Thawngpang Chia Fonh!!
===================
Sagaing ramṭhen, Chaung U peng Natyekan khua um SAC ralkap check gate ah pa pali cu SAC ralkap nih May 22 ah an tlaih hna i an thah hna, tiah Chaung U PDF in ṭuanvo ngeitu pakhat nih a chim. Thah a tongmi hna cu May 21 ah Mandalay in, Sagaing – Monywa khuapi lei ah motor in an kal i, Natyekan check gate ah tlaih an tong.
‘PDF he naihniam in a ummi an si’ an ti hna ruangah an thah hna, tiah Chaung U PDF in ralkap pakhat nih a chim.
“Pa pali cu Hijet motor in Monywa lei ah an kal i, check gate pakhat hnu pakhat an tan dih ko nain Natyekan check gate ah tlaih an tong. SAC ralkap nih an phone an zohpiak hna i, lunghrinhmi an hmuh caah an thah hna. Hriamnam zong an i put lo,” tiah PDF pakhat nih cun a chim.
SAC ralkap thawngzamhnak nih a langhter ning ah cun, May 22 ah SAC ralkap nih Natyekan khua pawng i hmunhma thianhhlimnak an tuah lio ah bomb a hmanhmi PDF 4 cu an kah hna. PDF chungtel 4 hna ruak in kut ser meithal 3, kut ser bomb lung 5, 9mm kuan 13, battery 2, phone lung 2 le a dangdang thilri zong an lak, tiah an langhter.
Mandalay khuapi chung ah a cawlcangmi Royal Phoenix Guerilla Force (RPGF) hruaitu telh in ralkap 8 le tualchung mi 5 cu May 20 le 21 ah SAC ralkap nih an tlaih hna, tiah PDF lei sin in theih a si. Royal Phoenix Guerilla Force (RPGF) hruaitu Saw Ba Ngein, hruaitu chang Kauk Kyi le ralkap 6 hna cu SAC ralkap nih an tlaih hna pinah tualchung mi 5 zong an tlaih hna, tiah Myanmar Revolution Hero Force-MDY in ralkap pakhat nih a chim.
“May 20 ah Mandalay khuapi chung khual riahnak khan pakhat ah RPGF hruaitu chang Kauk Kyi cu an tlaih i, a dang a hawile cu an inn ah an va tlaih hna. Tualchung mi 5 tu cu RPGF he pehtlaihnak a ngeimi an si lo,” tiah RPGF ralkap pa nih cun a chim.
SAC ralkap nih an tlaihmi tualchung mi nu 3 le pa 2 cu RPGF he pehtlaihnak zeihmanh a ngeimi an si lo i, mi sawhsawh an si. Dohthlennak ah aa telmi PDF hna cu bawmchan ngam ti hna hlah seh law, ṭih hna seh tiin hrocernak ah an tlaihmi an si, tiah RPGF ralkap pa nih cun a chim chap.
RPGF chungtel 8 le tualchung mi 5 an tlaihmi hna cu Mandalay le Sagaing ramṭhen ah ralhrang rian a ṭuanmi Royal Phoenix Guerilla Force – RPGF an si i, a puak khomi thilri he kan tlaih hna, tiah SAC nih an thanh. KNU Brigade 3 hmunram um Mu peng Naungkone khua cu SAC ralkap nih drone in voi 2 bomb an thlak i tualchung mi inn le cacawnnak sianginn an kaang, tiah KNU Central nih cathanh an chuah.
SAC ralkap hna nih cun Naungkone khua cu May 21 zanlei suimilam 1:20 ah voikhat, 2:15 ah voikhat, tiin drone hmang in bomb an thlak. Naungkone khua cu inn 117 a um i, milu 782 an umnak a si. Khuami hna cu a himnak hmun ah an zam hna, tiah theih a si.
SAC ralkap nih KNU hmunram Mu peng chung ah May 10 in an lut i, khuami hna cu an thah hna pinah an inn le lo an khanghpiak hna ruangah Mu peng khuate 18 in minung 21,880 cu a himnak hmun an zam, tiah theih a si. SAC nih nawlngeihnak an laak hnu in KNU hmunram Mu peng khuate ah hriamngan, drone le vanlawng in kahdohnak an tuah leng ah tualchungmi an thah hna ruangah khuami tampi cu ralhrial in an zam. An kaltaakmi an inn le lo vialte zong SAC ralkap nih an khanghpiak hna, tiah KNU Central nih cathanh an chuah.