Theih kan duh lo bik mi thawngpang!!

Thawngpang Chia Fonh!!
================
SAC nih Myanmar ram ah hramhram nawlngeihnak a laak kum hnih luan chung ah SAC ralkap nih mipi hna cung ah hriamhram kahdohnak a tuah ruang ah sualnak ngei lo tualchung mi 3,160 an nunnak a liam. Tlaihkhih a tongmi hi 20,846 an si cang tiah ramkhel lei thongtla bawmtu Assistance Association for Political Prisoners (AAPP) nih a langhter.

Tutan ah langhtermi cazin hi a luancia 2021 February ni 1 in 2023 March ni 24 tiang khomhsuat khawh tawk cazin a si i, a tak ah nunnak liammi hi atu langhtermi nak in an tam deuh kho tiah a langhter chih. Khuapau dohthlennak chung ah tlaihkhih a tongmi hi 16,978 an si i cu chung ah 5,206 hi thongthlak ding in biakhiahnak tuahpiak cangmi an si.

Tualchung mipi hna le mipi hruaitu, dohthlennak ah cawlcanghnak a tuahtu hna, thawngpang laaknak a tuahtu(Journalist), CDM cawlcanghnak a tuahtu hna le hmunkip ah a ummi hna nih tlaihkhih le hren an ton i nunnak liammi an um nan theih a si ahcun AAPP ah pehtlaih le thawngpek khawh kan si tiah an thanhmi ah an langhter chih.

March ni 23 ah Yangon, Bahan peng ah taxi a khaltu pa pakhat cu thah a tong, a taxi an chuh hnu ah a ruak zong an hlonh tiah theih a si. Thah a tongmi pa hi kum 55 tluk hrawng a si i, a hngawng le a lu ah nam hliamhnak hma hmuh a si. A ruak cu Bahan peng, Bucho no.2 sang Natmauk Lamtwe no.1 hmai ah an hmuh tiah theih a si.

“Nunnak liammi ruak kan hmuh tiah thawng an kan thanh caah kan va zoh, a ruak ah cun nam hliamhnak hma hmuh a si. A takcung ah phone a um i a chungle nih pehtlaihnak an rak tuah caah, a chungkhar he zong kan i chawn kho. Nunnak liammi hi taxi khaltu a si i leilawng cawk/zuarnak tibantuk zong a tuah tiah kan theih” tiin mi bawmchantu phu chungtel pakhat nih a chim.

Nunnak a liammi pa hi March ni 22, zanlei in a umnak Kyimyintai peng Tida sang in leilawng in a chuah hnu ah, a chungkhar nih pehtlaihnak an tuah kho lo. Cu hnu March ni 24 ah atu bantukin a ruak in an hmuh hi a si. A ruak cu Yangon, siizungpi ah an kuat tiah theih a si. An chuhmi leilawng hi Cherry QQ, MDY CC-5489 a si tiah theih a si.

Karen ramkulh, Demoso peng chung ah SAC ralkap nih a ruang um loin hriamngan an thlah caah tualchung mi 3 nih hliamhma an tuar tiah theih a si. Nihin, March 24 chunhnu suimilam 1:00PM luan hrawng ah SAC ralkap nih Demoso peng khua hnih ah a ruang um loin hriamngan an thlah caah, tualchung mi umnak inn khat a rawk i minung 3 nih hliamhma an tuar pin ah cinthlaknak dum chung ah hriamngan an tla tiah theih a si.

“Khua pakhat ah tualchung mi an umnak inn khat hriamngan nih a tlak caah a rawk, minung 3 nih hliamhma an tuar. Cu hnu ah a dang khua pakhat ah an cinthlaknak phayeti dum ah hriamngan kuan an tla. SAC ralkap hna nih chun le zaan he an duh tik paoh ah rallam sial in khuachung ah an lut i, a ruang um loin hriamngan an thlah caah March thla chung ah hin Karen ramkulh chung khua 30 leng um tualchung mi 30,000 leng an zaam cang” tiah tualchung mi pakhat nih a chim.

