Sagaing Ramṭhen, Indaw Peng Kahdohnak Ah SAC Ralkap 15 An Thi
==============
Sagaing ramṭhen, Indaw peng Mawtaik hmunram, Wyatharyar khua pawng kahdohnak ah SAC ralkap 15 nak tlawm lo an thi, tiah ABSDF in ṭuanvo ngeitu Ko Saw nih a chim. May 23 zinglei ah Banmauk peng chung ah an hawile bawm ding in Nanthar khua in a kalmi Tatma 77, SAC ralkap 100 hrawng le Tatma 66 kyttang Khah Mah Yah 461 ralkap hna cu Wyatharyar khua pawng an phak ah ABSDF le PDF nih an kah hna, tiah theih a si.
“May 22 in kahdohnak a chuak i, May 23 ah hmaitonh in kan i kap. A thimi SAC ralkap ruak pawl cu Wyatharyar khua ah an kalpi hna. SAC ralkap a thimi an tam caah vanlawng bawmh an hal i, hriamngan zong in an kan kah,” tiah ABSDF in ṭuanvo ngeitu Ko Saw nih cun a chim.
Kahdohnak hmun ah SAC ralkap Fighter nih bomb voi 8 a thlak pinah Indaw khua um SAC ralkap zong nih hriamngan in kah an bawmh ve hna. Fighter in bomb an thlak ruangah Wyatharyar khua phungki sianginn zong a rawk. Indaw PDF Battalion 2 in ralkap 2 hliamhma an pu ve, tiah theih a si.
US Le Papua New Guinea Nih Runvennak Lei Ah Rianṭuanṭi Ding In Hnatlaknak An Ngei; US cozah nih South Pacific ram 15 aiawh hruaitu hna tonnak a ngeih hlan ah South Pacific ram chungtel a si mi Papua New Guinea defence minister cu tonnak a ngeih i, runvennak lei ah rianṭuanṭi ding in hnatlaknak a ngeihpi. Hi hnatlaknak catlap ah hin US Secretary of State Antony Blinken le Papua New Guinea defence minister hna nih min an thut.
Ram pahnih hna nih hnatlaknak an ngeih ning ah cun US nih Papua New Guinea ramchung i vanlawng tual hna le lawng ngan dinhnak vialte cu a hman khawh lai i Papua New Guinea cu US nih bawmhnak tampi a pek ve lai. Nichuahlei ram lak i a ṭhawng ngai mi China nih ram a kauh chim chin lengmang lio ah South Pacific ram a simi he hi bantuk hnatlaknak an ngeih khawh mi hi US ca ah cun a biapi ngai mi a si.
BungKhua IDPs Camp Ah A Ummi Hna Cu Ei Le Din An Harsa; Thantlang peng Bungkhua IDPs Camp ah a ummi hna cu ei le din an har ngaingai i chiti le cite cawk nak hmanh an ngei ti lo tiah theih a si.
March 24, 2023 ah a hnubik bawmhnak an hmuh a si i cu hnuin atu tiang bawmhnak an hmuh ti lo. Hi hlan ah cun minung pakhat ah MMK 30,000 an bawmh tawn hna nain cu bawmhnak cu an pe ti hna lo!
“May 7 ah pastor cheukhat le NGO riantuantu nih an kan veh i Camp a ummi nih kan harsatnak kan chimhruah ko hna nain atu tiang an kanbawm hlei lo, kan hlathlai tikah camp dang cu an bawmh ko hna ti kan theih i kan lung a nuam lo ngai” tiah Bungkhua IDPs camp ummi pakhat nih The Chin Post ah a chim.
Bungkhua IDPs camp a ummi hna cu ni camp lengah ni 15 cung nan um ahcun bawmhnak kan in pe hna lai lo an ti hna i bawmhnak an hmuhmi cu an i zat lo tikah Mizoram le hmundang ah riantuan in tangka aa hlawhmi, damlo ruangah sii-inn a kalmi le sianginn a kaimi hna cu camp ah an um lonak ni 15 cung a si ahcun bawmhnak an pe hna lo tiah theih a si.
“Bungkhua IDPs camp a ummi hna zohkhenhnak le bawmhnak kongah tuanvo ngeitu upa hna nih kan harsatnak hi kan theihthiam piak in khua kan khan piak zau hna sehlaw kan duh ko” tiah camp ah a um ve mi pakhat nih The Chin Post ah a chim.
Bungkhua IDPs camp ah minung 485 an um tiah theih a si. Credite; The Chin Post