Tanphu Khua ah Lai Khrihfabu Tangka le Khuami Tangka Ralkap nih an Lakpiak Hna

Tanphu Khua ah Lai Khrihfabu Tangka le Khuami Tangka Ralkap nih an Lakpiak Hna
——
Kalaymyo peng chung i Lai khua pakhat a simi Tanphu khua ah nihin zanlei ah ralkap 30 hrawng nih an luh hnawh hna i khuami tangka an lakpiak hna pin ah Khrihfabu tangka zong an lakpiak hna, tiah tangka lakpiak a tongmi hna nih The Chin Journal ah an chim.

Nihin zanlei sml. 5:00 hrawng ah Lai Baptist Church, Tanphu ah Sunday School sayama a simi nu pakhat i a chungkhar inn cu ralkap nih an luh hnawh i an tangka bawm chung i 70,000 MMK an lakpiak hna. Ralkap nih an lakmi tangka 70,000 MMK chung ah hin 20,000 MMK hi Chin Baptist Association (CBA, Kalay) Magazine an zuarmi man a si.
Sunday School sayama le a naunu zong ralkap nih an tlaih hna nain an thlah tthan hna.

Tanphu khua pawng ah hin Gangaw lei in a rami ralkap pawl khamnak ca ah mipi nih ral kahcham an sermi a um i, cu ruang ah cun ralkap nih khuachung ah a rak kan luh hnawh i a si lai, tiah khuami nih an chim. Nihin zanlei Tanphu khuachung ralkap an rak luh lio ah minung cheukhat zong an tlaih hna, tiah thil sining a mit in a hmutu Tanphu khuami hna nih The Chin Journal ah an chim.

Chaungkhuah Khua Ralkap le Mipi Kahdohnak ah Pu Ram Hlur a Nunnak a Liam. Nihin ah Gangaw-Kalay lamthluan ah a ummi Laimi tampi khuasaknak Chawngkhuah khuate thlaanmual pawng ah ralkap le mipi an i kap i kum 68 a simi Pu Ram Hlur (Ni Meng pa) a nunnak a liam, tiah a chungkhar sin in thawng kan theih. Chawngkhuah cu Hakhalay khua he aa pehmi a si i, hi khua hnih hi Laimi tam u khua an sak an si.

Nihin kahdohnak ah Pu Ram Hlur le a dang minung pakhat U Aung San Win (kum 45) an unnak a liam. Cun, Chaungkhuah i an i bochan ngaimi Lai mino tlangval pakhat zong ralkap nih an tlaih. Nihin kahdohnak ah ralkap lei in hliam a pumi le a thimi an um nain zeizah dah an thih/hliam an pu timi fiang in theih a si lo. Ralkap pawl cu Chaungkhuah i sianginn ah hmunhma an khuar, tiah minung pakhat nih The Chin Journal ah a chim. The Chin Journal