A Kal (Kidney) Chuah Piak Lawng Ah A Nung Lai:
==========
Biak Tin Rem (Kum-8), Zaatthal, cu hringtu a Nu he an khua in bawmh hal ding ah ka sin an rak phan. Kum (1) a rak si ah, Mandalay ihkhun (550) Sii-inn pi ah a paw an rak hlai piak. Kum (3) a hung si ah a zunhri chung ah lung a ummi kha Mandalay ah an hlai piak tthan.
“Mah vialte Kawl lei i kan tlunkalnak le kan ithlopnak ah kan Satil vialte kan zuar dih cang a baa in kan ithlop ee” an ka ti. A tutan hi cu, a zawtnak a hung zual ngaingai ko. Yangon ah a kal (Kidney) pakhat kha chuah piak a hau lai tiah Siibawi nih an ti hna.
An van a sang. An tha a der. An lung a rawk. Tihnak in an khat. An mitthli a haa. A mah Biak Tin Rem nih “Bawipa nih thluachuah in pe seh ka bawm ko law” a ka ti. August thla dih ah Yangon/Mandalay ah an kal lai. Ruahdamh dih zat: MK: 4,000,000/-(Ting Sawmli).
Zeibantuk thawhbur le pek awk tam liangluang hmanhsehlaw Pathian ngeihmi aa hrawmmi Pathian Fale hna kan caah cun, pekchanh mi hi diheu le sunghnak ah aa cang bal lo. A karhtu a karh lehlam. I Nunpi ko. A tak asi, Bawipa biakamh a si. Ngakchia nute “Nun” a duhtu vialte cung ah Pathian thluachuah tlung ko seh. (Cung Hu) 09 400 30 5298,
Kan fanu te cu a temtuar tuk ai ee…Bawipa nih bawmtu pehram ko seh law…damnak hmu hram ko seh. Bawipa nih mi thinlung chung ah rian tuan ko seh law dam nak hmu ko seh. Bawipa nih a rauh hlan ah a herh bik mi dam nak he phaisa pe hram ko seh.
Ttaafar hna inn: Hringtu Nu veve he ibiak chawnh a um kho lo. Lileng umhar in um hmanh hna sehlaw Bawipa nih a hnemh ko hna. Jehovah Pathian nih inn a tthenh hna. Hi ruun-inn tang te hin Pathian mihman ah rak icang te hna seh ti hi ka thlacamnak a si. Inn a sak piaktu vialte cung ah Pathian thluachuah tlung ko seh. Bawipa Sunparnak caah a si.
Bawipa nih aa cinken ko: Sifah canfah bu in, zeitluk tuukforh hnek saknak intuar bu he, vuivai lo tein kengkuul tiang Khrihfa Upa, Nubu Upa a tuantu hna chungkhar i an temhnak vialte kha Bawipa nih a ttaangtang Dairy ah aa khumh zungzal. Hlan lio, Ruadeu ah inn chia bikte kha a tu ah cun um nuam khun ah Bawipa nih a thlenpiak cang hna.
Cu lawng hlah, Fapa dam lo, Pa Awi zong Kalaymyo Siikhan le Mandalay Siikhan pi ah diriam tein aa thlop kho. Cu pin ah family ning in kum hnih ei tirawl a hleih rih hna. Nunnem nunttha rual nih nan Lungthin nan pekmi phaisa cu: MK: 22,300,000/- a si. Ka cah cun rel cawk lo khi a si ko. A nol.
Zaan zankhat ah khup le thal a let tawntu Pathian cu ralring tein ngia zungzal usih. Pee chantu vialte zong hi Bawipa nih a ttangtang Dairy ah a khumh dih hna. Bawipa cu hi tin ka lawmh” Bawipa na ka dawt bantuk te hin, a ka dawtu hna zong hi rak daw ve hna” ka ti. “Na rian ka tuan zawn ah a ka bawmtu vialte zong hi, an herhmi lawng hlah an duhmi zong keimah bang pe ve ko hna” tiah ka Bawipa cu felfai tein bia ka beuh taak. Bawipa Sunparnak caah a si.
Kan dawtmi kan Fa pate Van Dawt Lian cu 31-7-2023, Yangin Children Hospital, Yangon ah tlamtling tein Operation an tuah piak dih cang. Pathian a ttha tuk. A rak bawmtu vialte zong mi nunnem le mi nuntha nan si. Pathian nih in cingkeng zungzal hna seh.
Bawipa Sunparnak caah ti in keimah he rian a ttuanti mi vialte hna, Pathian Zumhnak he thlaici nan tuhmi nih hin Leicung Nunnak thei a tlaiter zungzal ko timi kan hmuh tik ah hin Bawipa cung ah kan i lawmhnak a zual khun tawn ko.
Ka Mizaw harsa hna Phaisa nan bawmh tik hna poah ah “Kaa lawm tuk ee” tiah ka tial tawnmi khi keimah phaisa a si tinak siloin, ka dih hngami nan ka liam piak caa tu ah a si lai. Mizeimaw nih “A mah phaisa ah maw a rel hnga” tiah a ciarcum nan um tawn ii…(Mizaw harsa bawmhnak ah aa tel ttung lomi pawl chimmi).
Zeicahtiah Mizaw harsa hna hi keimah chungkhar tluk deng in ka dawt ve hna. Nan rak bawmh tik hna ah hin keimah phaisa bawmh tluk in kaa ruah ii ka rak i lawm tuk.. Thiltha le riantha poah hi Bawipa Sunparnak caah cang dih ko seh..Amen..