March thla chung No. 1 Military Command ram chung ah SAC ralkap 612 kan thah khawh hna tiah NUG nih a thanh
===============
March thla chung ah, No. 1 Military Command ram chung ah SAC he kahdohnak voi 437 a chuak i SAC ralkap 612 an thi tiah NUG Runvennak Minister Zung nih nihin ah a thanh. No. 1 Military Command ah Sagaing ramthen, Magwe ramthen, Mandalay ramthen le Shan ramkulh Chaklei an i tel i, March thla chung ah cuka hmun pawl ahcun kahdohnak tampi a chuak.
Cu kahdohnak pawl ah SAC ralkap 612 an thi i 700 hma an pu tiah an chim. Rammi rungvengtu ralkap lei in 60 leng an thi i 94 hma an pu tiah cathanh ah an langhter. Rammi ralkap hna nih SAC ralkap sin in meithal zun 27 le kuanzen tampi an laak khawh ti zong an langhter. Cu kahdohnak pawl cu No. 1 Military Command kut tang PDF, LDF le EROs hna i bawm in an tuah mi a si tiah NUG Runvennak Minister Zung nih a langhter.
Karenni ramkulh ni 10 chung kahdohnak ah SAC lei ralbawi pawl tel in 40 leng an thi; Karenni ramkulh, Demoso peng, Dawhkulia le Tanilale tlangthluan ah ni 10 chung kahdohnak a chuak i SAC lei in Captain rank pakhat le bo hnih rank pahnih tel in 40 leng an thi tiah KNDF nih an thanh.
Karenni ramkulh, Demoso peng Nichuahlei ah a um mi Tanilale khuate tlang cung in Dawhkulia khuate tlang lei ah thazaang tampi he SAC ralkap nih an rak nam hna caah May thla 14 thawk in KNDF he kahdohnak fakpi a chuak i atu bantuk in SAC ralhraang lei an thihnak hi a si. SAC ralkap LIB-425, LIB-517, IB-287 battalion hna cu May 14 thawk in Karenni Army (KA) KNDF, KNDF-ETD, KNDF-UAV le Loikaw PDF hna i bawm in May 23 tiang an kah hna.
Kahdohnak chung ah Loikaw, Ngwetaung le Hpruso hrambunh SAC ralkap nih ni fatin hriamnam ngan tam tuk kah an bawmh hna i vanlawng in voi 60 nak tlawm lo an kah hna tiah cathanh ah an langhter.
KNDF lei nih kahdohnak chung ah MA-1 meithal zun 8, MA-2 meithal zun 1, MA-3 meithal zun 3, MA-4 meithal zun 1, 9mm pistol zun khat, RPG zun 2, kuanzen tampi, pehtlaihnak seh thilri hna le ralkap hman mi thilri tampi an laak pin ah SAC ralkap pahnih a nung in an tlaih hna tiah theih a si.
Hakha Agape sii-inn SAC nih an luhhnawh i sibawi pakhat, nurse pali an tlaih hna, khua chung zong ah khuami 20 an tlaih hna; 2023 May 21 zaan suimilaam 11:30 tluk ah Hakha khuapi, Agape sii-inn cu SAC nih an luh hnawh hna i sibawi pakhat le nurse pali an tlaih hna lawng si loin, Hakha khua chung ah khualtlung cazin an check hna i sangmi minung 20 fai an tlaih hna tiah theih a si.
Agape sii-inn ah SAC nih an tlaih mi hna cu Siibawi Sicilia, Nurse Henny, Nurse Sianlun, Nurse Hniang Sung le Nurse J Mawi hna an si tiah kan theih. Hi kong he petlai in sang chung mi pakhat nih, “Zaanlai ahkhan an luh hnawh hna. Zeiruang ah an luh hnawh hna ti fiang in kan thei ve lo. An tlaih mi hna chung ah siibawi pakhat aa tel. Nurse zong an i tel,” tiah THP ah a chim.
May 21 zaan ah Hakha khuachung sang cheukhat ah SAC nih khualtlung cazin an check i an tlaihmi hna hi minung 20 fai an si tiah thawng kan theih.
Tianzaan May 21 zinglei suimilaam 1:00 tluk ah Hakha Keitheibo sang chung khuasa Pu Duh Awi inn zong a ho ti hngalh lo, Kawl holh in a holh mi pahnih nih an ramh hna i tanka le thilri tampi an chuh hna pin ah an innpa pakhat zong a hrom ah nam in an ah tiah kan theih.