Thantlang Peng CDM Palek, CDM Bawmhnak An Hmu Lo!

Thantlang Peng CDM Palek, CDM Bawmhnak An Hmu Lo!
========
Ralhrang nih nawlngeihnak an lak hnu in, Thantlang peng in palek CDM atuah mi hna CDM bawmhnak an hmu rih lo tiah kan theih.

CDM palek pakhat nih “CDM bawmhnak timi cu kan hna nih atheih theo nain a muihmai kan hmu lo, bawmh hi kan duh mi asi lo, CDM bawmhnak an ti ahcun an kan bawmh ve awk asi ko lo maw, CDM bawmhnak an ti tung i kan nih kan hmuh ve lo tik ah lung hna an hring thulh tiah” The Federal Times ah achim.

“Keimah ka theih tawk ahcun Thantlang peng palek in CDM tuahmi minung 30 hrawng kan si i cu chung ahcun pakhat hmanh CDM tuahmi palek bawmhnak kan hmu lo, himnak hmun ah kan i dor, Biaknak lei le zatlang bu nih cun an kan bawmh ko tiah” achim chap.

Thau Khua Ah Aa Dormi Hna Hmurka Le Thutto Ning; Thau khua ahhin aa dormi hna hi chungkhar 113 an si i, a milu in minung 559 an si. Kum 5 tang ngakchia hi 63 an si i, kum 70 tluk upa hna hi 31 an si, kum upa bik hi kum 90 hrawng an si hna. Hi chung ahhin Pastor 4 an um.

Pastor te nih mah le Khrihfa bu cio ningin an vehvaih hna. Thantlang khuanu khuapa aiawh in Pu Lawm Bik, Rev.Dr. Lal Uk, Rev. Calvin, Pastor Sui Lian Kam hna zong nih an veh hna. Pu Chan Ham cu Thau khua aphan ko nain himnak hmun ah aa dormi hna atong hna lo, pumpak inn ahcun a ton khawh hna men ko hna nain, sianginn kulh chung i a ummi hna cu a tong hna lo.

Christmas le Kumthar ah Thau khuami hna nih laksawng an i pek ning cio in Thau khua ah ai dor mi hna, kum upa deuh laksawng an pek hna tiah tuanvo ngeitu nih The Federal Times ah achim. Tuan deuh inn 80 an um lio ah tangka 25000 cio bawmhnak an pek hna, atu zongah Dal, Aalu, Piat, Cite, Chiti, Arti ti’n funkhat, funhnih ti’n an phawt hna,
Arti hi acaan ah pum 4, pum 3 ti’n an phawtzamh hna.

Sekenhen zong nan duhmi i thim u ti’n an thim ter hna, Lo tuah ai tim mi zong an um, Saiha khua ah ralkian i a ummi Pastor pakhat nih arak veh hna i thlacam piaknak a kan ngeih tiah ralkian in ai dor ve mi pakhat nih The Federal Times ah achim.

KNU Brigade 5 Nih Kum Khat Chungah Ralhrang 1300 Leng An Thah Hna. KNU kuttabg KNLA Brigade 5 hmunhma chungah 2021 ah a cangmi kahdohnak ah ralhrang 1364 an thi 1313 hliam an tuar tiah KNLA Brigade 5 nih thawng an thanh. Kumkhat chung ah 2692 kahdohnak achuak i KNLA Brigade 5 sinah a lutmi hna ralhrang hi 47 an si.

Kahdohnak ah KNLA lei in 30 an nunnak liam i 107 hliam an tuar, nunnak liammi hna lak ah Tat-Khuai-Hmu 1, Duh-Tat-Khuai-Hmu 1, Bo 2, Tatkyatkyi 2 le Tatkyat 3 an i tel. 2021 kumkhat chung kahdohnak ah ralhrang ruangah khuami mizapi 12 an thi, 42 hliam an tuar, ralkian in 80000 leng an um, vanlawng in kah ruangah sianginn 2 le sii-inn pakhat aa rawk.