Yinmarbin Peng Bomb Puahhnawhnak Ah SAC Ralkap15 An Thi
===========
Sagaing ramṭhen, Yinmarbin peng, Banbuai khua pawng ah rallam a sialmi SAC ralkap cu bomb in kan puahhnawh hna i ralkap 15 an thi, tiah Chindwin Tiger phu in ṭuanvo ngeitu pakhat nih a chim.
May 25 zing suimilam 8:00 hrawng ah Kani peng, Alaykyun khua in rallam a sialmi SAC ralkap 200 hrawng cu Banbuai khua pawng ah bomb lung 3 in kan puahhnawh hna i pyusawhti 5 an thi. Cu pinah banbuai khua in a chuakmi SAC ralkap le pyusawhti cu Banbuai khua pawng ah bomb lung 12 in kan puahhnawh ṭhan hna i 10 nak tlawm lo an thi, tiah an langter.
“Kan i timh ning ahcun bomb lung 60 tluk in puahhnawh kan timh hna nain ruah a sur caah bomb chungah ti a lutmi an um i an puak kho lo,” tiah Chindwin Tiger phu in ṭuanvo ngeitu nih cun a chim.
SAC ralkap le pyusawhti a thimi hna cu May 25 zanlei suimilam 3:30 hrawng ah Banbuai khua thlanhmun ah an vui hna. Cu kahdohnak ah cun Chindwin Tiger, Union Liberation Front le Bo Shanshia phu hna i bawm in an kah hna, tiah theih a si.
Kalaymyo Ah Ngunkhuai A Pe Lomi Poh Dantat An Si Cang Lai Tiah Kalay Mipi Vengtu Phu Nih An Thanh; Sagaing ramṭhen, Kalay peng chung ah ngunkhuai pe loin rian a ṭuanmi hna cu dantatnak kan pek cang hna lai, tiah Kalay peng mipi vengtu phu nih cathanh an chuah.
Ngunkhuai a pe lomi hna thilri vialte cu kan ukpen mi hmun le kanmah he ṭangṭi phu a simi hmunram chung ah luhchuahter lo ding le cawk zuar khawh a si lai lo, tiah an langhter. Kalay khuapi chungah rian a ṭuan i, ngunkhuai a pe lomi poh cu dan kan tat cang hna lai. Rian tlaitu hna nih ngunkhuai an pek lawng ah rian an ṭuan kho cang lai, tiah Kalay peng thlanglei mipi vengtu in ṭuanvo ngeitu nih a chim.
Ngunkhuai a pemi rian tlaitu an um bantukin ngunkhuai a pe duh lomi zong an um ve. Cu ruangah ngunkhuai a pe duh lomi hna cu dan kan tat cang hna lai, tiah an langhter. Rian tlaitu hna nih ngunkhuai an pek dingmi chung ah SAC nih an chuahmi thilri cu an i tel lo, tiah Kalay peng mipi vengtu(Pah Kah Phah) nih an langhter.
Magway Ramṭhen, Yesagyo Kahdohnak Ah SAC Ralkap 10 An Thi; May 24 zinglei ah bomb chekhlatnak tuah ding in a kalmi PDF ralkap 2 cu SAC ralkap nih an tlaih hna caah PDF nih va chanh ding in an kalhnawh hna i Yesagyo ah kahdohnak a chuak, tiah theih a si.
Yesagyo peng ah bomb chekhlatnak va tuah ding in a kalmi Myingyan Black Tiger (MBT) No. 2 in ralkap pahnih cu SAC ralkap he an i ton sual caah SAC ralkap nih an tlaih hna i, PDF ralkap pakhat cu a zaam.
SAC ralkap nih PDF ralkap pakhat cu a phei ah meithal kuan in an hliamh i a zaam khawh ti lo ruangah headquarter i a ummi PDF ralkap tam nawn nih an va kalhnawh, tiah Myingyan Black Tiger (MBT) hruaitu Bo Meik Khe nih cun a chim. Cu kahdohnak ah cun SAC ralkap 10 an thi i, hliamhma he tlaih a tongmi PDF ralkap pa tu cu an chanh kho lo, tiah theih a si. Credite; The Chin Post