Thlichia Hranlio Sittwe Khua Bawmhchahnak A Tuah Mi SAC Ralhrang 3 Tlakrawh Vampang Cimhhnawhnak In An Thi
========
Rakhine ramkulh thlichia hran lio ah Sittwe khua chung bawmhchanh nak an tuah lio ah tlakrawh vampang cimh hnawhnak in SAC ralhrang Officer pakhat telh in ralhrang 3 an thi tiah SAC thawngzamh ca pakhat nih a langh ter.
SAC thawngzamh ca chung an langhter ningah “Cyclone thlichia nih Rakhine ram cu fak ngaiin a den caah harnak tongmi an bawmhchanh lio hna ah tubantuk in tlakrawh vampang nih a cimh hnawh hna i an thi” titiang lawng an langhter i an rank le an si ning dikthlir in an langh ter hna lo.
Cun ‘thlichia ruangah Rakhine ramchung ah phungki sianginn 8, biaknak lei inn 3, sianginn 25, siizung/ sii peknak inn 9, Market 1, pehtlaihnak Tower tung 1, mipi inn 588, cozah zung 26 an rawk pin ah minung 3 an thi i 13 hliam an tuar’ tiah SAC cozah thawngzamh ca ah an langh ter chih.
Thailand Ram Thimnak Ah Move Forward Party Nih Teinak An Hmuh; Thailand ramchung thimnak cu May 14 (Sunday) ah tuah a si i mipi nih uar ngai mi Move Foward Party (MFP) nih vote 14 million hmuh in Hluttaw thutden hmunhma 150 leng an hmuh tiah kan theih.
Move Foward Party (MFP) cu phundang in Opposition Party (dohtu party) tizong ah auh mi an si. An party lutlai a si mi Pita Limjaroenrat zong Thailand ram Prime Minister a si lai zumh a si.
Thailand ram chungah Cozah a ser kho mi hna nih House of Representative (MP) 280 leng hmuh a hau mi a si nain Move Forward Party nih cozah ser kho lo hmanh seh Opposition party a si ve mi Pheu Thai Party nih thutden 140 leng a hmuh ve caah an mah he i bawm in Cozah an ser lai zumh a si.
Atu lio Thailand ram cozah tlai lio mi Thai Royal Army Chief hlun Prime Minister Gen. Prayut Chan-ocha Party pawl tu cu a tutan thimnak ah thutden 36 lawng an hmuh. A tutan teinak a hmuh tu party lutlai Pita Limjaroenrat cu Prime Minister a si ah cun US cozah nih Burma act a lungtlin pi cang mi zong pehzulh le tuanchuah dingin timhtuahnak a ngei.
Tutan ah Opposition Party pawl nih Thailand ram chung ah teinak an hmuh mi cu Thailand ram um Myanmar mipi hna zong nih an lawmh pi hna. “Tutan teinak a hmu mi Party hna nih Myanmar ram thlennak le thatnak dingah duh ningin riantuan kho hna hlah hmanh seh law, Myanmar ram nuhrin covo kong le ramri ah ralzam mi hna thutdir nak kongah tampi a kan bawmh chanh khawh lai” tiah U Aung Thu Ngeing a hmuhning a langh ter.
Thlichia Nih Zotung Ramah Inn 260 Leng A Hrawh; Chin ramkulh Matupi peng, Zotung ram Rezua peng chung khua 6 ah May 14 Cyclone thlichia nih inn 258 le Biakinn 6 a hrawh tiah khuami hna nih an chim.”Thlichia ruangah inn le lo a rawk mi cu hi nak in a tam deuh kho nain pehtlaih nak phone le Internet line a har caah kan hngal thlu rih lo” tiah khuami pakhat nih a chim.
A rawk mi hna khua cu, Hungle khua ah inn 61 le Biakinn 1, Tingsih khua inn 115 le Biakinn 3, Thawnglang khua inn 52 le Biakinn 1, Ruava (A) ah inn 11, Ruava (B)ah inn 12 le Biakinn 1, Tilet khua ah inn 5 le Rezua khua chungah inn 2 hna an si. Matupi peng Zotung ram ah khua 48 an um tiah kan theih. Credite; Lungmili Post