KNU Brigade 5 Hmunram Kahdohnak Ah SAC Ralhrang 26 An Thi; KNLA Ralkap 2 An Nunnak Liam
=========
May 1 in 15 tiang Karen ramkulh KNU Brigade 5 Hmunram chung kahdohnak ah SAC ralhrang 26 an thi i KNLA ralkap in minung 2 an nunnak a liam ve tiah KNU he neihniam thawngzamh pakhat nih a langh ter.
Ni 15 chung kahdohnak ah KNU Brigade 5 hmunram tang um KNLA ralkap hna le SAC ralhrang kar kahdohnak cu voi 63 a chuak i hi kahdohnak ah ralhrang lei 26 an thi i 10 hliamhma an tuar, ralhrang a thi mi chungah Sergeant pakhat telh in an hrauitu 2 zong an i tel. Riahcaw phur motor 2 zong an hrawh piak hna. SAC ralhrang a thi mi an tam bantuk in KNLA ralkap in minung 2 zong an nunnak a liam. Ralhrang hriamngan kahnak in mipi lei minung pakhat hliam a tuar tiah kan theih.
Yagon Ah Mino Pa Pakhat Tlanglawng Pahnak In An Nunnak Liam; May 17 zinglei ah Yangon peng Pazuntaung khua tlanglawng dinhnak pawngah pa pakhat cu tlanglawng nih a pah caah a nunnak a liam tiah kan theih. A thi mi pa hi kum 18 mi a si i Pazundaung le Ma-hlua khua kar ah a pah hi a si. A ruak cu mibawmchan tu hna nih an lak i Yangon khua siizung ah an kal pi tiah kan theih.
Karenni Ramkulh Ah SAC Ralhrang Nih Jet Vanlawng In Bomb A Thlak, Kum 17 Nu Pakhat A Nunnak Liam; Karenni ramkulh, Baw-la-khe peng, Sawlon khua cu SAC ralhrang nih tuzing ah jet vanlawng in bomb a thlak caah kum 17 nu pakhat a nunnak a liam khuami hna sii peknak inn telh in mipi inn 8 a rawk, tiah theih a si.
“May 17, zinglei suimilam 4:00 tluk ah SAC ralhrang nih jet vanlawng in bomb a thlak caah nu ngakchia pakhat a nunnak a liam i kum upa pa 4 nih hliamhma an tuar. Sii peknak inn (Building) 2 telh in mipi inn 8 a rawk. Cu pinah phungki sianginn zong tlawmpal a rawk i mipi hliamhma faak lo a tuarmi zong an um” tiah Bawlakhe PDF in ṭuanvo ngeitu pakhat nih a chim.
Bawlakhe pengkomh cung ah SAC ralhrang nih mipi hna umnak inn bomb a thlak hi a voi 3 naak a si cang i mipi hna nih cunglei kahdohnak kong ah ralrin a herhnak, tiah Bawlakhe PDF in ṭuanvo ngeitu pakhat nih Khit Thit ah a chim.
Paungde Peng Ah Tithan A Kal Mi SAC Ralhrang Bomb Puahhnawhnak In 3 An Thi; 2 Hliam Tuar; Bago ramthen Paungde peng, Tein-kon khua pawngah ti than ah a kal mi SAC ralhrang hna cu PPDF nih Bomb an puah hnawh hna caah ralhrang 3 an thi i 2 hliam an tuar tiah tuanvo ngeitu pakhat nih a chim.
May 15 zanlei suimilam 4 tluk ah Tein-kon khua phungki sianginn ah umhmunkhuar mi SAC ralhrang 5 hna cu ti than ding an kal lio ah Bom puahhnawh an ton hi a si. “Paungde khua ah rallam sial in umhmun an kuarnak an sau ngai cang, an kir pah an ra pah tiin an um tawn.” tiah Bago ramthen PDF tuanvo ngeitu pakhat nih a chim.
Bomb puahhnawh nak in ralhrang 3 an thih caah hriamngan zong an duhpoh in a tu le tu an kah, a thi mi 3 hna cu umhmun an khuarnak lei ah an kal pi hna. “Aluan cia May 13 lio zongah rallamsial mi SAC ralhrang hna le PDF kar ah kahdohnak a chuak i ralhrang 2 an thih pin ah 5 hliam an tuar” tiah Bago Region PDF nih an langhter. Credite; Lungmili Post