Tender tuanpawl nih phaisa CDF Hakha Lutlai khuachung um sin i an pekmi kha a tlawm telo khah!
===========
Dothlen nak kan kalpi kati lio ah hin hmailei ca ruatbu te in kar kan hlanlo ah cun..neh le nang nih zulh dawi a si te ko lai. Tuanbia kantial ti hi philh lo ah a tha. Thangthat le thangchiat cu kan mah cio cungah a um mi siko. Groups i ka post mi poh nan delete ter peng hna nan ning a zak silai cu..a dik mi ka tial caah mu.
Kan hnu zarh chung i Laikua lampial Gate i zu nan tlaih mi zawng kha Phaisa nan liam ter hna i nan thlah than ko hna kha teh CNA zawng nan i tel kolo hme maw? nan khap ah khap uh nan khap lo cun thlah ko hna uh zu man lam a kai.
Falam ah cun an khap lemlo i zuman a kai lo, Hakha ah cun a hlan 500 man kha 1700/- a si hih. Tender tuanpawl nih phaisa CDF Hakha Lutlai khuachung um sin i an pekmi kha a tlawm telo khah..A tu ah cun mualpho tih ah nan thuhnawh hoi.
A can zat tik ah a lang thiamthiam ko lai cuh. Fiangten vuntial kaduh na in a poi dingmi thil ka ven ve caah siko. Zei theilo kha nan au khuang le a dik mi cu kan tial a hau ko..Mi lih mi hrawkhrawl taktak cu nan theih te lai.
Hakha CDF Councill lutlai pawl phaisa ah nan ri tuk cang Drone a ngan mi a tha mi hmanh a tu tiang nan i damh khawhlo lio ah. Nan tlinh lo bu i nan tuan mi a tam tuk..Tlukruan nak tello in nan tuahsernak mi zapi nih theih nan si. Nan min cu a tha kho bak lo hih..mah tite nan kal ah cun Nan kutang i nan i chiah mihna Kan ralkap pawl hi an lungfah caan phan te lai khah. Credit: Lai Pa
Chin National Council(Mindat) Kan Dirh Tiah Mindat Peng Mizapi Ukhruainak Phu Nih Thanh. Chin National Council(Mindat) kan dirh cang, tiah Mindat Peng Mizapi Ukhruainak Phu nih nizan August 6 ah cathanh an chuah. SAC ralkap a hram in bongh ding, hmailei Chin miphun ca ah ramkhel lamthluan hmuhsak khawh ding, Federal Democracy ser khawh nakding le mahte khuakham lairel khawh nakding ca ah ramkhel lei hruaitu bu ngan a herh kan ti i Chin National Council(CNC) kan dirhnak a si, tiah an langhter.
Chin National Council hi ramleng ummi dohthlennak phu hna he dirh in CNC cu Mindat ramchung ah nawlngei bik a si lai, tiah an langhter. Chin ramkulh, Mindat cu Federal Democracy rampi ser khawh nakding ca ah hmaisuang in ral kan tu. Cu pinah mizapi ukhruainak, runvennak, biaceihnak, humhimnak le mi bawmchanhnak rian hna a tak in kan ser i kan ṭuan khawhmi hi ramchung ramleng a ummi dohthlennak phu hna nih nan kan dirkamh ruangah a si, tiah CNC nih cun an langhter.
Mindat kan unaule t’heot’heo nih Chin Miphun tuanbia cu an t’ial t’han ko mu. Kanmah hi Chin Cozah taktak cu kan si tiah a chim tawnmi nih Chin Cozah dirhmun an laak khawh lo cu mipi mithmuh a si. Chimmi le tuahmi aa zul bal lomi cu ahonihdah Jesuh t’um t’han tiang cu a hngak kho reru hna hnga? Mindat hnu a zul ding an um tuan hna lai ti ka zumh. A ngamhmi nih ralt’hatein an dirpimi hi uico bangin boh hna hlah usih!
Falam Le Hakha Ah Tlangrai A Tlung, Mizaw An Tam! Chin ramkulh, Falam peng ah tlangrai zawtnak a tlung i sii-inn ah mizaw um an tam ngai, tiah theih a si. July thla dongh hrawng ah khan Falam khuachung ah tlangrai in a zawmi an tam ngai. An hrawm a faak i an khuh, an tha um lo i rawl zong an duh lo. A bik in ngakchia le upa hi an zaw khun hna. Falam khua chung ummi zong sii-inn ah an um i khuate lei in a rami zong an tampi, tiah Falam ummi pakhat nih The Chin Post ah a chim.
