THEIHTERNAK LE NAWLNAK
==========
Tukum 2023, Mizoram Board of School Education tang i High School Leaving Certificate (HSLC)/tanghra results chuakmi ah Distinction in hlawhtlinnak a hmu mi hna cu Lai Students’ Association, General Headquarters : Lawngtlai nih conglawmhnak ngeih an timh. Lai hritlai siangngakchia chung in hlawhtlinnak a hmu mi hna nih May 25, 2023 hlan ah LSA zungpi Lawngtlai, Electric sang ah pehtlaihnak tuah khawh a si lai i, General Secretary MC Vanlalrova Lai, Ph: 8730828233 sin zong pehtlaihnak tuah khawh a si lai. Pehtlaihnak tuah tikah a herhmi:-
1. Roll Number
2. Min
3. Nu/Pa min
4. Sang/Khua
5. Sianginn min le Address
SAC Ralkap Fighter Nih Sawlone Khua Bomb A Thlak Ruangah Ngakchia Pakhat Nunnak Liam! Karenni ramkulh, Bawlakhe peng, Sawlone khua cu SAC ralkap nih vanlawng in bomb a thlak ruangah kum 17 tluk ngakchia pakhat a nunnak a liam, tiah Bawlakhe PDF in ṭuanvo ngeitu pakhat nih a chim.
Nihin May 17 zinglei suimilam 4:00 hrawng ah SAC ralkap Fighter nih bomb cu a thlak i kum 17 nu pakhat nunnak a liam pinah minung 4 hliam an pu i, sii-khan pahnih le inn paruk an rawk, tiah Khit Thit Media nih a ṭial. Bawlakhe pengkomh khuate ah SAC ralkap nih vanlawng in bomb an thlak tawn caah mipi nih van ral in i runven kan herh, tiah Bawlakhe PDF in ṭuanvo ngeitu nih cun a chim.
Tonzang Khua Nih Ti An Laaknak Pipe Cu Mifir Nih An Fir! Chin ramkulh, Tonzang peng ca ah Unicef nih an bawmhmi hna 90mm HDPE pipe cu May 16 zinglei ah mifir nih an cawh i an fir. A firtu cu an kawl cuahmah lio a si, tiah tualchung mi hna nih an chim. Mifir nih an firmi ti pipe hi Tonzang khuami hna nih dinti an laaknak si i, an ti laknak a um ti lo ruangah harnak an tong, tiah theih a si.
Tonzang peng in ṭuanvo ngeitu hna nih cun, Tonzaang peng ti laaknak pipe a firtu phu hi kan hngalh cang hna i ram buai lio ah mah pumpak miaknak ruah ah mipi thilri a firtu hna hi ram ṭhat tikah hmunhma ṭha pek an si te lai lo, tiah ralrin an pek hna, tiah Zalen media a tial.
Thlichia Nih Phaneng Khua Cu 99% A Hrawh, Luhchuah Khawh Loin SAC Ralkap Nih An Kham! Chin ramkulh, Matupi peng Phaneng khua cu thlichia ruangah inn 170 hrawng a rawk i, inn rawkmi hi zatuak in 99% hrawng a si. Cu chungah 1% tluk lawng a him i 2% hrawng hi a ning piin a rawkmi an si. Zatuak 8% tluk hi remh awk ṭhami an si lo, tiah The Matupi Times nih a ṭial.
SAC ralkap nih nawlngeihnak an laak hnu in Phaneng khua zatuak 60% tluk hi khua a hlummi an si. Thlichia nih minung umnak le um lonak inn zong a den dih. Inn rawkmi pawl remh ṭhan nak ding ah thirkhenh le chanpheo tibantuk an chambau ngai, tiah theih a si.
Hi kong he pehtlai in Phaneng khuami pakhat nih cun, “SAC ralkap nih Matupi in Phaneng khua chung luh khawh lo dingin lam an kham caah luhchuah khawh a si lo. Ukhruainak zung rianṭuanmi hna le a rawkralmi cazin latu hna lawng an luhchuahter hna. Atu tiang cu eidin ti rawl kong ah kan buai lo nain Inn rawkralmi remh ṭhan nak ding thilri kan herh. Chanpheo can ah ruahkham muka sawhsawh kan cih hna. Lo thlam ca ah kan rak hmanmi chanpheo kan khawmh hna i kan cih hna. Thlichia a hran i ruah a sur ṭhan sual ahcun kan cei ngai te lai,” tiah a chim.
SAC ralkap nih luhchuahnak lam an kham dih caah thlichia hrial in a zaam mi hna zong khua ah an lut kho rih lo. Matupi in chiti le cite tibantuk chanh an duh hna zong ah SAC ralkap nih gate an kham dih caah luhchuah khawh a si lo, tiah The Matupi Times nih a ṭial. Credite; The Chin Post