Thawngpang Chia Fonh Thinlung A Fak Kho Tuk E
==============
Mon ramkulh, Ye peng Wapate (ဝါပသဲ) khua cu kahdohnak umlo nain SAC ralhrang nih raltuknak vanlawng in bomb a thlak caah mipi hliamhma tuarmi le inn kaangmi zong a tam, tiah tualchung mipi nih an langhter. May 7, zan suimilam 11 tluk ah kahdohnak umlo a ruang umlo in SAC ralhrang nih Wapate (ဝါပသဲ) khua bomb a thlak caah mipi hliamhma a tuarmi an tam pin ah mipi inn zong an kaang hna i, khuami dihlak khua chuahtak in ral an hrial hna, tiah Khit Thit nih a langhter.
“Kahdohnak umlo bu in SAC ralhrang nih jet vanlawng in a kah caah mipi hliamtuarmi zong an um, a zah tu cu kan theifiang rih lo, inn tamngai zong an kaang i an ciam dih hna caah khuami dihlak nih khua chuahtak in ral kan hrial” tiah mipi pakhat nih a chim.
Magway ramthen Gangaw peng, Min-yua (မင်းရွာ) khua lei a kal mi SAC ralhrang pawl cu May 7 ah Bomb puah hnawh an ton hnu ah lam aa chok mi khua upa pakhat cu an kahthah pin ah a phone zong an chuh tiah kan theih. “Kum 60 tluk a si cang mi upa cu thah a tong, a thimi pa a fa le zong SAC ralhrang chung ah an um hna, ralhrang nih zeitin dah an thah timi tu cu kan hngal lo” tiah Gangaw khua mi pakhat nih a chim.
Yaw-Alin-Tan nih a langhter ning ah “Bomb puah hnawh nak ah SAC ralhrang pawl a thi le hliamtuar an tam caah ralzam a si mi pakhat an thah. Ralhrang pawl cu May 8 ah Min-yua khua in an chuak i Gangaw lei ah an kir i Paw-lay khua an phan” tiah a langh ter.
Aluan cia May 3 zanlei sangah Mit-thar tiva ah takkholh dingin a kal mi SAC ralhrang kuttang riantuan Palik 2 thah an ton hnu, May ni 4 ah Min-yua khua ah umhmun khuar ding in SAC ralhrang an rat hi a si. “Hi hna pawl cu Min-yua an phak hlan lam pi ah Bomb kan puah hnawh hna i ralhrang pakhat a thi” tiah tualchung PDF pakhat nih a chim.
Sagaing ramthen, Khin-U peng ah SAC ralhrang hna cu phu hnih ah i then in rallam an sial caah pawngkam khua mi 7,000 tluk cu him nak duh ah an zam hna tiah kan theih. May 8 zinglei ah Khin-U peng Ka-Boh khua le Ku-tat khua hna ah SAC thazaang 200 tluk cu rallam sial pah in hraimngan zong khuachung ah an kah len caah a tu bantuk in khua mi an zam hna hi a si.
Atu lio ah Khin-U peng nichuah le nitlak lei in mipi a zam mi 7,000 tluk an si i caan karlak an ei din tirawl bawmh an herh tiah PDF Information lei nih an langh ter. Aluan cio May 6 ni zong ah Mandalay in a ra mi SAC ralhrang hna nih Sinh-ku peng khuate khua hnih inn le lo an khangh piak hna.
Mah hna pawl cu May 7 ni ah Ayerawaddy tiva ral ah pat in Khin-U lei ah an ra hna i pawngkam khua hna cu hriamngan he hriamfa he an kah pin ah inn zong an duah pah. Mah ni SAC rallam sial ralhrang pawl le tualchung PDF kar ah kahdohnak a chuak i PDF in minung 1 a nunnak a liam i 1 hliam a tuar tiah kan theih.
Magway ramṭhen, Htilin peng, Ahkyiban (အကြည်ဘန်း) khua cu SAC ralhrang thazaang 150 hrawng nih May 6 zing ah an khangh i, miruak 3 zong hmuh an si, tiah tualchung mipi nih an chim. Htilin khuapi le Kyaukhtu khuapi in rallam a rak sialmi SAC ralhrang cu May ni 5 ah Ahkyiban khua lut in zan an riak hnu, May ni 6 zing ah atu bantuk in khua an khanghpiak hna hi a si.
“SAC ralhrang nih inn 200 leng a umnak Ahkyiban khua an khangh caah a ciam dih nawn i, inn 10 hrawng lawng a taang. Kahdohnak zong a umlo, khua an luhhnawh i mipi inn an khanghpiak hna pin ah mipi tlaihkhih in an thah hna hnu ah mei in an khangh chih hna” tiah tualchungmi pakhat nih Khit Thit Ah a chim.
SAC ralhrang pawl cu May ni 7 ah khan Ahkyiban khua pawng Ahnyarban (အညာဘန်း) khua an luhhnawh ṭhan i, Ahkyiban khua zong ah a zam manh lo mi mipi hna an tlaihkhih hna, tiah theih a si. Ahkyiban khua pawng tualchung hriamtlai phu hna nih checkhlatnak le thianhhlimhnak an va tuah i, SAC ralhrang nih mipi an khanghmi hna ruak 3 an hmuh. SAC ralhrang nih hriamngan in an kah hna caah hnulei an tolh ṭhan, tiah theih a si.