“July thla dongh hrawng khan Falam khuapi Tlanglo sang a ummi sang chung mi hna zong faak ngai in tlangrai in an rak zaw i Falam sii-inn ah a ummi zong an um hna. Mino cu kan ṭhawng deuh ko nain ngakchia le upa cu an celh hrim hna lo. Atu zong sii-inn a ummi an um pah rih ko lai,” tiah Tlanglo sang ummi pakhat nih The Chin Post ah a chim.
Falam peng khuate pakhat in dam lo ruangah Falam sii-inn a panhmi nu pakhat zong siibawi te in x-ray(ဓာတ်မှန်) an thlakter i a result a chuakmi cu siibawi te nih an fian lo caah Mandalay sii-inn ah kal dingin an chimh hna nain tangka ngeih lo ruangah Mandalay a kal kho ding an si lo caah Hakha sii-inn an panh, tiah theih a si.
Hakha khuapi zong ah July thla in tlangrai in a zawmi an tam ngai cang. Mizaw pakhat nih a chim ningah, tutan an zawt ning cu 2020 lio covid rai bantuk in an hrawm a faak an tha a um lo, an lung a mit i rawl an duh lo, tiah theih a si.
Hpakant Ah SAC Ralkap Sakhan Pakhat Cu KIA Nih An Laak. Kachin ramkulh, Hpakant ah SAC ralkap sakhan pakhat cu nihin August 7, zinglei ah KIA nih an kah i an laak, tiah KIA he naihniam in ummi hna sin in theih a si.
SAC ralkap ṭatmah 33 kuttang um Patheingyi hrambunh, khah lah yiah 119 nih hram an bunhnak Kantsebum sakhan cu KIA brigade 9, battalion 6 nih an kah i cu sakhan cu an laak khawh, tiah theih a si.
Kahdohnak chung ah SAC ralkap nih an hmanmi hriamhme, hriamngan, zenkuan le riahcaw hna cu KIA nih an laak pinah ralkap 3 zong an tlaihchih hna, tiah theih a si. Kahdohnak ah SAC ralkap a thimi an tam pinah an umnak sakhan chuahtak in a zaam mi zong an um. Kahdohnak a chuahnak hmunhma cu hmundang um SAC ralkap nih hriamngan in kah an bawmh hna, tiah theih a si.
SAC Vanlawng Nih Anmah Lei Ah Bomb A Thlak I SAC Ralkap 12 An Thi. Karenni ramkulh ah SAC vanlawng nih anmah lei ah bomb a thlak i SAC ralkap 12 an thi tiah Thai PBS nih a ṭial. August 5 ah SAC vanlawng pathum nih Thailand-Myanmar ramri ah a um mi Karenni Army (KA) le KNDF sakhan cheukhat cu bomb a thlak hna i KA ralkap pahnih an nunnak a liam, pasarih hliam an tuar.
KA le KNDF sakhan ah bomb a thlak lioah anmah SAC sakhan ah a thlakchih sual i SAC ralkap 12 an thi, hliam a tuar mi an tam ngai tiah Thai PBS nih cun a langhter. Thailan ramri hrawng i SAC sakhan tam deuh cu Karenni ralkap nih an lak cang i cucu lak ṭhan an duh caah SAC nih vanlawng in bomb a thlak nak hi a si.
Cat Loin Ruah A Sur Ruangah Kawkareik – Myawaddy Ah Faak Ngai In Lampi A Cim! Karen ramkulh, Myawaddy peng ah cat loin ruah a sur ruangah Kawkareik – Myawaddy lampi cu fak ngai in cim, tiah tualchung mi hna nih an chim. “Ruahti a tam tuk caah Kawkareik-Myawaddy, Yinkhuai tlang lonh ah motor lampi cu a tlapning in a cim. Zei bantuk motor hmanh an kal kho lo,” tiah Myawaddy khuami pakhat nih a chim.
Tutan Myawaddy lam cimhning hi a fah tuk caah a serremh zong ah a har ngai lai i, a rauh zong an rau lai, motor lam pehtlaihnak cu a cat rih ko lai, tiah tualchungmi hna nih an chim.
Myanmar ramchung hmunkip ah ruahti a tam ruangah Rakhine ramkulh ralhrial zeimawzat cu harnak an tong i, Mon ramkulh, Bilin peng zong ah mi tampi harnak an tong, tiah theih a si.