SAC Ralkap Southeast Region Uktu General Myat Thet Oo Cu Laos Ambassador Ah An Thim
==============
Mawlamyaing hrambunh Southeast region(nichuah thlanglei) SAC ralkap headquarter uktu ralbawi, General Myat Thet Oo cu a rian in an dinhter i, Lao People’s Democratic Republic(Laos) Ambassador ah SAC nih June 17 ah an thim, tiah theih a si.
2022 August ah nichuah thlanglei SAC ralkap headquarter uktu ah an rak thimmi General Myat Thet Oo cu 2023 March thla ah a rian an thlen i, Naypyidaw ah chekhlatnak an rak tuah, tiah theih a si. Cu hnu ah General Myat Thet Oo cu a rian in an dinhter i ramdang palai zung ah Laos-Myanmar Ambassador rian an pek.
SAC ralkap Regional Headquarter pakhat uktu rian cu dinhter in ramdang palai an ṭuanter mi hi dantatnak phunkhat a si, tiah CDM ralbawi cheukhat nih an chim. SAC ralkap sianghleirun DSA 38 in a dihmi General Myat Thet Oo cu SAC nih nawlngeihnak an laak hnu in Myigyina khuapi hrambunh chaklei headquarter uktu rian an rak pek i, 2022 August thla ah nichuah thlanglei SAC ralkap headquarter uktu ah an rak thlen.
Nichuah thlanglei headquarter uktu rian thla 7 chung a ṭuan i, 2023 March thla dongh ah a rian in an dinhter ṭhan. Hi kong he pehtkai in CDM ralkap hna nih cun, Karen ramkulh kahdohnak ah teinak a hmuh lo caah an dinhter a si lai, tiah an zumh.
Yangon ramṭhen, North Ukalapa peng, Myat Maung sui dawr cu June 18 zan ah mifir nih an luhhnawh i kyats sing 16,000 leng man an fir, tiah SAC nih an thanh. June 18 zanlei suimilam 4:15 ah North Ukalapa peng, Myat Maung sui dawr cu minung pathum nih meithal he luhhnawh in sui cuai 4 leng, tangka fang in kyats sing 11,600, lengah Ks. sing 5,000 man sui ṭhi rual, a dihlak kyats sing 16,600 man an fir. Sui dawr hngaktu pahnih zong an kah hna i hliamhma an pu, tiah theih a si.
Cu sui dawr mifir nih an luhhnawh lio ah cun SAC ralkap pawl cu sui dawr umnak sang pawng ah an um lio a si i, lamtonnak ah palik le ralkap cheukhat zong an um ko nain mifir nih meithal an puah lio zong ah an kalhnawh hna lo, tiah tualchung mi cheukhat nih an chim. Atu hi SAC nih CCTV in chekhlatnak an tuah i mifir pawl cu an kawl cuahmah lio a si, tiah Khit Thit Media nih a ṭial.