Hmunkhat Ah Ral Dohṭi Ding In KIA Le TNLA Cu Hnatlaknak An Ngei
==========
Hmunkhat ah hramhram uknak a dongh tiang dohṭi ding in Kachin Independence Army(KIA) le Ta’ang National Liberation Army(TNLA) cu hnatlaknak an ngei. KIA Le TNLA cu May thla zarh hnihnak ah khan Kachin ram chung ah kaphnih in tonnak an ngei i, ceihmainak an ngeih hnu ah ral dohṭi ding i hnatlaknak an ngeih kong cu an thanh.
Kachin ram le Shan ramkulh ramri ah a cawlcang mi tlangcung hriamtlai hna kar i kahdohnak a chuah hnu ah KIA le TNLA cu atu bantuk in tonnak an ngei, tiah RFA nih a ṭial. A hlan lio i ṭangṭi phu hriamtlai sinak biahren cu kan tlaihtleng a si zungzal lai i, Kachin ram le Shan ramkulh chung ah a ummi hna himnak papek in rianṭuan ding le rithaisii dohnak zong kan ṭuanṭi lai, tiah kaphnih nih an langhter. SAC doh ding in a dormi PDF pawl cu KIA le TNLA nih an ramchung ah luhnak nawl an pek hna i, raltuk an chimh hna, tiah theih a si.
Pakokku Peng Tualchung Hriamtlai Phu Pahnih In Hruaitu Le Ralkap 7 Cu SAC Sin Ah An Zaam! Magway ramṭhen, Pakokku peng tualchung hriamtlai phu hnih chung in hruaitu le ralkap 7 hna cu May 25 ah an meithal le phaisa he SAC ralkap sin ah an zaam, tiah NUG runvennak zung kuttang Pakokku peng PDF nih May 26 ah cathanh an chuah.
Defense Team Pakokku hruaitu Aung Thu le a kuttang ralkap 3 cu meithal zun 2, phaisa kyats sing 400 le zen-kuan hna he SAC ralkap sinah an i ap. Defense Team Pakokku hruaitu Aung nih Earthquake Defense Force(EDF) ralkap pawl cu a lem ve hna i an hruaitu Ar Kar Soe Myint le a kuttang ralkap 3 zong meithal zun 2, kyats sing 2,000 tluk he SAC ralkap sinah an zaam ve, tiah RFA nih a ṭial.
SAC ralkap sin ah a zaam mi tualchung hriamtlai phu hnih hna nih hin mi thilri zong an rak chuh hna i mipi cung ah sualnak an rak tuah ruangah PDF chungtel sinak in chuah an rak si cang, tiah Pakokku PDF in ṭuanvo ngeitu nih a chim.
Pakokku PDF nih cathanh an chuah ning ah Defense Team Pakokku hruaitu Aung Thu nih SAC ralkap he aa pehtlaimi hna cu a tlaih hna i, tangka a rak hal tawn hna. Cu vialte thil a tuah i a ṭih ruangah SAC ralkap sin a luhnak hi a si, tiah an langhter.
Meithal le tangka he SAC ralkap sin i an luh caah dantatnak kan pek hna lai. Cu pinah Pakokku le Myaing peng um tualchung hriamtlai hna zong biatak tein i ralring ding in Pakokku PDF nih cun an thanh.
Ramkhel thongtla zohkhenhtu AAPP nih an langhter ning ah Magway ramṭhen chung peng 5 ah SAC nih Martial law an chuah hnu 2023 February thla chung ah tualchung mi 4 thah an tong i, 10 tlaih an si.
Kalaymyo Thlanglei Kahdohnak Ah SAC Ralkap 28 An Thi; Sagaing ramṭhen, Kalaymyo thlanglei ah SAC ralkap 80 leng nih, rallam an sial caah Kalay mizapi vengtu(Pah Kah Phah) le khuachung ah a cawlcang mi phu hna nih May 27 zinglei suimilam 5:40 ah bomb in an puahhnawh hna i SAC ralkap 28 an thih pinah tam ngai hliamhma an pu, tiah theih a si.
Cu hnu ah hliamhma pumi le a thimi SAC ralkap pawl cu Kalay lei ah an kirpi hna i, May 27 zinglei suimilam 11:59 ah a voihnihnak bomb in an puah ṭhan hna, tiah theih a si. Cu bomb puahhnawhnak hmun i SAC ralkap a thimi le aa hliammi cu an hawile nih an zaamtaak hna, tiah ralhmai kal pakhat nih a chim. SAC ralkap nih hliamhma pumi le a thimi ruak an thiar hna lio ah Mi35 Helicopter nih cunglei in a ven hna, tiah theih a si. Credite; The Chin Post