Sagaing Le Shwebo Ah Tualchung Mi 6 Thah An Tong
=============
Sagaing ramṭhen, Sagaing peng, Kyikone khua mi pakhat cu SAC ralkap nih an thah pin ah, Shwebo peng, Minpyia khua zong ah tualchung mi 5 ruak kan hmuh, tiah tualchung mi nih RFA ah an chim. June 17, zinglei ah Sagaing peng, Kyikone khua cu SAC ralkap thazaang 80 hrawng nih an luhhnawh i cu lio ah khua mi Ko San Win Aung(kum 50) cu an thah hnu ah a ruak cu mei an khangh, tiah min langhter a duh lo mi pakhat nih RFA ah a chim.
June 17 ni ṭhiamṭhiam ah Shwebo peng, Kinpyia khua ah meithal kahnak in a thi mi ruak 5 kan hmuh, tiah tualchung mi nih an chim. SAC ralkap hna cu a luancia June 15 ah Kinpyia khua ah an lut i zaan hnih an riak, an chuah hnu ah atu bantuk in khua mi hna ruak hi kan hmuh, tiah Shwebo khua mi pakhat nih cun a chim.
Ramkhel lei thongtla zohkhenhtu AAPP nih 2023, June 16 tiang cazin a langhter ning ah SAC nih uknak a lak thawk in nunnak liam mi tualchung mi hi 3,663 an si cang, tiah a langhter. Sagaing ramthen Kalaywa peng ah hmunkhat ah rallam a sialmi SAC ralkap le palik hna cu mipi vengtu ralkap nih an kah hna i SAC ralkap/palik 41 an thi i 40 renglo an tlau tiah NUG nih an thanh.
June 16 zinglei suimilam 8 hrawngah Taungoo hrambunh No.11 palik sakhan in palik mawtaw 4 le SAC ralkap le palik 158 hna cu hmunhma an i thial i Kalaywa peng Sakhangyi khua pawng an phak ah mipi vengtu ralkap hna nih an kah hna hi a si. Hriamnam tam ngai zong an lak khawh tiah theih a si.
SAC ralkap le palik nih an i citmi Faw mawtaw 2 cu mei in an khangh. MA-11 pahnih, G-3 pahnih, MA-11 kuanbawm pathum, G-3 kuanbawm paruk, MG-3 pakhat, MA-7 60MM miakpi pakhat, 60MM kuanpi hna, RPG kuanpi pa-nga, kutcheh bomb pa-nga, 38 Webly Wesson meithal ngan pakhat, Jammer pakhat, M-14 bomb pahnih, kuangfang le a dangdang hna zong an lak khawh tiah NUG nih an thanh.
Sagaing ramṭhen, Kanbalu peng, Laikhto khuakomh, Inkyinsu khua ah SAC ralkap kuttang um Watawa hruai mi hriamtlai phu nih khuachung mino hna cu hramhram in pyusawhti ah an luhter hna, tiah tualchung mi nih Khit Thit Media ah an chim. SAC ralkap kuttang um Watawa hruai mi pyituhsit phu nih Kanbalu peng,
Inkyinsu khua cu pyusawhti khua ah canter ding in timhtuahnak an ngei. Khuachung ah inn hra uktu 23 an um i minung pakhat nih pyusawhti chungtel pakhat cio sawm ding in rian an khinh hna caah pyusawhti lut ding in cazin laknak le thimfung zuhnak an tuahter hna.
Pyusawhti lut ding in thim mi hna nih pyusawhti luh an duh lo a si ahcun Ks. sing 10 an liam lai, tiah SAC ralkap kuttang um hriamtlai phu hna nih an ti hna. SAC ralkap kuttang um pyituhsit phu hruaitu Watawa cu phungki thuam i hruk in SAC ralkap caah rianṭuan mi a si i, Kanbalu, Kyunhla le Taze pengchung ah biatak tein a cawlcang, tiah Khit Thit Media nih a ṭial.