Teinak lam kan zawh chin lengmang cang, Hawikawm le bawmhtu tam deuh kan nei chin lengmang lai!
Politics Hi Uico Iseh Bantuk A Si.
=========
Min Aung Hlaing nih nawlneinak alak ka ahkhan, NCA kahngolnak a tuahmi hna EAOs cheukhat pawl lungput cu; kahngolnak lampi zulh kha cakei mei tlaih in itlaih kha a si. Aruangcu ralhrang pawl hi kan tei khawh hna lailo caah ichawnhbiaknak lampi hi kan caah athabik tiah an ruah caah a si. Asinin nihin EAOs cheukhat an lungput kan zoh tikah NCA lampi kha an hlawt i ralhrang pawl hi an hram lawlaw in kan phelh hna lai ‘tikha an kalpi cang. Hihi zeidang ruangah si loin kan tei chin thluahmah cang hna caah a si.
Ralhrang pawl nih nawlneinak an lakka ahkhan KNU ah phu 2 in an i then, Phu khat nih NCA lampi zawh kha an duh, phukhat nih an duh loh. Khelkhatin kan chim ahcun kah aduhmi le aduhlo mi karah biatak tein an buai. Kah aduhmi hna nih an kah hna i teinak an hmuh thluahmah tikah kah a duhlo mi phu nih kah aduhmi phu kha an pom than hna i atu ahcun hmunkhat te ah an dir khawh cang. Hihi zeidang ruangah si loin kah aduhmi nih teinak an hmuh lengmang caah a si.
Ralhrang pawl nih Karen ram ah amah bawmh dingah a zuatmi hna. Border Guard forces (BGF) pawl kha KNU atuk hna paoh ah ahman ton hna. Asinain nihin ni ahcun ahman khawh ti hna lo, aruangcu KNU nih teinak lam an zawh chin lengmang caah a si. Shan ram zongah ralhrang bawmhding ah BGF battalion achiah mi hna zong atu ahcun ahman khawh ti hna lo. Aruangcu; ralhrang pawl kan tei chin lengmang hna caah a si.
Arakan State uktu dingah ANP party hruaitu ahman hna. Can sau an kal hlan ah ANP hruaitu pawl nih an chuahtak than hna, Aruangcu; hi ralhrang pawl nihhin uknak hi an tlai khawh taktak lailo ti an zumh caah a si. Ralhrang pawl hi cu hlan ahcun China nih a fa zoh in a zoh hna, Asinain nihin ni ahcun a sir lei lawngin a zoh cang hna, Aruangcu teinak lam kan panh chin lengmang caah a si i, a tu ahcun China hi Kawlram mipi lei a van hoih pah cuahmah cang.
Ralhrang pawl nih nawlneinak alak hnu ah KIO/A an dirhmun hi fiangfai in an chim bal lo na in, an dohthlennak kum 61 tlinh ni ah an Chairman Nbanla nih an dirhmun piangkaro in a chimmi cu NUG hi hriamtlai bu nih kan dirhkamh hna lai i, ralhrang hna hi, an hram in kan phelh hna lai a ti.
Alliance (mahameh) asi mi hna, MNDAA- TNLA le AA hna nih KIO/A he politics ah hmunkhat tein kan dir lai tiah cathanh an hun chuah colh ve. KIO/A nih cu hlan an chim bal lomi ‘bia’ atutan ah an hun chimmi hi teinak lam kan zawh chin lengmang caah piangkaro in an lungput an hun chimnak hi a si.
Cucaah politics kan timi hi Uico iseh bantuk khi a si an ti tonnak khi a si. Uico an iseh tikah atei mi lei in a dang Uico nih an bawmh ton hna, Cu ve bantukin politics kan timi hi teinak kan hmuh deuh paoh ah hawikawm le bawmhtu tam deuh kan neih chin lengmang ve lai.
Teinak lam kan zawh chin lengmang cang, Hawikawm le bawmhtu tam deuh kan nei chin lengmang lai. Note; Mah bia hi vawrawng zunthil ah tlawmpal cu ka rak chim bal cang. Credit: Van Neih Thang