Kan Kawlram Chung Thawngpang Chia Fonh!
==================
Mon ramkulh, Ye peng Thanphyuzayet peng Kyiaphyu Column 2, Company 1 sakhan cu Fighter nih bomb a thlak ruangah PDF ralkap nu 1 le ralkap pa 2 an nunnak a liam, tiah Kyiaphyu Company 1 nih an langhter. “May 7 zan suimilam 11:00 hrawngah Fighter nih pound 500 a ritmi bomb lung 2 in kan sakhan a thlak i kan ralkap 3 an nunnak a liam. SAC ralkap sinah thawng petu an um caah bomb an kan thlak hi a si.
A kan liamtakmi kan ralkap 3 hna ca ah teirul kan cham lai,” tiah Kyiaphyu Company 1 in ṭuanvo ngeitu nih a chim.
SAC ralkap Fighter nih May 7 zanlei le May 8 chun suimilam 12:00 hrawngah Kyiaphyu Company 1 sakhan ah bomb an thlak caah sakhan chung ummi thilri vialte zong an rawk dih, tiah theih a si. Kyiaphyu Company 1 cu NUG runvennak zung kuttang ah a ummi hriamtlai phu an si ve, tiah theih a si. Fighter nih bomb thlak ruangah ralkap 4 hliamhma an pu nain an nunnak ca ah phan awk a um lo, tiah theih a si.
Sagaing ramṭhen, Kalaymoy peng, Layeinsu (လေးအိမ်စု) khua pawng ah SAC ralhrang nih May 9, zanlei suimilam 3:30 hrawng ah raltuknak helicopter in bomb 3 a thlak, tiah theih a si. Tualchungmi pakhat nih “Raltuknak helicopter pakhat niamte in a rak zuang i, Shartaw (ရှားတော) khua lei voi 2 tiang aa hel. Cu hnu ah a voi 2 naak a rak zuang ṭhan i, Layeinsu khua nichuah lei Lo ah bomb lung 3 a thlak, hliam a tuarmi le thilri rawkmi kong ah zeihmanh kan thei rih lo” tiah a chim.
Sagaing ramṭhen, Indaw khua nitlaklei ah a ummi Inpin le Nanthar khua karlak hlei chak ah SAC ralkap nih umhmun an khuar ruangah khuate 5 in ralhrial mi 7,000 leng cu khua ah an kir ngam rih lo, tiah theih a si. Inpin khua hlei chak ah SAC ralkap nih umhmun an khuar ruangah PDF he zeitik caan poh aa kap khomi a si caah khuate 5 in khuami 7,000 leng cu a luancia April thla thawk ah khan ral an rak hrial.
“Indaw Revolution – IR le a dang mi bawmchantu phu hna i bawm in ralhial mi hna cu kan zohkhenh hna i, eidin facang zong kan bawmh hna. Cheukhat nih puan le a dangdang an bawmh ve hna,” tiah Indaw Revolution – IR in ṭuanvo ngeitu nih a chim. “Ṭhal khuapau caan ah cinthlakmi mi-pe hna phoi an za cang nain khuami cu an khua ah an kir ngam lo. SAC ralkap nih rammi sinak NRC i put in le minsen thut in mi-pe cu rak phoi cang ko u an ti hna nain khuami nih an ngamh lo,” tiah tualchung mi pakhat nih a chim.
Cu kong he pehtlai in Sagaing ramṭhen in chimphuannak nawl ngeitu SAC kuttang Aye Hlaing cu RFA nih phone in an pehtlaih ko nain a cohlang lo, tiah theih a si. Myanmar ramchung ah inn le lo a chuahtakmi minung sing 18 leng an phan cang, tiah United Nations Office for the Coordination of Humanitarian Affairs(UNOCHA) nih May 6 ah khan an rak langhter.
Sagaing ramṭhen, Tamu peng, Khampat khuapi ah riatnak siivai bingrang a zuartu minung 5 hna cu May 7 ah CNO/CNDF, mipi palik hna nih an tlaih hna, tiah theih a si. Tlaihkhih a simi ritnak siivai bingrang cu 150 Gram a rit i, tangka in sing 30 man a si, tiah Zalen nih a langhter. Tlaihkhih a tongmi hna cu upadi ning in dantat an si lai, tiah an langhter chih.
Kachin ramkulh, Myitkyina peng Lah-myaing khua ah May 9 zinglei ah a fapa cu tikhur chung ah a tla i a pa nih a va chanhnak ah an pahnih in an nunnak a liam tiah mibawmchan tu tuanvo ngei pakhat nih a chim. ” Zing suimilam 11 tluk ah thil a can hi a si, an tlak nak suimilam cheu hnu ah an nau nu pakhat nih zung ah phone an kan chawnh, kan va chanh hna tikah cun an nunnak a liam cang.
Tikhur ti a um lo caah an ti kan tuah lai an ti nak a fa cu a tla i a pa nih a va chanh nak ah an pa hnih in an nunnak a liam. An tlak nak tikhur hi pe 40 in 60 kar tluk a thuk mi a si” tiah a cunglei upa nih a chim. A thi mi pafa hna hi a pa kum 40 leng le a fa pa kum 20 tluk an si. An ruak cu chungkhar duh ning tein an inn ah chiah an si.
Rakhine ramkulh, Paukdaw peng Ngabi tikulh hruang ummi minung 300 leng cu Kyingkhuaimaw khua ah thlichia le tilet a chuak kho mi hrial ding in an i ṭhial, tiah theih a si. Ngabi tikulh cu Sittwe khua le Paukdaw peng karah a ummi a si i Kaladan tiva ah a ummi tikulh a si. SAC kuttang khua caan tahnak zung nih May 10 in 18 tiang Bangladesh rili lei in thlichia le tilet a tho kho i cu nih cun Rakhine ramkulh zong a hnorsuan khawh, tiah cathanh an chuah.
Thilchia le tilet a tho khomi a si ruangah a hlankan in timhtuahnak ngeih cio dingin Rakhine rammi hna cu AA nih ralrin an pek hna, tiah theih a si. Thlichia thawh lai nak kong he pehtlai in Chin ramkulh khuapi Hakha Khrihfabu Biakinn cheukhat zong ah mizapi ralring tein um cio dingin thawng an thanh, tiah theih a si.