Thantlang ah ralkap nih Cung Bawi Lian cu CDM a tuahmi ralkap he naa pehtlai tiah an tlaih

Breaking News; Thantlang ah ralkap nih Cung Bawi Lian cu CDM a tuahmi ralkap he naa pehtlai tiah an tlaih
=====
2021 March 10 zaanlei suimilaam 6:00 tluk Thantlang khuapi chung ah ralkap nih Cung Bawi Lian an tlaih tiah theih a si. An tlaihmi kong he pehtlai in Thantlang khuami pakhat nih, “Atu an tlaih hi zaanlei suimilaam 6:00 hrawng ahkhan a si. An tlaihnak a ruang hi pawngkam minung nih an chim ning ahcun, “Tunai Thantlang ralkap CDM a tuahmi he nan i pehtlai,” ca an ti tiah an chim. Biafiang cu kan thei ve rih lo,” tiah a chim.

An tlaih mi Salai Cung Bawi Lian hi Thantlang khualuhnak hauka Laipawng lung i dawr a hngak mi a si tiah kan theih.
Atu hi Thantlang mino minung 90 in 100 kar i pum in kan thlahpiak uh ti hal ding in palek sakhan lei ah an kal lai tiah kan theih.

Relchap, Ralkap le CNA/F biaruahnak an ngeih dih hnu ah ralkap camp ah an lan. 2021 March 10 Chin National Army/Front le ralkap Tlangpi khua ah ton biaruahnak an ngeih hnu ralkap cu CNF/A camp lei ah an lan tiah theih a si. Hi kong he pehtlai in Tlangpi khuami pakhat nih, “Nihin kan khua Tlangpi ah biaruahnak an ngei hna. Ralkap lei nih nan camp ah len kan duh ko tiah Dr. Sui Khar sin ah an hal nain Dr. Sui Khar nih a duh lo.

Biaruahnak an ngeih dih hnu ah lenh hrimhrim kan duh ko an ti than i an len. Atu hi ralkap cu camp in an rak kir lio a si. Amah Dr. Sui Khar le a hawile dang tu cu Hakha lei ah an lan ve. Thinphan awk cu a um lo,” tiah a chim.
Nihin CNF/A le ralkap bia i ruahnak ah ralkap lei hi motor le motorcycle in minung 40 hrawng an si tiah kan theih.
Bia an i ruahmi a si khawh chung in hlat le thawngthanh kan rak in zuam than hna lai. Credit: The Hakha Post