Myaing Peng SAC Ralhrang Riahcaw Lak Kalmi Motor An Khangh; Umhmun An Khuarnak Bomb Puahhnawhnak In Ralhrang 1 A Thi
=========
Magway ramthen Myaing peng, Thar-yet-kaan khua umhmun khuar mi SAC ralhrang riahcaw lak ding a kal mi motor le an i thutnak khur cu PDF nih Bomb an puah hnawh hna caah an motor an khangh dih pin ah ralhrang 1 an thi tiah Myaing Pah-kah-phah tuanvo ngeitu pakhat nih a chim.
May 11 zinglei suimilam 7 tluk ah Thar-yet-kaan khua ralhrang umhmun an khuarnak khur cu bomb puahhnawh in Pyusaw-hti pakhat a thi i tampi hliam an tuar. “Mah pin ah Pyusaw-hti sakhan in Pakkoku lei ah riahcaw lak a kal mi ralhrang hna cu lam pi Bomb kan puah hnawh than hna caah an motor a rawk i Pyusaw-hti tampi hliamfak an tuar. Hliam tuar mi hna zong Drone bomb 5 kan thlak hnawh than hna. An motor rawk ni zong kan khangh piak dih hna i a thimi le hliamtuar zat fiangin theih khawh an si rih lo.’tiah a cunglei upa nih a chim.
Khualtlawng Sinah Tangka Haltu SAC Ralhrang Drone Bomb Thlakhnawhnak In 6 An Thi; 7 Hliam An Tuar; Sagaing ramthen, Watlat peng Yua-tharkyi khua lam 4 aa tonnak hmun pakhat ah khualtlawng hna sin ah tangka hal lengmang tu SAC ralhrang hna cu PDF nih Drone Bomb an thlak hnawh hna caah ralhrang 6 an thi tiah kan theih. May 11 zing suimilam 9:45 ah SAC ralhrang 15 tluk cu khualtlawng hna sin ah tangka hal dingin a buin an i timhtuah lio ah Drone bomb an thlak hnawh hna hi a si.
“Tangka hal dingin ralhrang 15 hna cu a bu in an um lio ah bomb 2 kan thlak hnawh hna, cuchung ah 13 an i teng nain 6 cu an thi, 7 hliam an tuar”tiah Myingyan PDF Zero Battalion 7 an hruaitu pa nih a chim. “Ralhrang a thimi le hliam tuar hna cu a pawngkam tlakrawk inn ah an kal pi hna i inn ka zong hrenh, an aukhuan thawng zong theih an si i an thi chuak mi zong tampi hmuh khawh a si” tiah a cunglei upa nih a chim. Hi kahdohnak cu tualchung PDF tangti phu 6 an i bawm tiah kan theih.
Thlichia Nih A Hnursuan Khawh Nak Hmun Ah Um Mi Mipi 11,000 Leng ULA/AA Nih An Thialkam Hna; Rakhine ram chung thlichia nih fakngai in a hnursuan khawh nak, hmun a niam deuhnak ah khua sa mi khuate 21 in mipi 11080 leng hna cu ULA/AA nih a him deuh lai tiah ruahnak hmun ah an thial kam hna tiah AA chimphuannak nawl ngeitu Kaing Thu Kha nih a chim.
Aa thial huam lo mi cheukhat hna zong a hlan kan in himnak dingah timhtuahnak tha tein ngeih a herh nak kong zong ralrin pek nak an tuah hna. Mah pin ah mipi nih an herh ding mi sii-ai le a herhmi thilri zong fawizaang deuh in an hman khawhnak ding caah bawmhnak zong an pek chih hna tiah kan theih.
Matupi Khua Ah Thazaangder Mi Lihninh Nak A Chuak; Chin ramkulh Matupi khua ah May 12 zinglei suimilam 3:14 second 55 ah thazaangder mi Lihninh nak a chuak tiah Department of Meteorology and Hydrology nih May 12 ah an langh ter. Matupi khua in nitlak lei meng 21 tluk ah Lihninhnak thazaang slight (4.6) in an aa hnih hi a si. Credite; Lungmili Post.