Thantlang peng NLD thil tuah mi kong ah

Thantlang peng NLD party nih nai tan thimnak ah cu ka khua nih NLD caah thimfung tambik nan kan pek caah ti in roca phun, lomhpi, thangțhatnak ca phun an țial i an pekmi hna hi asi tak mi asi ko ahcun ațha lo ngaimi asi tiah ka ruah. Cozah timi cu 100% in atling mi cu – Dictatorship (ramchung ralhrang uknak) uknak lawng ah aum tawn. Democracy uknak ahcun dohtu le țanhtu um phung asi. Asinain cozah atling mi paoh nih ramchung mipi kha ai-awh dih țhiamțhiam ding asi. Cucu “Government For The People” timi muru cu asi.
Hi bantuk in khuakip thimfung a kan pemi lakah ‘nan nih khua cu pakhatnak khua nan si’ ti bantuk cu adang khua ape lomi hna khua caah anuam lo ngaimi asi. Cucaah hi bantuk cu Party office ah khan record caah i chiah ziar uh law ațha deuh tuk hnga. Hi bantuk NLD thimfung ape tamcem khua paoh roca pek phun hi Aung San Suu Kyi nih adirpi mi lamhruainak (Guideline) asi lai zong ka zum lo. Hi bantuk an tuahnak in an “Local Office File” ah an i chiah ziar ding kha ka duh piak deuh hna. An khua an va tlawn hna caan ah bia in an va conglomh hna ahcun aza ko ti in ka ruah.
Thantlang lawng siloin hmailei ahcun zei party cozah an si paoh zong ah Chin state chung hrimhrim ahcun thimfung athlatu hna khua kong ah hi bantuk in hawi hlei in hei lomhpi nak hna ca pek phun hi tuah ti hlah usih law ațha lai ti hi ka ruahnak le ka pomning ka chim duh ve. Ka siarem lo ngai caah ka vun țial ta. Fake news an tamtuk caah hi roca phun an tar mi hi lih hna asi ahcun ka ngai thiam hram uh tiah nawl kan duh fawn hna. Upatnak he,
Victor Khen Sang
Nov 27, 2020