Thantlang Khua Chung in Ka Chuak nain Ka Chung in Thantlang A Chuak Lo!

Editor Hmurka: Thantlang Khua Chung in Ka Chuak nain Ka Chung in Thantlang A Chuak Lo!
===============
2021 September 18 ah chunmui a tlung. Mit au buin khua ka hmu kho lo. Meithal thawng le Bom puah thawng dah ti lo, kan khuazung ah zei thawng hmanh theih ding a um lo. Voi dang tawn bang a dai colh ko lai tiah ka ruah, nain a dai colh lo. Ai peh vima.

Ka hawinu nih, Bom nih a tlak i a rawk mi an inn hmanthlak a ka kuat. Kanmah inn ka siter chun ah ka celh bak lo, ka mitthli a hai. Tlawmpal ah, inn a kang, timi thawngpang nih ka khuazung lawng hlah, vawlei pi a cul. Ruah siamsiam in a sur pah nain khua a lin tuk.

Inn kang mi, meiphalh sawmnak cu Messenger Group kip ah tar cio a si. A rau lo, meithal puah thawng kan theih than. Mawtaw thawng le Saikal thawng in a rak khatmi Thantlang zalam pi cu meithal thawng nih a hrawng thluahmah. “Pastor Cung Biak Hum an kah le a thi” timi thawng nih Thantlang a muihter chinchin.

Inn le lo hrawhpiak hi a fak bak, ciam dihlak in khanghpiak a fak deuh. Pastor thahpiak hi a fakbik mi a si. Tuar a har hringhran. Ram leng um Laihritlai cu chim lo, laihritlai lo miphun dang zong nih an kan tuarpi cio. Hi ni, innkaang meitek kan tonni, kan Pastor a thih ni (2021 September 18) ahhin Thantlang khua chung ummi ho taktak hmanh zanriah kan ei lo. Ram dang ummi zong nih, kan ei cio lo an ti lulh.

Thantlang khua chuahtak ah a tha, ti kha zapi thinlung ah a um cang. 2021 Sep. 19 cu thawhka in Pastor Cung Biak Hum ruak ka hum. Keimah zong hnemh hau phun in ka um. Ka mitthli a hai. A thli tein sau-ial ka tap. Cun ka lung chung in upat peknak bia zong kai chim sek len ve.

Mah hi zong hi thaithawh ei mi an tlawmte lai dah. Saikal in ai thiar na, ke in a rak kal chung na, Mawtaw in a kal na tiin kan um cio. Kei hi Saikal in ka kal. A langhlat in an ka kah lai, ti ka phang bak. Lahva ka phak in ka hnangam deuh. Vuichip tlang ka phak cun ka thilrit a hung zaang put.

A duh ahcun Cite tung ah i cang huar ko ning, ti phun khin Vuichip tlang in hnu lei Kai her i Thantlang ka cuan ta. Khua lu in khua taw tiang ka cuanh dih hirhiar. Cucu atu tiangah Thantlang ka hmuh a donghnak a si. Ka hmuh ning tein ka hmuh than lai, tihi kai ruahchan lem lo.

Tluang tein Vambai kan phan. Ka fapa kha thang piin a tah zong ah ka zeihmanh a poi ti lo. Zanmang chia hlah tak bang kan hna a ngam. Ram tha ummi chungkhat zong an hnangam cio ve. Thinphan thlalaunak an tlau i lungdaih hnangamnak he caan kan hmang. Cu hnu ceo cun Zarhpi ni a si ka hun i fiang pup. Zarhpi ni a si hmanh hngal lo lak in kan rak um. Pathian nih kan ngaithiam hram seh.

Thantlang ah ka chuak. Thantlang ah ka thang. Thantlang ah sianginn ka kai. Thantlang ah Rian ka tuan. Thantlang hi rak um hlah sehlaw keimah zong hi ka um lo men lai tiah ka ruah. Ka chuahnak, ka thannak, sianginn ka kainak le Rian ka tuannak Thantlang khua in ka chuak nain ka chung in Thantlang a chuak naisai lo, zeitik hmanh ah a chuak fawn lai lo. Mitthlam le thinlung thlam ah a caam peng ko. TBYD Thlalang Cazual – TBC Mino