CDF-Matupi Ralkap Pakhat Ralram Ah Bomb I Thlahphoih Sualnak In A Nunnak A Liam
=========
CDF-Matupi ralkap pakhat cu Hakha-Matupi ralram hmun pakhat ah May 23 zan suimilam 8 ah Bomb i thlahphoih sualnak in a nunnak a liam tiah CDF-Matupi nih ngaihchiat nak an langh ter. A mah cu Hakah-Matupi lam ralram hmunpakhat kahdohnak ah an tuah lio zing suimilam 7 ah Bomb i thlahphoih sualnak in hliam fak ngai a tuar i a nunnak chanhchuah ding in an i zuam lio ah zan suimilam 8 ah a nunnak a dih hi a si.
Ram le miphun caah a nunnak a pe tu pasal tha, upatnak kan in pek, ngaihchiat nak a tongmi chungkhar hna zong nan ngaihchiatnak kan in hrawm pi hna tiah CDF-Matupi nih an langhter. CDF-Matupi nih hliamkhuai an ton caan thlopbul tu ding sii lei thiamsang an i zat lo caah sii lei a thiam mi hna kawhauh nak zong a luan cia April 19 ah an rak tuah.
“A bik in Matupi-Hakha kar ah hin sii lei a thiam mi an tlawmtuk caah riantuan tu kawhauh nak zong kan tuah nak a si. Hakha lei kalnak khuate hna zong an um ti lo caah sii-ai lei ah kan chanbau, sii sayama pakhat a um mi cu a rannak in thlah a si ko nain hliam a tuar mi a fahtuk caah lampi ah a nunnak a liam hi a si. A thi mi chungkhar humhim nak caah a min zong kan langhter lo i rak kan theithiam hna seh” tiah CDF-Matupi Information tlaitu pakhat nih a chim.
CDF-Matupi ralkap lawng si lo in SAC ralhrang zong nih an tarh mi Bomb puahkeh nak ruangah mipi tampi zong an nunnak a liam cang, Matupi peng chungah sii-ai lei harsat nak ruangah a can teah hliamkhuai a tong mi thlopbul manh lo ruangah mipi le CDF lei in minung 5 in 7 tluk an nunnak a liam cang tiah Matupi Times nih a langh ter.
Hakha Khuapi Um Agape Sii-inn Ah Siibawi Pakhat Le Nurse 4 Telh In Minung 20 Hrawng SAC Ralhrang Nih An Tlaih Hna; Chin ramkulh, Hakha khuapi hrambunh Agape Sii-inn cu a luancia May 21 zan ah SAC ralhrang nih an luhhnawh i siibawi pakhat le Nurse 4 hna cu ralhrang nih an tlaih hna, tiah theih a si.
“Zan suimilam 11:30 tluk ah SAC ralhrang nih Agape sii-inn an luhhnawh hi a si. Zei ruang ah an luhhnawh ti cu theih a si rih lo, Sibawi pakhat le Nurse 4 an tlaih hna i an kalpi hna” tiah tualchungmi pakhat nih a chim.
SAC ralhrang nih an tlaihmi hna cu Siibawi Sicilia, Nurse Henny, Nurse Sianlun, Nurse Hniang Sung le Nurse J. Mawi ( An dihlak minung 5) hna an si, tiah a chim chih. Cu pinah a luancia May 21 zan ah hin SAC ralhrang nih khualtlung checknak an tuah i minung 20 hrawng an tlaihkhih hna, tiah theih a si.
Hakha-Falam Kar A Tlaumi Chin Mi 2 Hna An Ruak Cu Mei Khangh Cia In An Hmuh Hna; Chin ramkulh, Hakha le Falam karlak ah a tlaumi Tedim tualchungmi 2 hna cu May 22 zing ah SAC ralhrang nih umhmun an khuarnak hmun ah an chungkhar hna nih an ruak in an hmuh hna, tiah theih a si.
An ruak an hmuh hnanak hmun cu Hakha peng, Hniarlawn khuathar pawng, Tiphul lam i SAC ralhrang nih umhmun an rak khuarnak hmun a si. SAC ralhrang nih mahka hmun an chuahtak hnu May 22 zing ah an chungkhar hna nih mei khangh cia in an ruak an hmuh hna hi a si, tiah chungkhar he neihniam mi pakhat nih a chim.
“SAC ralhrang nih an sakhan an chuahtak hnu in a tlaumi hna i an chuangkhar hna nih an va zoh tik ah ruak 2 cu an hmuh. An ruak cu mei in an khangh cang hna caah an muisam zong aa hliah kho ti lo nain a thimi nu nih aa phurhmi Tedim thuam hni pakhat a pawngkam ah an hmuh chih caah fehternak an tuah hi a si” tiah a cunglei mi nih a chim. Nunnak a liammi hna ruak 2 cu Hakha khuapi um an chungkhar sahlawh hna nih an laak cang i, May 23 ah an vui hna lai, tiah theih a si. Credite; Lungmili Post