Thanwgpang Chia Fonh!
=================
Shan-Karenni ramri thluan, April thla chung kahdohnak ah SAC ralkap nih vanlawng in kahdohnak voi 108 nak tlawm lo an tuah caah tualchung mi 1 a nunnak a liam i, 5 hliamhma an pu, tiah KNDF nih cathanh an chuah. Hriamngan in an kah ruang ah tualchung mi 1 a nunnak a liam i 6 hliamhma an pu. SAC ralkap nih tualchung mi 1 an tlaih hnu ah an thah, tiah an langhter.
Vanlawng le hriamngan in SAC ralkap nih an kah ruang ah tualchung mi inn 20 leng a rawh leng ah siizung 3 le sii-inn 2 le biakinn 1 an rawk, tiah an cathanh ah cun an langhter. April thla chung ah Karenni le Shan ramkulh thlanglei Pekhon telh in Pinlaung peng ah kahdohnak voi 50 a chuak i, SAC ralkap 70 an thi. Tlangcung hriamtlai phu nih ralkap 3 an tlaih hna pin ah hriamngan 7, meithal zun 52 le zen-kuan tam ngai an chuh hna, tiah theih a si.
April thla chung kahdohnak ah KNDF B02 in ralkap 1 le KNDF B11 in ralkap 1, KNDF B06 in ralkap 1 nih ram le miphun ca ah an nunnak an pek ve. SAC ralkap cu 2023 February zarh donghnak in May 3 tiang Shan-Karenni ramkulh ramri khuate ah rallam an sial peng rih ko, tiah KNDF nih May 3 ah cathanh an chuah.
Sagaing ramṭhen, Min-gin peng, Pate-hka-yar (ပိတ်ခယား) khua cu SAC ralhrang nih a ruang umlo in bomb a thlak caah kum 4 ngakchia pakhat relh in minung 4 an nunnak a liam pin ah 5 nih hliamhma faak ngai an tuar, tiah tualchung mipi nih Khit Thit ah an chim.
May 4, chun suimilam 1:00 tluk ah Pate-hka-yar khua cu kahdohnak umlo nain SAC ralhrang nih jet vanlawng in bomb a thlak caah kum 4 ngakchia pa Thet Nine Lin le Daw Ohn Sein (Kum 50), Daw Mya Win le U Than Shwe hna an nunnak a liam, tiah kan theih. “Kahdohnak zong a umlo, Pound 500 tluk a ritmi bomb 3 a rak thlak i, a thlaknak hmun zong an kaur dih,
a thlaknak hmunhma hna cu sianginn he aa neihnak hmun le pumpululh chuihnak hmun pawng ah a rak thlak hna caah minung 4 an nunnak a liam pin ah 5 nih hliamhma faak ngai an tuar. Caw 5 zong an thi i, inn tamngai zong aa rawk, caw rawl chiahmi hna zong an kaang dih” tiah tualchungmi pakhat nih a chim. SAC ralhrang nih atu bantuk in bomb a thlak caah mipi hna cu khua chuahtak in kan zaam dih, a kirmi zong an um rih lo, tiah tualchung mipi nih an langhter.
Karenni ramkulh chung kahdohnak ruang ah harsatnak phunkip tuar in mipi ral a hrialmi umnak sakhan cu SAC ralhrang nih rallam an sial caah mipi hna an umnak an i ṭhial, tiah Shan ramkulh mipi hriamtlai phu nih May ni 4 ah an langhter.
“Kahdohnak ruang ah umnak khua chuahtak in ral a hrialmi, mipi hna umnak sakhan cu SAC ralhrang nih rallam an sial hnawh hna caah mipi hriamtlai nih an ṭhialkam pi hna” tiah Shan mipi hriamtlai phu (SSLRU) in ṭuanvo ngeitu pakhat nih a chim.
Shan-Kaya ramri thlun Pinlaung – Hpekon le Moebe hmunram hna chung ah thla 2 chung kahdohnak fakpi a chuak i, SSLRU nih mipi ralhrial hna dihlak a bawmchan kho hna lo nain kum upa tar nu/pa hna cu a si khawhtawk chuah in a bawmhchanh hna, tiah a langhter chih.