Mizoram, Serchhip Khua Pawng Ah Lainawngtu Pa Pakhat cu Palik Nih An Tlaih
============
May 16 zing ah Mizoram ramkulh, Serchhip Bukpui le Chhiahtlang chim veng karlak ah a ruakin hmuh mi Lalsangzuala(kum-31), Mission veng, Aizawl khuapi i khuasa mi thattu ah zumhmi pakhat cu Palik nih nizan May 17 ah an tlaih. Hi lainawnnak kongkau ah ṭuanvo latu ding i rian khinh mi Special Investigation Team(SIT) nih ṭha tein hlathlainak an tuah hnu ah lainawngtu ah ruah mi Laldinthara(kum-42), Khuaruhlian khua mi cu an tlaih.
Laldinthara cu Serchhip palik station ah ap a si. Hi kongkau ah hin midang tlai mi an um rih lo, tiah theih a si. Lainawngtu ah ruahmi Laldinthara nih cun May 16 zinglei ah khan Maxi cab(Sumo) in Aizawl lei a rak panh i Laldinthara a cawlcangning cu palik nih an lunghrinh caah an dawi i, Aizawl palik hna he an tlaih hnu ah lainawngtu a si kong zong amah tein aa phuang cang, tiah an chim.
May 16 zinglei ah khan Lalsangzuala cu Serchhip Bukpui le Chhiahtlang karlak lamthlang ah a ruak in hmuh a si i, a ruak an hmuhnak lampi ah thisen tam ngai zong hmuh a si. Lalsangzuala nih cun a fa sem kum tling lo pakhat le a nupi a kaltak hna, tiah Mizo thawngzamhtu hna nih an ṭial.
SAC Nih Nawlngeihnak Laak Hnu In $1 Bn Tluk Hriamnam A Cawk! SAC Ralkap nih Nawlngeihnak a laak 2021 February thla hnu in hriamnam $1 Billion(Nuai thongkhat tluk) a cawk cang, tiah UN in ṭuanvo ngeitu Tom Andrews nih a chim. SAC nih hriamnam tam cem a cawknak cu Russia, China le Singapore in an si, tiah UN Special Rapporteur on Human Rights in Myanmar, Tom Andrews nih cun New York khuapi i thawngthanhnak a tuah lio ah hi kong hi a chim.
A cung ram hna nih hin hriamnam pinah technology thilri le sehzung hman ding thilri dangdang hna zong an pek, tiah a langhter. “Ralkap cozah nih ramchung mipi cung ah thahnawnak a tuahnak tette cu fehternak tampi he hmuh a si ko nain pehzulh in hriamnam le hriamnam sernak ah hman ding thilri dangdang hna cu ramdang in a lut peng,” tiah Andrews nih cun a chim.
SAC ralkap nih cun raltuknak vanglawng(Jet fighter) le drone pin ah pehtlaihnak thilri(communications equipment) le thilri dangdang 12,500 leng ramdang in a laak, tiah fehter a si. UN le Human rights group hna nih cun, SAC cu duhlonak a langhtertu hna cung i a cawlcanghning kong ah fakpi in an mawhchiat i, SAC cawlcanghning cu “Minung hawi cung zawnruahnak ngei lo ruruhranghrang cawlcanghnak(War crimes le Crimes against Humanity)” a si tiah an mawhchiat.
UN Human Rights Council Geneva i report a peknak ah Andrews nih cun Pazigyi khua vanlawng kahdohnak kong zong a langhter. Pazigyi khua kahdohnak ah hin SAC ralkap nih Russian sermi Yak-130 vanlawng a hman i, Kg 250(550 Pounds) in a ritmi bomb cu sualnak ngei lo mipi 300 hrawng tonpumhnak hmun ah a thlak i, Minung 160 hrawng an rak thih pinah hliamtuar mi le aho si fianh khawh lomi ruak tampi hmuh a rak si.
Report i a langhning ah Russia nih $406 million man hriamnam a cawkter i, China le Singapore nih $254 million man veve an cawkter. Cupinah India le Thailand zong nih tlawmpal an cawkter ve i India nih $51 million le Thailand nih $28 million man hriamnam an cawkter, tiah a langhter. Credite; The Chin Post