Thongtla 23,314 an thlah mi hna hi thil sawh sawh a si lo. 88 lio zong ah an rak tuah mi a si. Ralrin a hau.

Ka diary: 12 February, 2021 Union (Fake) Day
=================
1. Thongtla 23,314 an thlah mi hna hi thil sawh sawh a si lo. 88 lio zong ah an rak tuah mi a si. Ralrin a hau. Ruahnak chiakha tak tak! Misual tampi an thlah hna mi cu mithar tlaih ding an timh mi an tam ca ah, cu hna chiahnak ding ah rak lonh chung bia a si ko.

2. UN Human Rights Council nih Kawlram kong ah Emergency meeting an tuah. Tulio Kawlram i nan ton mi harnak vialte an chim dih ko. Vawilei nih nan tuarnak an theih ko. Zeitindah hmual an lak lai ti tu zoh rih ko hna uh sih! Ramdang vai kan hai than ko hi ta!

3. Nizan zong ah EU nih resolution an chuah cang. An bia a fak ngai. Sihmanhsehlaw, bialawng hi cu a za ton lo. A bawmchan tu cu a si ve hrim hrim. 4. US President Joe Biden nih nizan a chim mi cu a fiang bak. Lungawtawmawk zong a um lo. A tuah ding mi aa fiang i a dot dot in timhtuahmi ngeih dawh an si.

5. Generation Z pawl an thiltuah cu ka uar tuk hna. An smart bak. Nawl an ngai fawn. Rangoon khuachung ah siseh, Mandalay le ka dang dang zong ah, chunnitlak duhlonak an langhter hnu ah an hmunthur nehnang pakhat hmanh an chia ta lo. Cun, plan tampi ngaihdawh an si. Phunkhat an hrawh khawh hna ah cun a dang phunkhat thiltuahdan an ngei rih. Cu an theih hna zong le phun dang um rih dawh a si. CDM hmual!

6. Loikaw palek 52 hna an thiltuah cu uar an um hringhran. 7. Myitkyina an demonstration cu ralkap nih an kham bak ko hna na in, an sin an hei phak tak tak tik ah cun, an kam piak ko hna khah! KIA aw aan ruang ah a si ti in zapi nih cun an zumh ko. An chim mi cu, mipi cung ah thazang in namnehnak um sual ai kun, mipi sin ah kan dir lai an ti.
8. Hriamtlai bu KNU siseh, RCSS si hna seh, mipi sin ah kan dir lai tiah fiang te in an upa nih an chim mi cu, social media ah an langhter ko.

9. Chin State khuaza kip ah duhlonak langhter mi hi thate in documentation rak tuah cio uh law a tha. Cun, hruaitu hna kha mui le zan ah cenghngia le sahngar le sihal nih an fir sualnak hna hnga lo, fimkhur a hau. Hruaitu kan nau le hna nan riantuan ning zohchunhawk tlak nan si. Kan in upat hna. 10. Mipi thazang hi a thawng tuk. Ethiopian pawl nih phung an thluk mi cu sawmpalak hna an lung aa rual ah cun chiandaih pi cu an hren khawh an ti. “When the spider webs unite, they can tie up a lion”.

Ruahawk: Hi dothlennak pi in, zeiti te khin dah va dong kho te seh law (the end-game) tiah nan hei ruah cio? Hihnu ah can nih a kan pek bantuk in ruahnak kan ngei te hna lai. Weekend ah him le lawm te in rak um cio uh mu!
Victor Biak Lian
Ottawa