Thihdar Nih A Kan Phak Than, Pu Chum Er nih Mual A Kan Liam Tak Ruangmang!

Thihdar Nih A Kan Phak
———————————
𝗣𝘂 𝗖𝗵𝘂𝗺 𝗘𝗿, 𝟴𝟴 (𝗛𝗲𝗻𝗿𝘆 𝗽𝘂)Salen Khuami, Hakha YMCA Chak a ummi nih cikkhat an va i dor chungnak chuahsemnak Khua Salen ah amah damlonak in nihin zanlei 5:30; 2022 January 2 ah a kan liam taak.

Thaizing 2022 January 3; Salen Khua ah a ruak a tla te lai. Tantaakmi chungkhar Bawipa nih in hnem ko hna seh. April thla chung ah khan a chuahsemnak Salen khua ah chitkhat i dor in an va tlung i amah pumpak damlonak nih a van phan tikah si khawh chungin khuami le chungkhar nih an i zuam len ko nain a nunnak nih a ceihti lo caah January 02, 2022 ni zanlen suimilam 5:30 hrawng ah mual a kan liam tak.

Ngaihchiatnak Thawng; CACC ah ngunkeng (treasurer) dirhmun in rian a ṭuan lio mi Pi Tawk Men nih 2021 Dipa (December) 31 zaan suimilam 11:40 ah hi vawlei nunnak in a kan thih taak. Kan ngaih a chia tuk. 2021 chung ah CACC nih kan bchan mi hna nih pakhat hnu pakhat in a kan liam taak hna i kan chunmui a tlung ko. Kan dihlak Pathian nih kan hnem cio ko seh ti hi kan thlacamnak a si.

Pi Tawk Men (68) Tuanbia Tawi; (A) Chuahsemnak, Pi Tawk Men cu Hakha khua um Pu Hniar Mawng le Pi Khen Tang hna i an fale 10 lak ah 2nak a si i 1954 Vaupi (April)15 ah a chuak. A chuahpi a unau hna cu pa 3 le nu 7 an si.

Cacawnnak le rianṭuannak; Hakha khua, Pyidawta sang, hlan lio HBC biakinn ṭhing tang dot (ABM sianginn) ah tang cheu in tang hnih tiang a kai hnu ah No. (1) Basic Education High School ah aa ṭhial i tang thum in tang hra tiang a kai. 1973 ah tanghra a awng.

An unau 10 lak ah upa changtu a si caah chungkhar khuasak tintuknak ruah ah nu le pa bawmh a herh caah sianginn kai peh ti lo in 1973 Sikpar (November) 21 ah Hakha Township Genaral Administration zung ah cazite (LDC) in rian a lut. 1983 Biangreithlep (May) ah cazipi (UDC) ah a kai i 2007 Vaupi (April) 9 ah zunguk (BC) ah a kai. Cozah rian kum 40 fai a ṭuan hnu ah 2014 Vaupi (April)15 ah kum tling pension a la.

(C)Zung rian a ṭuan lio ah riankemh chih mi hna: 1) Chin State Women’s Affairs Federation, Secretary, 2) Hakha Peng Women’s Affairs Federation, Secretary, 3) Hakha Peng Maternal and Child Welfare Association, Secretary, 4) Pension a lak hnu 2015-2018 tiang Chin Women Organization, Hakha, Chairman.

(D) Chungkhar dirhnak; 1977 Biangreithlep (May) 7 ah Hakha Peng Sakta khua mi Pu Ral Thluai le Pi Za Iang hna i an fapa upa bik Pu Zam Kio he ṭhitumh kutsihnak an tuah i Pathian nih fapa 2 le fanu 1 rosung a pek hna. An fale hna cu:-1. Pu Ca Thawng Lian (New Zealand), 2. Pu Duh Peng Lian, Senior Status Resolution Officer Department of Home, Affair Australia, Bachelor of Business and Commerce, Monash University, Australia, 3. Pi Zung Ṭha Par, Hakha (B.A. History) An fale hi chungkhar an dirh cio hna i tu pa 3 le tu nu 4 Bawipa nih rosung lawi a pek hna.

(E) Pathian rianṭuannak; Pi Tawk Men cu Pathian aa bochan i aa pumpe mi a si caah in a tanglei bantuk in biaknak rian zong a ṭuan mi a si:- 1. 2003-2008 tiang Hakha Baptist Church ah nubu Treasurer a ṭuan, 2. 2012-2014 tiang HBC nubu Secretary a ṭuan. 3. 2015-2017 tiang HBC nubu Vice Chairman a ṭuan. 4. 2015-2020 tiang HBA Treasurer a ṭuan, 5. 2018 in a tu tiang HBC nubu Chairman a ṭuan lio. 6. 2021 Biangreithlep (May) 11 in CACC ah Treasurer a ṭuan lio mi a si.

(F) Zawtnak le Thihnak; Pi Tawk Men cu tit-vun lei dam lo nak a ngei mi a si. Cu a zawtnak cu Yangon, Mandalay ah kal in kum tampi aa thop tawn mi a si. Cu pin ah, chunglei dam lo nak dangdang nih a tlak chih caah Thailand zong voi 13 tiang kal in aa thlop.

Cu ti cun a dam deuh ngai tiah ruah a si nain caan chia nih a kan phak ca ah duh ning in Thailand lei ah siseh, Kawl lei ah siseh kal kho ti lo in a um. Cucaah, duh sah tein a hun zor ṭhan i chunglei dam lo nak (ril pem in) in a nunnak a liam. Pathian remh mi inn ṭha ah kan i ton ṭhan te lai ti zumhnak he, CACC Chungkhar