“Thlacam cu bawmh hal lawng a si lo”

“Thlacam cu bawmh hal lawng a si lo”
=======
Laimi tam deuh nih thla kan cam kan ti mi hi thlacam si lo in “Bawmh hal” deuh khi a si. Na thlacam mi ah a thawk in a dongh tiang na herh mi, dam lo ngaihchiat har ton vansannak in hnangam lawmhnak hmuh ding na duh mi lawngte Pathian na chimh ahcun thlacam ti awk a tlak lo.

Thlacam nih a huap mi cu sual phuan (kan tuah mi a min bak phuan a hau, mi thintawi, rutreu depdet, lih chim, sik velh, puarhran ninghngal, fir, zumh le uah, zu din, nupa sualnak, lainawn etc vialte kan tuah mi sualnak chim lo in Bawipa ka sualnak ka ngaithiam ti men cu sual phuan a si fawn lo),

ngaihchih, Pathian sin lawmh biachin, Bawipa ca ah cucu khakha ka tuah lai tiah chiatserh bantuk in thlacam nenh mi ngeih (1/10 hman tein kan pek lai tbk khi), cun kan duhherh mi zong hal tiin a cunglei vial tal ni khat rawl ulh ah na telh lo ahcun thlacam ti mi a tlinh lo.

Nu bu an thlacam ding ah nu sining ka hngalh mi phun 10 (mi kong ceih, va tang dor lo, lih chim, khaini hmuam etc) hlawt ding, an tuah ding 1/10 hmaan tein pek, mang manh lo mi mah ruahnak te hna Pathian he kan i tong tbk phun 10, Pathian nih a kan dawtnak lawmh bia chim ding phun 10, a donghnak ah bawmh hal duh mi tiah ka ṭialpiak hna i Pastor nih thlacam ding ṭialpiak hmanh thiam lo tiah an ka thangchiat.

A cunglei phun 30 ka ṭial mi an hlawt i a tang bik khi anmah duh in bawmh hal phun nuhmei e ngakṭah, mission, thongtla, mizaw…. tbk lawngte chunnitlak an kan campi tiah …kan chungkhat nu aa tel ve mi nih a ka chimh ai.

Nang le kei kanmah lawng sau deuh thla kan cam tik ah Kanmah duhherh ca lawng kan hal ahcun midang sin ah thla ka cam tiah chim lo in bawmh hal thlacamnak ka ngei ti ding a si lai.

Tu tan kan ram himnak, luatnak , zalonnak ca ah thla kan cam tik zong ah Bawipa ca i kan tuah ve te ding thlacam nenh philh hlah usi. Hi ca a rel mi nih thla kan cam tik ah thlacam phun tam deuh kan i chap cang lai ti ruahchannak he…Kaa lawm. Credit: F Za Thang