Thawngṭha chimtu cheukhat kan ipalh taktak tawnmi cu

Thawngṭha chimtu cheukhat kan ipalh taktak tawnmi cu, “Pathian nih ruang ngeiloin a kan dawt i zeibantuk misual na si le sualnak phunkip na tuah ko hmanh ah Pathian nih an dawt ṭhiamṭhiam ko” tiah kan ti. Asinain “zeibantuk na si hmanh ah Pathian thinhunnak in biaceih na si lai” ti cu kan pehchih ti lo. Pathian thinhunnak (wrath) kong cu kan thuh! Hihi aa palh taktakmi thawngṭha asi.

Khrih thisen hi khamhnak ca lawng asilo biaceihnak ca zongah asi. Jesuh Khrih khamhnak, dawtnak thawngṭha kan theih bakin cu kan theihmi thawngṭha bakkhan biaceihnak dingah hman colh asi. A cheuchum thawngṭha nihin mipi hna sualnak lamlei ah a hruai chin hna i, Bawipa sin ah sualngaihchihnak an ngei duh lo i Pathian an ṭihzahnak a um lo. Pathian thinhunnak le dantatnak kong an ngai duh ti lo i Pathian dawtnak lawngte ngaih an duh cang. Pathian dawtnak hi sual tuahnak caanṭha ah an hman.

Sualnak an tuah tikah siseh misual an si an itheih ko zongah siseh Pathian biaceihnak hi Pathian dawtnak in a ikilven, an ihmaimilh, an isilhnalh! Pathian cu dawtnak asi caah mizeipaoh a kan dawt dih. Cun Pathian cu biaceihtu asi caah mizeipaoh kan tuahserhning cio in bia a kan ceih dih. Pathian dawtnak le thinhunnak hi ṭhen awk an ṭha lo. Jesuh Khrih cu dawtnak in khamhtu ah ara cang. Cubantukin Jeush Khrih cu thinhunnak/biaceihnak in sualphawt dingah a ra ṭhan lai. Credit: James Van Nei Lian