Thantlang Peng ah ralhrang nih meithal an puah hoi

Breaking News: Thantlang Peng Sopum Khua Ah Ralhrang Ralkap Nih Meithal An Puah Hoi
================
Breaking News; Tuzan suimilam 9:20 hrawngah Sopum khua ah Ralhrang Ralkap nih meithal voithum an puah i a hnu suimilam 10:00 hrawngah voithum hrawng an puah than tiah Sopum khuami nih The Chin Light ah an chim. Atu bantuk thil hi lau tuk ding le thinphan tuk ding a si lai lo mu. Credit: The Chin Light

Tedim Khuachung ah Bomh Voi 2 a Puak. Tedim khuachung ah tu zaan ah bomb voi 2, suimilam pakhat dan in an puak, tiah Tedim ca in ttialmi thawngzamhnak pawl nih an langhter.”Tuzan sml. 7:45 ah Tedim, Myoma sang, Suimilam Tower (နာရီစင်) pawng ah bomb voi khat a puak.

Cun, sml. 8:50 hrawng ah Sakhollam sang ah voi khat a puak tthan,” tiah Tedim thawngzamhnak nih an langhter. Bomb voi 2 suimilam pakhat dan in an puah caah Tedim mipi leng chuak ngam loin innchung ah an i dup hna, tiah an langhter chap.

Mindat ah Myanmar Ralkap Thazaang an Chapmi pawl Khualeng ah an Hren Hna. Nihin zinglei sml. 9:30 hrawng ah Gangaw le Pakukku lei in SAC ralkap thazaang an chapmi pawl cu Mindat peng ah an lut nain tu zaan sml. 9:00 tiang ah Mindat khuachung ah lut kho loin an um, tiah Mindat khuami pawl nih an chim. Mindat ah a kalmi SAC ralkap pawl cu lampi ah CDF-Mindat nih a dotdot in an kham thluahmah hna i nihin zanlei sml. 3:00 tiang hrawng kahdohnak a fak ngaingai.

SAC ralkap lei nih ralhriam ngan pawl an hman caah CDF cu Mindat lei ah an i thawn thluahmah i, Mindat he meng 2 a hlatnak ah SAC ralkap pawl cu an orh hna. Khuachung ah SAC ralkap an luh khawh lo nakhnga a dotdot in Lai meithal he kham ding in ready in an um hna.

Monywa hrambunh Myanmar SAC ralkap “North Western Command” in Deputy Commander nih Pakukku le Gangaw lei in a rami SAC ralkap pawl Mindat khua i ralkap sakhaan ah luhter ding in CDF-Mindat a chawnh hna nain CDF-Mindat nih an cohlang lo.

Cucaah, thazaang thar chapmi SAC ralkap pawl cu Mindat he meng 2 a hlatnak khualeng ah an hren hna i, atu zaan sml. 9:00 tiang ah khuachung ah an luh khawh lo bang in kap hnih i kahdohnak zong a um rih lo, tiah kan theih. Credit: The Chin Journal

Mindat Kahdohnak Ngol Chungmi Cu An Rawk Than Cang, An I Kah Than Cang. Chin ramkulh, Mindat khuapi chungah mipi le ralhrang kaldohnak ruangah ralhrang lei ralkap a tlawmbik 20 an thi cang lai, tiah ruah a si. Nihin ni ah zingka tein kahdohnak an thawk hnu ah ngol chung dingin ralhrang lei nih an hal hna caah suimilam 2;00 chung an ngol chung hnu ah atu an kah than cang tiah The Irrawaddy nih a tarlangh. Tuzing suimilam 6:00 in an thawkmi kahdohnak cu an kah than cang, tiah khuami pakhat nih a chim.

Keimah pumpak zong hi kahdohnak ah ka um ve, chihkhat inn lei ah ka rak tin ta hi a si, tiah a chim. Khuapi chungah an kah i, kah ngol chungmi cu a rawk cang ti khawh a si. Tuzan cu zankhua dei in kah dawh kan si cang, tiah Mindat khuami pakhat nih a chim chap. Ralhrang lei in Mindat khuapi chungah ralkap pawl luhter dingin an hal hna, Mindat mipi le khuanu khuapa he biaruahnak an ngeih. Mindat mipi lei in nan tlaihmi hna thlah than ding le ralkap thazang nan chap mi kirter ding hna an hal ve hna.

Ralhrang pawl cu mino lei nih an zumh hna lo, tiah khuami pakhat nih a chim. Nihin kahdohnak ah hin ralhrang lei ralkap 3 an thi than i, ralhrang lei a thi mi hi 20 leng an si cang lai, tiah theih a si. Mindat mipi pawl hi a si khawh chungin bawmh a herh tuk lio caan a si. Credit: The Irrawaddy