Hakha Peng ah kahdohnak chuak, SAC lei thi an tam
===============
Gangaw lei in a rak kai mi Tatmah 77 hna a dongtu Hakha hrambunh 266 ralkap le Chin ralkap CNA, CDFs hna karlak ah nihin May 13 ah kahdohnak a chuak i SAC ralkap a thi mi an tam tiah theih a si.
Ralhmai suang pakhat nih, “Chun ahkhan sau ngai kan i kap. Kanmah lei cu kan him. Hliamtuar zong kan um lo,” tiah The Chin Post ah a chim. Tatmah 77 ralkap pawl hi a dongtu 266 ralkap hna he Sakta le Zokhua kar tlangbo ah an i tong kho cang tiah khuami sin in kan theih. Khuami pakhat nih, “A langtlang in kan cuanh hna i anmah cu kan hmu lo nain an i kah caan a sau. Meithal le bomb puah thawng a dai lo,” tiah a chim ve!
Hakha Rungtlang Tang Ummi Tam Deuh Cu Ṭhialter An Si; Tulio Myanmar ramchung a cul cuahmahtu Mocha Cyclone thlichia ruang ah Hakha khuapi Rungtlang tang ummi a tam deuh cu a hlankan in timhlamhnak ca ah thialter dih an si cang, tiah theih a si. Mocha thlichia hi suimilam pakhat chung ah meng 100 in meng 110 tiang a hrang kho mi a si. Hi thlichia hi Chinram chung ah thaizing May 14 ah a phan khomi a si tiah khuacaan zohthiam hna nih ralrinnak cathanh an chuah.
Hakha khuachung um mipi cheukhat ṭhialter a tongmi hna kong he pehtlai in, “Rungtlang tang a ummi deuh hi cu ṭhialter an si. Sang linga cu kan i ṭhial cang hna. A tam deuh cu mahle biakinn a si lo ah Carson Hall lei ahkhin i ṭhial a si,” tiah khuami pakhat nih a chim. Atu ah aa ṭhial cang mi hi cu Dawrhlun le dawrthar an si i SAC nih Gangaw lei um zong an thialter cuahmah hna tiah theih a si.
“Gangaw lei hi aa ṭhial duh lo kan um pah. Hi bantuk kan um ca ah aa ṭhial lomi cu nan inn tawh kan hrenh lai an ti hna,” tiah a Hakha ummi pakhat nih cun a chim. Cun, Hakha Township Public Health Care & IDPs Management Committee zong nih, “Thlichia nih a kan phak sual a si ahcun mahle inn pawng cio luti hor luannak sialpiak ding. Electric mei a rawh khawh ca ah electric he aa pehtlai mi poh i ralrin ding, khual tlawn lo ding, inn feh nakding ca ah mah tein tawlrel cio ding,” tiah cathanh an chuah.
Cyclone Ruangah Rakhine Ramkulh Chung Khualtlawng Ding Vialte Kham Chung An Si; Rakhine ramkulh khualtlawngmi motor hna cu Mocha Cyclone ruang ah May 13 thawk in dinhter chung an si i ti lam le vanlawng in khualtlawng ding mi hna zong dinhter chung an si, tiah theih a si.
Hmundang in Rakhine ramkulh chung i a lutmi cu kham an si cang nain, Rakhine ramkulh chung ah cun umhmun ṭhialkam ah nihin May 13 tiang khualtlawng an um rih. Sittwe peng in hmun dang ah a kalmi motor cu an kham rih lo, tiah Sittwe um mi pakhat nih a chim.
Yangon in Sittwe a zuangmi vanlawng cu thlichia ruang ah ni li chung phihkham a si, tiah vanlawng ticket a zuartu agent pakhat nih RFA ah a chim. Cun pin ah Yangon in Sittwe a kalmi khualtlawng motor hna cu nicaan rikhiah um lo in an phih, tiah khualtlawng motor khaltu pakhat nih a chim. Rakhine ramkulh chung i ti lam khualtlawnnak vialte zong thlichia ruangah kham dih an si, tiah tualchung mi hna nih an chim. Credite; The Chin Post