Thazaang Tam Ngaiin Hakha Khuachung ah SAC Ralkap an i Choklet

Thazaang Tam Ngaiin Hakha Khuachung ah SAC Ralkap an i Choklet
——-
Hakha, Cawbuk sang lei ah kahdohnak a chuah hnu nihin May 3 ah Hakha khuachung ah SAC ralkap pawl thazaang tam ngaiin an i choklet hna. Chun sml. 2:00 hrawng zong ah SAC ralkap motor 6 le palik motor 4 in Hakha Market hmai ah an dir hna i a rauh hlan ah Lansone lei ah an ttum hna. Hakha khuachung ah kha hlan nakin mi an king i, dawr cheukhat zong an khar hna. Credit: The Chin Journal

Thawngpang dang; Ralhrang uknak tha lo hi a hram in phuai dih ding a hau cang caah Karen National Liberation Army (KNLA)ဒုတိယစစ်ဦးစီးချုပ် Doh-Bogyokekyi Saw Baw Kyaw Heh nih Karen hriamtlai phu 4 cu nihin May 2, 2021 nih ah thazang peknak bia a cah hna. Karen ramkulh chaklei Hpapun hmunram chungah ralhrang vanlawng nih bomb an thlak hnawh hna kong he pehtlai in KNLA Do-Bogyokekyi Saw Baw Kyaw Heh nih Karen hriamtlai phu hna; Karen National Liberation Army (KNLA), Democratic Karen Benevolent Army (DKBA), Karen National Union/ Karen National Liberation Army – Peace Council (KNU/KNLA-PC) le Border Guard Forces (BGF) hna cu nihin May 2, 2021 ni ah Karen holh in cakuat pakhat a pek mi hna chungin a chim than.

“Karen National Liberation ArmyN (KNLA)၊ Democratic Karen Benevolent Army (DKBA)၊ Karen National Union/ Karen National Liberation Army – Peace Council (KNU/KNLA-PC) le Border Guard Forces (BGF) ralkap dihlak, Karen miphun nih dohthlennak kan tuahnak kum 70 leng chungah atu bantuk in caan tha hi a um bal rih lo. Hi caan tha hi kanmah lungrual tein kan dirhti i a ra lai mi techin fapa hna nih uknak tha lo hi luatnak an hmuh khawh nakhnga, luatnak kan hmuh nakhnga ding caah le hi ralhrang uknak hi kan hrawk hrimhrim a hau, tiah Do-Bogyokekyi Saw Baw Kyaw Heh nih thazang peknak bia a chim.

Atu lio caan ah hin Karen miphun chungah lungrual tein um caan a si nak kong, ralhrang pawl nih chaklei Hpapun hmunram lei ah vanlawng in bomb an thlak hnawh hna kongah zeihmanh thathnemnak a um lo, a hmunhma chung a ummi mipi nih tihphang hna seh ti duh ruangah a si ko, tiah a chim nawlh. Vanlawng in kahnak an tuahmi hi ke ralkap thazang a dernak a langhnak pakhat a si. Ralhrang Ke ralkap pawl zong thazang an chap mi hna cu luh kho lo in an kham khawh hna caah cunglei vanlawng in an kan thuat hi a si, tiah a chim.

Ralhrang nih ralkap thazang an chap mi hi ramri hngak phu Border Guard Forces pawl bawmhnak an hal hna, tiah thawngpang kan theih. Hi ralhrang bawmhhalnak hi Karen miphun kan caah zeihmanh thathnemnak zong a chuah pi mi a um lai lo, cu hlei ah Karen miphun karlak ah pakhat le pakhat i kahdohnak lawng a si lai. Hi kahdohnak ah hin a thi ding le hliamtuar ding minung cu kanmah Karen miphun le hriamtlai phu thiamthiam kan si ko lai, tiah Doh-Bogyokekyi Saw Baw Kyaw Heh nih a chim.

Cucaah, nihin thawk in kan miphun caah rian kan i khinhmi le kan tuan mi hi a dik mi ah kan dirh a hau, a thatnak le a chiatnak kan theihdang thiam a hau, lungrual tein lam pakhat kan kawl i, Kawl ralhrang bu hi raltha tein kan doh ngam i kan hrawk a hau cang, tiah KNLA Doh-Bogyokekyi Saw Baw Kyaw Heh nih a donghnak ah a chim.