Thlichia Nih A Hrawhmi Matupi Peng Inn Hna Cu Anmah Tein An Remh Ṭhan Hna
===============
Chin ramkulh, Matupi peng ah Mocha thlichia nih a hrawhmi inn pawl cu nihin May 16 ah khuami hna nih anmah tein an remh ṭhan hna, tiah theih a si. Inn rawkmi tam deuh cu thli nih cungcih a hawhmi an si i, atu tiangah bawmchantu ahohmanh nih an zuanhnawh rih hna lo, tiah theih a si.
“SAC ralkap nih Matupi khua luhnak le chuahnak an khar caah thilri cawk khawh a si lo. Mi bawmchantu zong an um lo pinah thilri phor motor zong nih thil an phorhmi a um lo caah inn a rawkmi hna cu anmah le thiamning cio in an remh hna,” tiah Htisaung khua mi pakhat nih a chim. Matupi khua ah Sanbawng sang inn 10 a rawk i khuate lei ah Biakinn telh in inn 500 leng an rawk, tiah theih a si.
Matupi khuachung ah inn 10, Phaneng khua ah inn 200 leng, Waytoe khua inn 20 leng, Htisaung khua inn 30 leng, Bawiṭhia khua inn 30 leng, Zotung ram ah inn 250 leng, Rezua khua ah inn 2 le Lailenpi khua ah inn 117 cu thlichia nih a hrawh. Matupi peng ah phone le internet line hman khawh a si lo caah hmundang khuate ah a rawkmi a um le um lo theih khawh a si lo.
Mocha Thlichia Ruangah Sagaing le Magway ah Cinthlaknak Hmun Tam Ngai A Rawk! Mocha thlichia ruangah Magway ramṭhen le Sagaing ramṭhen ah ruahpi fak ngai in a sur ruangah cinthlaknak hmun tam deuh cu ti nih a phum dih, tiah RFA nih a ṭial. May 14 ah Magway ramṭhen Gangaw peng le Hnankha khua pawng cinthlaknak hmun acre 40 hrawng cu ti nih a phum dih, tiah Hnankha khua mi pakhat nih a chim.
“Cinthlakmi tisik anhnah zong ti nih a phum i, Chihria keo hna zong ti nih a phum. Hnankha khua pawng cinthlaknak hmun acre 40 hrawng cu ti nih a phum,” tiah Hnankha khuami pakhat nih cun a chim. Cu pin ah Yesagyo peng, Yelaykyun hmunhma ah cinthlaknak acre 4 hrawng zong ti nih a phum dih ve, tiah theih a si.
Sagaing ramṭhen, Khin U peng khua 10 leng ah cinthlaknak hmun acre thonghra(10,000) renglo cu ti nih a phum ruangah tisik anhnah an rawkral dih, tiah tualchung mi hna nih an chim. Cu pin ah Yinmapin peng Myaukyama tidil ti cu a liam i, khuate 10 in tualchung mi hna umnak inn cu ti nih a phum dih lengah cinthlaknak hmun zong an rawk, tiah theih a si.
SAC nih thawngthanhnak a tuahning ah Myanmar ram pumpi huap in tualchung mi hna umnak inn 846, phungki biaknak hmun le phungki sianginn 27, sianginn 64, sii-inn le sii-khaan 14, tower 7 lengah cozah he aa pehtlaimi inn 38 an rawk i minung 3 nunnak a liam, tiah May 15 ah cathanh an chuah.
Yinmarbin Le Salin Peng Ah Tilian Nih Cinthlaknak Dum Acres 20,000 Leng A Phum! Sagaing ramṭhen, Yinmarbin le Magway ramṭhen Salin peng ah tiva ti a lian i, cinthlaknak dum acres 20,000 leng ti nih a phum, tiah theih a si.
May 14 ah khan Mocha thlichia a hran pinah ruah faak ngai in a sur caah ti a lian i, Myoyama tiva pawngkam a ummi khuate tiang ti a lian i, cinthlaknak dum acres 15,000 leng an rawk, tiah Khit Thit Media nih a ṭial.
Myoyama tiva pawngkam hrawng a ummi khuate hna cu tilian ruangah umnak hmun an i ṭhial hna i an cinthlakmi vialte zong an rawk dih, tiah theih a si. Cu bantuk ṭhiam in Magway ramṭhen, Salin peng Kyunyin khuakomh khuate 5 leng cu thlichia le ruah nih a den ve caah leikuang acres 1,000 hrawng le cinthlaknak dum tam ngai a rawk, tiah tualchung mi hna nih an chim. Credite; The Chin Post