Hpakant Peng Lungvar An Kawlnak Hmun Pakhat Ah Nawncek An Dilmi A Baoh Caah Minung 30 Tluk An Nunnak A Liam. Kachin ramkulh, Hpakant peng lungvar an kawlnak hmun pakhat ah nawncek an dilmi aa sat/baoh caah minung 30 tluk an nunnak a liam, tiah theih a si.
March 12, zinglei suimilam 3 tluk ah Hpakant peng, Ma-na-hmaw pawng lungvar an kawlnak hmun pakhat ah nawncek an dilmi aa sat/baoh caah lungvar a kawlmi hna telh in vawlei cotu le phortu motor mawng an dihlak minung 30 tluk cu nawncek nih a pah chih hna caah an nunnak a liam, lungvar cawhnak caah an hmanmi ṭheng le vawlei phortu motor tam ngai zong nawncek chung ah an pil, tiah theih a si.
“Minung 4 cu nawncek chung in kan chanhchuah khawh ṭhan hna. Lungvar cawhnak caah hmanmi ṭheng 7 le vawlei phortu motor 9 an pil chih. Minung 30 tluk an nunnak a liam,” tiah Hpakant khuami pakhat nih a chim. Lungmili Post
Relchap: Chin ramkulh, Matupi pengkomh, Lailenpi khuapi pawng um, Pasei khua ah tualchung mi 1 le khuabawi pa cu Maraland Defence Force (MDF) nih an tlaih hna i an kalpi hna, tiah tualchung mi hna sin in theih a si.
2024, March 9, zanlei sang ah Pasei khua khuabawi pa le tualchung mi 1 cu MDF nih an inn ah an tlaih hna i an kalpi hna, tiah tualchung mi pakhat nih a chim.
“MDF hriamtlai pawl cu khuachung ah an rak lut i khuabawi pa telh in tualchung mi 2 an tlaih hna hi a si. Zeiruang ah an tlaih hna timi an chim lo i atu tiang an thlah rih hna lo” tiah Pasei khuami pakhat nih a chim.
Tlaihkhih a tong mi hna cu khuabawi Pu Kyaw Aung le Pu Ra Khei hna an si i nihin tiang an thlah rih hna lo bantuk in pehtlaih khawh zong an si lo, tiah theih a si.