Thlantlang Diary

Thlantlang Diary
=========
Zarhpi Ni pumh kar a lo. Dawr vialte ai khar dih. Inn zeimaw cu an kutka ai hung nain mi aw-aan a leng lo. Thli nih lamkam electric hri a run tuai hna ah thawng a rung zaam—khi hlei lo, zei thawng hmanh pawngkam ah an leng lo. A caan ah kutka rial thawng tete. A him rih mi inn hna cu Mexico le US ramri ah Druglords le an miṭhi lalang hna nih an kaltak mi ramcar innlo tete bang; kuanfang vihnak le kutka vam ah spray kah mi rong pawl—thlakawkbar in a king.

Thlantlang cu a min a hlam ko rua. Thlantlang a si ko cang. Aho nih run lumhsat len awk huam ti lo ding khin a um. “Zei hen kan sual Zingnu, vansangau in kan hram riangmang fah hi” ti kha kahtaza lamcung ka kebut thawng lakah lungchung in ka sa. “Kan ṭuan lai, kan ṭuan lai—kan ram le kan miphun ca ah” tikhin hlabia thlen in ka peh. Dungdang ah meithal a puak! A zuam caan ah a bo mi uihrut bang; sual erlet pawl cu an sual a puang ṭheo. Ka tli lo. Kai neek cang.

Cutin nikhat liam aa zal. Ni le Vuichip dongkhat aa naih ahkhin ralveng kan ralkap pawl hnuchit in tlun kan i thawh. Tlun lai ah bia kan i ronh. Him tein tivial. Kan mirh nain a hel ṭhan. An siangbei thal ka zoh ah ka lung a ṭhawng. Hi pei maw Lal Luai tuu le hna ka ti. Mangṭha, Thlantlang. Na sung lo. Na tei rih lo tu a si. Lengkawite

TPF Tlangthluan Bawlungpuai Tuah Asi Lai. Malaysia Thantlang Peng (TPF) Tlangthluan bawlungpuai cu a ra laimi May 2-4, 2022 (public holiday – hari raya puasa) ah tuah dingin timhtuah asi. Tuahnak ding hmunhma cu MyTOWN Shopping hmai Certual (Maluri) ah asi la.

A voi 11nak TPF Cup cu CDF Thantlang Council ca Fund kawlnak caah timhlamh mi asi i, hmuhmi phaisa 100% in CDF caah asi. Zuamnak celhphun tuah dingmi ah Pa bawlung chuih lawng siloin Nu bawlung bengh le Pa bawlung bengh zong tuah telh a sila. A sunglawi ngaingai la hih. Malaysia ah a ummi Chin miphun hna nih tutan TPF Cup ah a lam kipin thazaang nan kan pek i, nan kan telpi cionak lai upatnak he kan in sawm hna.

TPF cu Vailam, Zahnak, Bual, Khualhring, Vanzang le Thantlang tiin pengtlang paruk (6) fawnhkawmh in a dirmi asi. Thantlang peng vialte cu ulenau, laihritlai kan si hna bantukin tutan Tlangthluan Bawlungpuai ah hin kan dihlak tling kho hna usihlaw, nuamte in ihawikomhnak tuahti hna usih ti kha kan saduhthah a si caah kan Pengtlang hawi asimi vialte zong tutan TPF Cup ahhin sawm telh an si hna. Sawm telhmi kan unau hna he kan i tel khawh dih sicun Bu 10 (football team) kan si tela.

Eisupsap phunkip, Sabuti, Arsa mama, Sacek le eidin tirawl, a kik-hang phunphun Mipi caah tuah dinngin timhlamh nak kan ngei fawn. Nuam le theihtlak tein caan hman khawh cio kan i zuam hna la. Miphun a tthawnter tu cu lungrualnak a si. Kanmah le kan zawnchuak cio in a herhmi ttuan le ngeihchiah, ruahnak le thazaang chuah cio kan herh. Upa ngakchia tiloin tutan CDF ca Fund kawlnak Sport Day ah rian i bawmh ding tampi a um tela. A lamkip in i zuan hnawh cio dingah kan in sawm cia duh hna.

Kan hnu deuh November 12, 2021 lio ah CDF Thantlang riantuan cawlcanghnak ah, Thantlang Peng Fellowship (Malaysia) mipi hna nih Miphun le ram dawtnak he kut nan samhmi kha 6,250,000 MMK asi. Tutan zongah Pathian nih a kan telpi la i, Miphun dawtu hna pumpak chungkhar nanmah thawngin CDF caah san atlai mi Fund kawlnak asi lai ruahchan nak nganpi kan ngei ko. Nan dihlak cungah kan i lawm tuk ti zong kan von chim duh than.

2022 TPF Cup kongkau he pehparin fiangfai deuh in theih le ruahnak, chawva, thazaang le zei dangdang kongkau itel le hal duhmi nih a tanglei a kan Hruaitu 2022 TPF OC Upa hna sin ah pehtlaih khawh an si. (01) Chairman – Salai. David Uk Ceu Bawi, Ph: 0132683112; (02) Vice chairman – Pu. Lal Lian Hngak, Ph: 01121423104; (03) Secretary – Pu. Sui Lian Thang, Ph: 0176150711; (04) Assst. secretary – Salai. Duh Cung Thang, Ph: 0176549828; (05) Treasurer – Salai. Ceu Lian Bik, Ph: 0176533224; (06) Asst. Treasurer – Pu. Thla Uk Lian, Ph: 01121146256.

Page kongkau hnawhnam ngai in cawlcangh asi caah chanbau nak a um len kho. Siamremh le thawngpang tharchuah (update) khawh lengmang tu kan van i zuam tela. Upatnak he, TPF OC