Thawngpang Chia Fonh!
========================
Sagaing ramṭhen, Monywa pengkomh ah hram a bunhmi Monywa pengkomh Battalion (2,3,4) Chindwin Attack Force hna hriamnam sernak sakhan pakhat cu mei nih a kangh caah kutser meithal telh in kyats sing 300 man hrawng a ciam, tiah chimphuannak nawlngeitu pakhat nih a chim.
“June 19 ah hriamnam kan ser cuahmah lio ah thil pakhat khat a can sual ruangah kan sakhan cu a kaang i Ks. Sing 150 in 200 man hrawng kan chiahmi zen, rifle, kutser meithal le motor telh in kyats sing 300 man hrawng a ciam,” tiah Chindwin Attack Force in chimphuannak nawlngeitu nih cun a chim.
Khatlei phu nih thir an sengh, khatlei phu nih kuanbawm an tuah. Cu lio ah mei kanghnak cu a chuak. Zun khat ah kyats sing 20 man hrawng a simi rifle zong a ciam dih, tiah a chim chap. A luancia April 10 lio zong ah khan Monywa pengkomh hrambunh Danger Force LPDF hna hriamnam sernak sakhan cu a rak kang i kyats sing 70 man hrawng a rak ciam, tiah theih a si.
Sagaing ramṭhen, Kalay peng, Thasi khua ah SAC ralkap nih an kah mi hriamngan a puak i kum 20 mino 1 bom ci nih a peh caah a nunnak a liam tiah theih a si. June 20 zinglei ah SAC ralkap nih an kah mi hriamngan a puah caah pa 1 a nunnak a liam i nu 1 zong fak ngai in aa hliam hi a si.
SAC ralkap nih Kalay peng thlanglei ah hriamngan an kah lengmang i June 18 zong ah SAC ralkap hriamngan ruang ah Htuma khuami pa 1 a thi i 2 an i hliam tiah theih a si. Kalaymyo thlanglei khua chuahnak ah a um mi SAC ralkap nih kah mi hriamngan ruang ah June thla chung ah mipi 4 an thi cang i 20 leng hliam an tuar tiah theih a si.
Myanmar ram ah hramhram in uknak lak a si hnu kum 2 leng caan chung ah SAC ralkap nih sualnak ngei lo mipi 3,672 an thah cang hna i a tlaih/hren mi minung 23,377 tiang an um cang tiah Assistance Association for Political Prisoners (AAPP) nih a thanh.
Atu cazin hi 2021 February 1 in 2023 June 19 tiang AAPP nih a khawmhsuat mi a si i khawmhsuat khawh mi leng ah a thi mi an tampi rih lai tiah a langhter. Pau Dothlennak chung, tuni tiang ah minung 19,037 an tlaih/hren cang hna tiah a langhter.
Dothlennak he pehtlai in an tlaih/hren hna i thah ding tiah bia an khiah mi 115 an um i hriawh in thah ding tiah biak an khiah mi 42 telh in minung 121 cu hriawh in thah ding tiah biakhiah an si caah thah ding tiah biakhiah a si mi an zapi te 157 an um cang. Atutiang ah biakamnak he an thlah ṭhan cang mi hna 4,341 an um tiah a langhter.