Karen ramkulh, Bawlakhe peng Wanbala khua pawng tualchung mi thing rian an ṭuannak hmunhma cu SAC ralkap nih March ni 23, zanlei ah vanlawng in bomb a thlakhnawh hna caah tualchung mi 3 an nunnak a liam, 5 nih hliamhma an tuar tiah Bawlakhe tualchung mi hna nih an chim.

Tualchung mi hna thing rian an ṭuannak hmunhma ah lb 500 tluk a ritmi bomb lung nga a thlakhnawh hna caah pa pahnih cu hmakhatte ah an nunnak a liam, cu hnu ah pa pakhat cu siizung an phanhpi ah a nunnak a liam ve tiah min langhter a duh lo mi Bawlakhe khuami pakhat nih a chim.

“Atu bantuk thil a can hi zaanlei suimilam 4:30PM hrawng ah a si. A voi khatnak ah hlathlainak tuahtu vanlawng pakhat a rak zuang, cu hnu ah raltuknak vanlawng a rak zuang i bomb a thlak colh. Minung 2 cu hmakhatte ah an nunnak a liam i, pakhat cu siizung an kalpi ah a nunnak a liam ve. Minung 5 nih hliamhma an tuar i cu chung ah minung 2 hi an hliamhma a fak ngai, a thimi hi kum 20 in kum 50 kar an si hna” tiah a chim.

SAC ralkap nih vanlawng in bomb a thlak caah tualchung mi hna caan karlak an i dornak thlam hna cu an rawk i ke 10 ngei leilawng pakhat zong a rawk tiah theih a si. Tualchung mi hna thing rian an ṭuannak hmunhma le rianṭuantu hna caan karlak an umnak thlam hna cu SAC ralkap nih tualchung hriamtlai phu hna an umnak tiin an ruah caah atu bantukin vanlei kahdohnak a tuah hi a si kho tiah Bawlakhe tualchung hriamtlai phu in ṭuanvo ngeitu nih a chim.

SAC ralkap nih cun tualchung mi le tualchung hriamtlai phu tiah thleidang loin van lei kahdohnak a tuah ko tiah a chim chap. Sagaing ramṭhen, Kanbalu peng Ngaungzingyi khuami thluak lei dam lonak ngei hawilo lo pakhat cu SAC ralkap nih mei in an khangh, tiah Kyunhla-Kanbalu in rianṭuantu phu in ṭuanvo ngeitu nih a chim.

Kanbalu peng Ngaungzingyi khua ah SAC ralkap le phyusawhti 150 hrawng cu nizan March 23 zanlei suimilam 4:30PM hrawng ah an lut i, mei in an khangh. Phungki pakhat zong an tlaih i, thluak lei dam lonak nei hawilo lo kum 20 tluk pa pakhat zong mei in an khangh, tiah theih a si.

SAC ralkap pawl cu Soepaukkone, Bokone, Boteykone, Makone, Nyaungzingyi, Pelay le Tayethkawng khua ah rallam an sial caah khuami 10,000 leng cu ralhrial in an zam, tiah theih a si. “SAC ralkap nih inn an khanghmi le a rawkmi zat cu kan thei rih lo. Lungthin lei hawi tluk lo pa pakhat zong mei in an khangh. Khuate 7 in khuami 10,000 leng nih ral an hrial,” tiah Kyunhla-Kanbalu in rianṭuan tu phu in ṭuanvo ngeitu nih cun a chim.

SAC ralkap pawl cu March ni 22 ah Soepaukkone khua ah an lut i, phungki sianginn ah aa dor i a zaam kho lomi tarnu tarpa hna sin in phone, tangka sing 8 le tumbul an firpiak hna. Phungki sianginn tualchung ah a ummi khuami an caw 40 leng zong an firpiak hna, tiah theih a si.

SAC ralkap pawl cu khuate ah rallam an sial i thluak lei dam lonak nei hawilo lo pa pakhat mei in an khangh hnu ah Nyaungzinlay khua um pyusawhti sakhan ah an kir, tiah theih a si. Crd-The Chin Post