KNU Brigade 6 Hmunhma May Thlachung Ah Kahdohnak Voi 30 Leng A Chuak, SAC Ralkap 46 An Thi
======
KNU Brigade 6 hmunhma May thla chung ah kahdohnak voi 31 a chuak tiah KNU nih a thanh. KNLA, KNDO phufonh hna le SAC ralkap karlak May thla chung kahdohnak ah SAC lei 46 an thi i 40 an i hliam tiah an langhter. SAC chungtel 3 zong a nung in an tlaih hna tiah theih a si.
May thla chung kahdohnak ah KNLA phufonh lei in 1 a nunnak a liam i 5 hliam an tuar tiah an thanh. SAC ralkap nih May thlachung Dupala pengkomh ah vanlei kahdohnak voi 5 a tuah i hriamngan voi 102 an thlah tiah theih a si.
SAC ralkap hriamngan ruang le kahdohnak ruang ah Dupala pengkomh chung mipi 3 an thi i hngakchia 1 telh in minung 17 an i hliam tiah theih a si. Dupala pengkomh chung ah ralzaam 22,000 leng an um i fur caan a phanh cang lai caah eidin le ngandamnak lei sii hna an herh ko tiah theihternak an tuah.
Kawkareik Khua SAC Ralkap Sakhaan Kahdohnak Ah 8 Leng An Thi Karen ram, KNU brigade 6 hmunhma, Tamaingkone Khuate ah a um mi SAC ralkap Yekukan sakhaan cu June 21 chun sml 11:00am hrawng ah KNU/KNLA B18, Naga phyu phu, Kya phu le Kyathitnat phu nih an kah hna tiah theih a si.
Yekukan sakhaan hi SAC ralkap nih hramhram in uknak an lak hnu ah hmunhma an khuarnak sakhaan a si. “Kanmah lei nih kahdohnak a ni phak hlan ah Sniper in ṭha tein kan bih hmasa hna, Drone in bom kan thlak hna, Drone 1 zong kan sung, 21 ah timhtuahnak ṭha te ngei in kan doh ṭhan hna. Anmah lei 8 leng an thi i kanmah lei 1 a nunnak a liam ve” tiah Naga phyu phu biachimnak nawl a ngeitu Ko Bo Min nih a chim.
Kahdohnak chung ah SAC ralkap a thi mi le hliam a tuar mi an tam caah kahdohnak vanlawng hmang in voi 3 tiah bom a rak thlak i Kawkareik hrambunh Infantry 97 zong nih hriamngan khuate lei ah a kah tiah theih a si. Crd; The Chinland Post