Rakhine Ram Ah Cyclone Thlichia A Lut Ṭhan Kho Tiah Khuacaan Kong Thiamsang Pawl Nih An Ruahdamh
==============
Bay of Bengal (ဘင်္ဂလားပင်လယ်အော်) he aa tlai mi Kapali Sea (ကပ္ပလီပင်လယ်) hna ah thlitu a cawlcangh dan aa ningcang lo caah a tha a ṭhawng deuh mi thlichia Rakhine ram ah a lut kho tiah khuacaan lei thiamsang pawl nih an ruahdamh.
June 9 zinglei sml 6:00am thawk in Sittwe ni tlaklei meng 77 aa hlatnak, Bay of Bengal (ဘင်္ဂလားပင်လယ်အော်) nichuah chaklei in a rak lut kho i a thazang hi sml 1 ah meng 110 tiang a phak khawh caah a thazang a ṭhawng tuk mi thlichia (VSCS) – CAT – 3 tiang a phan deng tiah an chim.
June 9 zaanlei thawk in sml 1 ah meng 118 in Sittwe khua chaklei meng 60 hrawng aa hlatnak, Myanmar-Bangladesh ramri tan in a lut kho tiah an ruahdamh. Ruahdamh ning ah June 6 le 7 tiang thlichia a lam le a fah ning hi aa thlen caah ruahdamhnak hi 80% tiang a dik tiah U Win Naing nih DVB ah a chim.
Karen Ram Kum 2 Chung Ah Kahdohnak voi 1,000 Leng Kan Tuah Tiah KNDF Chairman Nih A Chim; Karen ram kum 2 chung ah kahdohnak voi 1,000 leng kan tuah i SAC sin in hriamngan le meithal 600 leng kan lak khawh tiah KNDF Chairman Khun Be Du nih a chim.
2023 May 31 ah a si mi KNDF an dirnak kum 2 a tlin ni bia chimnak ah atu bantuk in a chim hi a si. “Kum 2 chung ah KNDF nih kahdohnak 1,000 leng kan tuah. Cu kahdohnak chung ah hriam 600 leng kan lak khawh. Sakhaan 10 laknak zong ah KNDF kan i tel ve. Battalion kip ṭhithruainak le hriam chuahnak/cawknak zong kan ṭhangcho chin. Kahdoh ningcang le kan thiamnak zong a ṭhangcho chin” tiah a chim.
Mipi hna hramhram uknak tang in kan luat khawhnak hnga tiah kahdohnak ruang ah a nunnak a liam mi KNDF hriamtlai 153 an um cang tiah a chim fawn. Atulio hi Karenni ram ah SAC nih Brigade 3 leng ah battalion tampi hmang in kahdohnak a tuah cuahmah lio a si.
Chin-Magway Ramri Ah CDF, PDF phufonh le SAC Ralkap Karlak Ah Kahdohnak A Chuak;The Chinland Post | 2023 June 1 — Chin ramkulh le Magway ramri, Mindat peng le Kyaukhtu peng karlak, May 31 ah kahdohnak a chuak tiah CDF Commander Salai Naing Tam nih a Facebook cahmai ah a tar.
“May 31 zong ah kahdohnak pehzulh in a fak rih. Helicopter pawl an raa ko nan a kap rih lo” tiah Salai Naing Tam nih a chim i bawmtu ralkap zong tampi a thlah hna tiah a chim fawn. Mindat khua in a rak ṭum mi SAC ralkap, palek 200 hrawng le CDF-Mindat, CDF-Kanpetlet, Gangaw pengkomh B13, B08 phufonh hna karlak ah May 29 in kahdohnak aa thawk i SAC lei a thi mi an um tiah a chim.
Cun CDF hriamtlai pakhat zong fak ngai in aa hliam tiah a Facebook cahmai cung a langhter mi ah hmuh khawh a si. May 29 zaanlei zong ah, Htinchaung khua lei ah a kir mi SAC ralkap pawl cu CDF phufonh nih an rak kah hna i SAC lei a thi mi an tam tiah theih a si. Crdt; The Chinland Post