Myanmar rammi nih UN Security Council sin in zeidah kan i ruahchan khawh lai tiah UN palai nih biahalnak a tuah
=============
Myanmar rammi hna nih UN Security Council sin in zeidah kan i ruahchan khawh lai tiah Myanmar UN Palai U Kyaw Moe Tun nih biahalnak a tuah. Caan sau daihnak a um khawh nakding kongkau tlangtaar in May 3, New York khualipi ah tuah mi UN Security Council meeting ah U Kyaw Moe Tun nih biachimnak a ngei i cu lio ahcun biahalnak a tuah mi a si.
Myanmar ralkap nih uknak hramhram in an lak hnu thla 27 chung ah ralkap council nih rammi a thah nawn mi hna kong he pehtlai in cathanh pasarih, UN Security Council Lutlai ca thanh pakhat le Myanmar ram tuanbia ah a voi khatnak biakhiahnak ngeih a si nain cu vialte cu ralkap council nih a zul lo, tiah U Kyaw Moe Tun nih a chim.
Uknak chuttu ralkap nih thazaang hmang in thilsual tuahnak ngol ding, mizapi nih thim mi hruaitu pawl thlah than ding, ASEAN hnatlaknak pawl tuanchuah ding tibantuk UN Security Council nih a fial mi pawl atu tiang a zul lo tiah a chim. Ralkap nih rammi cung ah thahnawnnak a tuah mi hna hi UN Security Council nih hmual ngei tein dantatnak tuah caan a cu cang ti zong U Kyaw Moe Tun nih a chim. Uknak chuttu ralkap council nih uknak a laak chung ah sualnak ngei lo rammi 3400 a thah cang hna i, a bu in thahnawnnak voi 66 a tuah cang.
Pohmahh 505 (a) in thong a tla mi 2000 leng ka chuah hna tiah SAC nih a thanh; Upadi phungrelnak 505 (a) in thong a tla mi thongtla 2153 cu nihin May 3 ah chuahnak nawl ka pek hna tiah Ralhraang Council nih a thanh. ‘Hi bantuk sualnak a tuah than mi cu a tuah mi sual man le tu tan i thong tlak ding a taang mi he fonh in thlak than an si lai timi rikhiah he chuah an si’ tiah SAC cathanh nih a langhter.
“Uknak tha lo kan duh lo ti cu vawlei cung mi nih kan ngeih cio mi nuhrin covo a si. Cu bantuk duhlonak a langhtertu hna kha Uknak hramhram in a latu nih a hrem hna, thong a thlak hna. Tu tan ah ka chuah than hna a ti mi ahhin thongtla hna caah kan i lawm nain, amah SAC cung ah cun lawmh awk zei hmanh a um lo” tiah min langhter lo mi ramkheel lei upa pakhat nih THP ah a chim. SAC nih tu tan thongtla a chuah mi hna hi Tuluk ram in a ra mi ram dang lei minister Nay Pyi Taw a phanh lio a si i, Tuluk sin in mithmai tha hmuh duh ah thongtla a chuah mi a si lai ti zong a chim.
April thla chung ah SAC nih nu 55 a thah hna; SAC ralhraang council nih April thla chung ah nu 55 a thah hna i, 43 a tlaih hna tiah Burmese Women’s Union nih thawng a thanh. Cu cazin cu April 1 in 28 tiang a cang mi chung in a si i, Pazigyi khua SAC vanlawng nih bomb a thlak voi khat hmanh ah nu 45 an rak thi.
Ralhraang Council nih 2021 February 1 in 2023 April 28 tiang ah nu 3390 hramhram in a tlaih hna. Uknak chuh kum hnih leng chung ah SAC nih nu 513 a thah hna i, nu 819 cu hramhram in thong a thlak hna tiah an langhter. Ralhraang Council nih a tlaih mi hna lak ah a tam u cu Mandalay ramthen, Yangon ramthen, Mon ramkulh, Bago ramthen, Shan ramkulh le Chin ramkulh in an si i, Sagaing ramthen ah nu tam bik a tlaih hna tiah an tial.Cu cazin pawl cu Ramkheel Thongtla Bawmchantu phu (AAPP) le Burmese Women’s Union nih an khawmh mi an si i, a taktak ah hi cazin nakin an tam deuh kho ti zong an langhter. Credite; The Hakha Post.