Thawngthanhnak: Tu Thlathih Tiang Hakha Lockdown a Si Rih Lak Timi Update Thar!

Thawngthanhnak: Tu Thlathih Tiang Hakha Lockdown a Si Rih Lak
———–
Dawtmi Khrihfabu ulenau nan dihlak Bawi Khrih Min in nan kut kan in tlaih hna. Hakha Khuachung ah Covid 19 zawtnak hi a hung karh chin caah a tanglei bantuk in Lockdown tuah a si lai. (1) Oct. 11-14 tiang herhhai zalh. (2) Oct. 15-30 chung Lockdown a si lai.

Zulhding; (1) Pyidawtha le Dawrthar Market cu zing sml. 6 in 12 tiang hun ding. (2) Facang le eidin dawr cu zing sml. 6 in 12 hun ding. (3) Lakphak dawr le Rawldawr cu khar dih ding. (4) Thilpuan dawr zong khar dih ding. (5) Lengchuahnak Outpass Card tuah a si lai i a herh tukmi thil cawk ah minung pakhat lawng chungkhar pakhat ah lengchuah ding. Lengchuah tik ah Outpass Card in ken ding.

(6) Tuanvo ngeitu nih an in check tik hna ah Outpass Card aa ken lomi cu First Warning a si lai. Second Warning tiang pek a si lai. Cu hnu poah cun ttuanvo ngeitu kut ah chanh nan si lai. (7) Dinti a pemi cu zing sml. 6 in 12 tiang pek a si lai.

(Mawtaw cu zing sml. 8 am in 2 pm chung ah luhchuah a si lai. Kan fale nih Gate an hngah lai i a lutchuakmi paoh COVID-19 checknak an tuah lai. Zangfahnak in miphun dawtnak lungput he nawlchuahmi hi zulh i zuam cio hna u sih.
Pathian nih kan um pi ko seh! OutpassCard hi Hakha Township Public Healthcare nih a tuah lai i thawngthanhnak zong an tuah tthan te lai.

Outpass Card hi Hakha Township Public Healtcare nih thaizing in an tuah lai i a lak ningcang thawngthanhnak an tuah tthan te lai.

Hakha ah COVID-19 in Minung 2 an Nunnak a Liam Than. Nihin (Oct. 10) Hakha khua ah COVID-19 zawtnak in minung 2 an nunnak a liam tthan, tiah thawngpang kan theih. A nunnak a liammi pakhat hi Carson Hall, Community Care Center-2 ah an zohkhenhmi Dongva khuami Pu Tluang Mang (kum 60) a si i, a dang pakhat hi inn ah an thlopbulmi a si, tiah Hakha COVID-19 zohkhenhnak lei ttuanvo ngeitu upa pakhat nih The Chin Journal ah a chim.

Hakha khuapi chung COVID-19 zawtnak ttumchuk lei a panh lo caah tu thlathih tiang Lockdown pehzulh ding in HTPH nih thawngthanhnak zong an tuah.

Taingen in Falam lei ah SAC Ralhrang Motor le Tank pawl an Rak Kai. Nihin zaanlei sml. 4:30 hrawng ah Taingen in Falam khua lei ah SAC ralhrang motor 10 le Tank 2 an rak kai.

Kalay in a rak kaimi SAC ralhrang pawl kha an si. Tank 2 hi nizaan ah Tedim khua zong ah an lut ta. Nizaan ah Tedim le Taingen kar Hiangzing khua ah a phanmi motor 10 hrawng cu an lawng in Kalay lei ah an kir tthan.

Rungtlang Ralbawi Motor Mongtu le Pumpak Assistant an Zaam. Hakha khua, Rungtlang 266 SAC ralhrang sakhaan ah a ummi Brigader General Myo Htut Hlaing i pumpak hnuzul/bawmtu (Personal Assistant) le a motor mongtu pa an zaam, tiah CHRO nih a ttial.

“A zaammi hna nih an chim ning ah SAC ralkap i an nupi pawl le an chungkhar pawl zong ralhriam pek an si dih cang. Pu Ngun San Aung zong ralhriam an pek. Ralkap chung ah lungput lei rawhralnak, ttihphannak le nawl zulh duhlonak zong a karh i cu thil sining cu SAC nih thuhnawh an i zuam,” tiah CHRO thawngthanhnak ah an langhter.

“Abiana ah, Sep. 10 ah Lungler sakhaan CDF nih an doh lio ah khan Deputy Commander nih ralkap thazaang chap ding in nawl a pekmi hna cu Thantlang ralkap nih an zul lo. Asinain, Brig-Gen. Myo Htut Hlaing nih cunglei (NW Command HQ) ah lih in report a kuat,” tiah CHRO nih an langhter chap. SAC North Western Command Center (အနောက်မြောက်တိုင်းစစ်ဌာနချုပ်) ah Deputy Chief (luzik changtu) a simi Brig-Gen. Myo Htut Hlaing hi Rungtlang 266 ralhrang sakhaan ah a um lio a si. Credit; The Chin Journal