnak liam, Afghanistan khualipi Kabul private sianginn pakhat ah September 30 ah nunnak thap in bomb puahhnawhnak a chuak, cu puahkehnak ruangah cun minung 19 nak tlawmlo nunnak a liam tiah palik phu nih an chim.

Cu bomb puahhnawhnak cu Kabul nitlak lei ah a cang i, siangakchia hna exam an tuahlio ah a puak tiah ṭuanvo ngeitu hna nih an chim. Private sianginn bomb puahhnawh a ton ruangah a nunnak liammi hna hi mi tamdeuh cu nu an si tiah theih a si. Afghanistan ah a luancia kum August thla in Taliban nih nawl ngeihnak a hmuh hnu ramchung ah nu ca cawnnak sianginn tamtuk an phih khar nain, cheukhat private sianginn hna cu an on ṭhiam tiah theih a si.

Thlakhat chungah Myait thonginn in ramkhel lei thongtla 100 leng an luat, Taningtharyi ramṭhen, Myait thonginn in nihin September 30, nikhat chungah ramkhel lei thongtla minung 57 nih luatnak an hmuh caah thlakhat chungah ramkhel lei thongtla minung 100 leng nih luatnak an hmuh tiah Myait tualchung mi hna nih an chim.

September thla chungah ramkhel lei thongtla voithum luatnak an pek hna i, September 1 le 9 ah ramkhel lei thongtla minung 49 nih luatnak an rak hmuh tiah ramkhel lei thongtla hna he naihniam in ummi pakhat nih a chim. “Cu hlan ah luatnak a rak hmu cangmi hna bantuk in an chuah caan a phak cang caah an thlah hna, an ngandamnak zong a ṭha, Myait thonginn ahcun ramkhel lei thongtla mi hna rianṭuanter tibantuk zong a um lo” tiah a chim chap.

2021, February 1 in 2022, September thla dih tiang Myait pengchung ah tlaihkhih a tongmi ramkhel lei thongtla 300 hrawng an si tiah thongtla he naihniam in a ummi hna sin in theih a si. 2021, SAC ralkap nih hramhram uknak an lak thok in 2022, September 29 tiang ah tlaihkhih a tongmi dihlak hi 12,543 an si i cu chung ahcun minung 1494 hi thongtla dingin biakhiahnak tuahpiak mi an si tiah AAPP nih an thanh.

Thantlang Peng Ah Khuabawi 37 Rian Kan Khinh Khawh Cang Hna- Dr. Vung Suan Thang, Chin ramkulh SAC cozah nih Thantlang peng khuabawi minung 37 rian ka pek khawh cang hna tiah, Chin ramkulh SAC Chief Minister ah rian pek tharmi Dr. Vung Suan Thang nih Min Aung Hlaing sin ah ca a kuat tiah, theih a si.

“Thantlang khua ah sang 5 a um i cu chungah sang 3 khuabawi cu rian ka pek khawh cang hna cun, khuakomh khuabawi hmunhma 36 chungah minung 34 rian ka pek khawh cang hna, CDF hna tih ruangah khuabawi rian pekmi hna nih an rian an tuan ngam rih lo i cheukhat cu khuapi ah an i dor lio”, tiah Chin ramkulh SAC Chief Minister Dr. Vung Suan Thang nih Min Aung Hlaing sin ca a kuatmi chung ah cun a tial. Dr. Vung Suan Thang nih Thantlang peng khuabawi minung 37 rian ka pek khawh cang hna tiah a chimmi cu mizei an si theih a si rih lo. Crd-The Chin Post