South Korea President Nih North Korea Cu Ralrin A Pek!

South Korea President Nih North Korea Cu Nuclear Hriamnam Hneksaknak Tuah Ti Lo Dingin Ralrin A Pek!
========
October 1, South Korea Armed Forces Day ah, South Korea president Yoon Suk-yeol nih North Korea cu nuclear hriamnam hneksaknak tuah ti lo dingin ralrin a pek tiah theih a si. North Korea nih a voithumnak nuclear hriamnam hneksaknak a tuah hnuin atu bantukin South Korea nih ralrin a pek hi a si.

Armed Forces Day tuahnak hmun ah cun, South Korea President Joon Suk-yeol le Ministry of Defense Prime Minister hna an i tel i, hriamnam thar an ngeihmi pawl zong hmuhsak le theihternak an tuah chih tiah theih a si.

Chin Ramkulh Chungah Motor Khaltu Le Pension La Cangmi Hna Cu, SAC Thawng Pe/latu Ah An Hman Hna! Prime minister minthutnak he Nayphidaw ah an kuatmi report peknak ca chung ah Chin ramkulh chungah motor khaltu hna le cozah rian in pension a la cangmi hna cu, SAC nih thawng pe/latu ah a hman hna tiah aa tial tiah theih a si.

Cu report peknak ca i, cahmai 65 nak ah pengkomh tualchung mipi hna chungin pension a la cangmi le motor khaltu hna cu, thawng petu ah a hman hna i, motor khaltu hna nih, lam um tu ning, lam ai pehtonh ning an chim mi kong ai tel tiah theih a si.

Cun khoi ka dah CDF nih sakhaan an chiah? CDF minung pa zeizat dah an si? CDF hi zeitindah an cawlcangh? timi le SAC nih security an lak ning vialte zong cu report peknak ca chung ah cun ai tial tiah theih a si.

Thih Hlan Lo Thongtla Ding A Si Ko Nain Thonginn In A Chuakmi Misual Pa Myat Htun Meithal Kah A Tong! Mandalay ramṭhen, Kyaukse(ကျောက်ဆည်) peng Than Chet Kone(သံချပ်ကုန်း) khua ah mi thahnak case 2 in thih hlan lo thongthlak dingah biaceih zung nih bia an khiahpiakmi misual pa Myat Htun cu, thonginn in a chuah hnu SAC kuttang pyusawhti phu i rian a ṭuan lioah meithal in kah a tong, tiah tualchung mi hna nih a chim.

Nizaan October 2 zing sml 11:00 ah misual pa Myat Htun cu min hngalh lomi hriamtlai phu nih meithal zun 6 in an kah caah Mandalay sii-inn ah an tlikpi, tiah theih a si. “Anih hi thih hlan lo thong tla ding a si ko nain SAC nih thonginn in a chuah ṭhan.

Ralkap he i bawm in khuami hna cu an hrem hna. Tangka in lente i celhnak(Gambling) le zu dinnak hmun ah ralkap he i bawm in ngunkhuai khawltu a si,” tiah tualchung mi nih a chim. Misual pa Myat Htun cu Meithal zun 6 in kah a ton caah Mandalay sii-inn ah an kalpi i a thih le thih lo theihfian a si rih lo.

September Thla Chung Karenni Ramkulh Kahdohnak Ah SAC Ralkap 104 An Thi, 60 Leng Hliamhma An Pu, SAC Ralkap Nih Tualchung Mi 11 An Thah Hna. September thla chung Karenni ramkulh chung kahdohnak ah KNDF le ṭangṭi phu hna nih SAC ralkap 104 kan thah hna, 60 leng hliamhma an pu, tiah KNDF nih cathanh an chuah.

September thla chung kahdohnak ah SAC ralkap 104 an thi i 60 leng hliamhma an pu. SAC ralkap meithal MA-1 zun 3, MA-2 zun 3, MA-3 zun 8, MA seh meithal zun 1, 60mm bomb, RPG bomb, Case bomb le zen-kuan, ralkap thilri zeimawzat kan chuh hna pinah motor 1 kan hrawh. KNDF ralkap 5 an thi, tiah an langhter.

KNDF, KA le ṭangṭi phu hna nih September thla chung ah SAC ralkap he voi 57 nak tlawm lo kahdohnak a chuak. September thla thok in SAC ralkap nih Loikaw, Demoso, Hproso lampi ah rallam an sial i, Demoso, Nanmay Hkung(နန်းမယ်ခုံ) Mobae lampi hna cu lak an i timh caah cuka hmun cun umhmun an khuar, tiah KNDF nih cathanh an chuah.

SAC ralkap nih hriamngan an kah caah tualchung mi inn 100 leng le biakinn 2 an rawk i kahdohnak zeihmanh um loin SAC ralkap nih hriamngan an kah caah tualchung mi inn 7 leng a rawk. Vanlawng in voi 16 bomb an thlak, tiah KNDF nih cun an langhter.

SAC ralkap nih tualchung mi 10 an thah hna i 19 hliamhma an pu. Bomb an hmanhmi lamhsualnak in tualchung mi 1 a thi i 4 hliamhma an pu. Cu pinah SAC ralkap nih tualchung mi 2 cu an tlaih hna i an thah hna, tiah KNDF nih cathanh an chuah.

Taungthar Khua Luhnak Check Gate Cu PDF Nih An Kah Caah SAC Ralkap 6 An Thi. Mandalay ramṭhen, Taungthar(တောင်သာ) khua luhnak chcek gate kan kah caah SAC ralkap 6 an thi, tiah Scorpions People Defence Force in ṭuanvo ngeitu nih a chim.

October 1 zaan sml 7:00 hrawng ah Taungthar khua hnulei ah a ummi check gate cu, Taungthar hram bunh Myinchan pengkomh Battalion 3 nih tlanglawng lam in hriamngan le hriamhme he mins 10 chung kan kah, tiah Scorpions People Defence Force nih an langhter.

“Cu kahdohnak ah a thimi SAC ralkap ruak 4 cu an khangh hna i, ruak 2 cu motor in an phorh hna. Kanmah lei in a thimi le aa hliammi kan um lo. Cu kahdohnak ah Myinchan pengkomh Battalion 3, Companny(1) Myalatt PDF, Companny(3) Scorpions PDF၊ Seven PDF hna i bawm in kan kah hna,” tiah Scorpions People Defence Force in ṭuanvo ngeitu nih cun a chim.

“Check gate ah a ummi ralkap cu pyusawhti he i bawm in khualtlawng mi le mi chawkvai cu tangka an hal hna. Cycle luchin aa chinh lomi cu kyats 20,000-30,000 an hal hna caah kan kah hna,” tiah Myinchan pengkomh Battalion 3, Companny(2) in ralkap pakhat nih a chim. Credit: The Chin Post