Kachin Ah Bank A Hngaktu SAC Ralhrang Anmah Le Anmah Kar Kahthahnak A Chuak
=========
Kachin ramkulh, Bha-mo khuapi um SAC ralhrang ta a simi Inn-wa Bank a hngaktu SAC ralhrang anmah le anmah biaalnak in i velhnak tiang a chuak. Cu hnu ah meithal kahnak tiang a chuak i SAC ralhrang pakhat a thi, tiah tualchungmi pakhat nih a chim.
May 18, chun ah SAC ralhrang kuttang Bank hngaktu SAC ralhrang 2 an i sikvelhnak in meithal kahnak tiang a chuak i SAC pakhat a paw ah a khen caah a thi. A ruak cu mizaw phurhnak motor in an kalpi i mipi nih mah kong hi thei hna hlahseh tiin SAC ralhrang pawl nih kham an i zuam cuahmah, tiah theih a si.
“Inn-wa Bank hi SAC ralhrang nih an ngeihmi a si i, a hngaktu an chiahmi hna SAC 2 hna cu anmah le anmah i sikvelhnak in meithal kahnak tiang a chuak. SAC ralhrang pakhat cu a paw ah kua lak in kuan nih a khen caah a thi colh, SAC nih mahkong hi mipi nih theih an duh lo caah mizei Media hmanh nih an ṭial ngam rih lo” tiah min langhter a duh lomi tualchungmi pakhat nih Khit Thit ah a chim.
Thlichia Ruang Ah Harnak A Tongmi Matupi Peng Mipi Hna Cu SAC Ralhrang Nih Bawmhnak An Pek Hna; Chin ramkulh chung ah Mokha thlichia ruang ah harnak a tongmi Patupi khuapi le Lailenpi khuapi ah inn a rawkmi mipi hna cu SAC ralhrang nih Matupi khuapi um Hall ah an ton hna i bawmhnak an pek hna, tiah theih a si.
“Chin ramkulh, Matupi khuapi le Lailenpi khuapi hna cu Mokha thlichia ruang ah harnak a tongmi hna inn chungkhar 170 caah ei-din le thilri pawl an pek hna” tiah tualchungmi pakhat nih The Matupi Times ah a chim.
Hi tonpumhnak cu SAC lei in Chin ramkulh lutlaitu vanci Dr. Vung Suan Thang le runvennak lei ah ṭuanvo ngeitu Second General Yat Za Kyaw hna telh in SAC ralhrang bawizik hna nih tuahpi in bawmhnak an pek hna hi a si, tiah kan theih.
Mizoram Saiha khua ah ralzaam sianginn honnak an tuah; Mizoram, Saiha khua ah aa dor mi ralzaam ngakchia hna ca ah Myanmar Refugee Committee, Siaha (MRCS) nih nihin May 19 ah Refugee School (Siaha) ti mi min bunh in sianginn honnak an tuah. Sianginn honnak cu Saiha khua, Colony sang YMA Hall ah zanlei suimilaam 3:00 in 5:00 tiang tuah a si i tawlreltu committee chungtel hna, siangngakchia hna le nulepa minung 250 leng an i tel kho.
“Ralzaam cu kan ram a that than tikah a kir than ding kan si. Kan fale nih kan ram kan kir than tik ah an kum rup in sianginn an peh than khawh nakding le, hika ah Myanmar ram ca cawn ning in an cawn khawh nakding ah hi sianginn hi MRCS nih a tawlrel mi a si,” tiah Sianginn Principal Dr. Peng Hmung Ling nih a chim. Sianginn honnak ah MP Pi Ni Sui Lian nih pangpar hri a tan. MP Pi Ni Sui Lian, MRCS Chairman Dr. Khaivatha, Principal Dr. Peng Hmung Ling hna nih biachimnak an ngei i Pastor Ngun Thawng Lian nih Pathian bia in forhfialnak le thacamnak a ngei.
Sianginn cu NUG Cozah nih cohlan mi a si i New Saiha, Vety Kawn ah a um mi Little Diamond Sianginn ah a si lai. Kai ding in min a pe cang mi siangngakchia minung 192 an si i May 22 in kai hram thawk a si lai. NUG nih a khiah mi cacawn ning in cawn a si lai i taang cheu in taang 10 tiang cawn a si lai tiah tuanvo ngeitu hna sin in theih a si.
“Ca cawn nakding sianginn khaan pawl cu Little Diamond Private School nih a kan hlanh mi a si. Anmah sianginn an tum hnu, zanlei suimilaam 3:00 hnu in ralzaam sianginn kai a si lai i period pathum cawn a si lai. Zarhte ni ah cun chun nitlak cawn a si lai,” tiah tuanvo ngeitu nih a chim.
Cu sianginn ah cun man pek hau lo in cawn a si lai i cawnpiaktu ding hna cu CDM a tuah mi siang cachim pawl an si. Saya/sayamah te thlahlawh le sianginn ca a dih ding mi tangka cu IRCC riantuannak in Carson Chin Baptist Church, Milwaukee, USA nih a bawmh hna lai tiah kan theih.
Mizoram chung ah ralzaam tam bik an i dornak cu Saiha district a si i Myanmar ralzaam thong hra hrawng an i dor lai tiah ruahdamh a si. Saiha khua chung ah ralzaam chungkhar 350 hrawng an um tiah kan theih.
Credite; Lungmili Post