Thantlang khuami hna nih an zaam taak mi thilri pawl motor 40 hrawng in an hung laak!

Thantlang khuami hna nih an zaam taak mi thilri pawl motor 40 hrawng in an hung laak
============
Raal ruang ah Thantlang khua chuah taak in a zaam mi khuami hna nih nihin, October 13 ah, an kal taak mi thilri cheukat cu motor 40 hrawng in an hung laak tiah theih a si. “Thantlang Khuami nih October 13 le 14, 2021 ni hnih chung thil laak caan kan ti mi ah nihin 13.10. 2021 ni tluang tein kan laak khawh hna,” tiah Thantlang Sipin Committee Chairman Pu Ram Khar nih Facebook ah a tial.

Vailam Tlang, Bual Peng, Zophei, Vanzang Tlang le Hakha lei in motor a hme he a ngan he 40 in thil sia herh mi cio an lak khawhnak le tluang tein anmahle umnak cio ah an kir khawh thannak zong a langhter.”Thaizing 14.10. 2021 ni cu a ho hmanh kal lo ah a tha. Kan nunnak a him kha biapi ah ruah a hauh caah kal lo ding si lai”, ti zong Pu Ram Khar nih a tialchih.

Thantlang khua cu khuami hna nih caan karlak an chuah taak chung ah Council ralhraang pawl nih innzuat satil an fir hna lawng siloin inn tampi an bauh i thilri an fir tiah kan theih.

Hniarlawn khua thar pawng ralhrang he i kahnak ah ralhraang lei panga an thi. Tu zing suimilaam 10:00 hrawng ah, Hakha khua he lam naih te ah a um mi Hniarlawn khua thar pawng ah CNA le CDF i bawm in Council ralhraang he i kahnak a chuak i ralhraang lei in panga an thi tiah CNF Chimphunnak nawl ngeitu Salai Htet Ni nih a chim.

“Hakha khua chuahnak, Hniarlawn thar ah tu zing sml. 10:00 hrawng ah kahnak a chuak. Council ralkap panga an thi. Kanmah CNA le CDF aa bawm mi lei in hliamhma a pu mi an um lo. Meng 6 a hlaatnak hmun ah Council ralkap lei nih hriamnam ngan in kahnak cu a um. Hmaitonh in an i kap ti khawh cu a si lo. Anmah lei nih zawndamh in an kah mi a si,” tiah Khomumthung ah a chim.

Hniarlawn thar khuami cu an zaam dih i a zaam kho lo mi inn li-nga an um, ralhraang nih zaam taak mi inn an boh hna tiah khuami pakhat sin in kan theih. Tu zing ah khan kum 13 ngakchia pakhat tel in minung pali Council ralhraang nih an tlaih hna i Skat motor pakhat zong an kalpi tiah kan theih.

Myaung PDF Camp hrampi ralhraang nih an tuk, PDF nih himbawm tein camp an chuah taak khawh. Sagaing Ramthen, Myaung Peng rammi rungvengtu ralkap pawl i an camp hrampi cu zahan, October 12 zaan suimilaam 7:00 hrawng ah Council ralhraang pawl nih ralkap thazaang le hriamnam thazaang bungh in an kah hna tiah theih a si.

Ralhraang pawl cu ralkap thuam i hruk lo in, PDF bantuk in an i thuam i camp velchum in ralkap 150 hrawng nih an tuk hna ti a si. Myaung PDF pawl cu camp in an chuak manh i, PDF ralkap dihlak hma a pu mi um lo tein an i thialkaam manh tiah Myaung PDF chungtel pakhat sin in theih a si.

Nihin October 13 zong ah Council ralhraang pawl cu an ra than i PDF camp umnak kiangkap ah a um mi, sualnak ngei lo khuami hna inn pariat an duah tiah tualchung media nih an langhter.

Ralhraang nih Falam peng ah biakinn tel in inn li an duah. Chin Ramkulh, Falam peng, Falam le Hakha karlak motor lam cung ah a um mi Rialti khua ah Baptist biakinn tel in, inn pali cu Council ralhraang pawl nih nihin October 13, zaanlei suimilaam 3:30 hrawng ah mei in an duah tiah khuami hna sin in theih a si.

Rialti khua cu inn 10 fai an si i Falam khua in meng 8 hrawng a hla. Council ralhraang pawl cu Lungpi khua lonh ah an mortor an dirter i Lungpi khuachung ah ar, vok le meheh pawl an kah hna. Inn chung ah a um mi facang, chiti le cite tibantuk an fir. Credit: The Hakha Post