South Korea le American nih North Korea lehrulhnak an tuah!!

N’Korea Lehrulhnak Caah Tiin S.Korea Le American Nih Dungci Thlahnak An Tuah!!
==============================
Japan ram lawnh in North Korea nih Long-range ballistic missile hneksaknak a tuah ruangah UN nih Emergency meeting pakhat tuah dingin timhlamhnak a ngeih lio ah South Korea le American nih Missile kah thlahnak an tuah tiah kan theih.

Nuclaer hriamnam a ngei mi N.Korea nih October ni 4 ah Japan ram lawnh in Long-range ballistic missile hneksaknak a tuah ruangah Japan mipi pawl cu himnak ah um cio dingin nawl ngeitu phu nih theihternak an tuah hna. S.Korea le American ralkap phu hna nih rilli cungah bomb thlah kahnak training hna an tuah pinah N.Korea lehrulhnak caah tiin rilli chungah Missile (dungci) kahnak zong an tuah.

S.Korea i Hyunmoo-2 dungci pakhat cu an kah hnu ah hlawhtlinnak hmuh loin lamtantim ah a tla nain zeihmanh thilcang mi hlimtuar le thimi an um lo tiah ralkap phu hna nih an chim. Dungci i Propulsion system mei kaang ruangah dungci cu a kang ko nain Bullet warhead cu puahkehnak a um hraw lo tiah, S.Korea ralkap nih an chim.

Cu thil a caan ruangah tual chung mi pawl thinphang in an um caah S.Korea ralkap lei nih tuanchung mi pawl cu ngaihthiam zong an hal hna tiah theih a si.

Relchap, Myawaddy-Kawkareik Lampi Ah Motor Pakhat Ai Leh Caah Minung 5 An Nunnak A Liam, Hliamtuar An Tam
Myawaddy-Kawkareik lampi ah “Pwint Nay Chi”(ပွင့်နေခြည်) laam phu nih zulhmi motor cu aa leh caah minung 5 an nunnak a liam i minung 15 leng hliam an tuar tiah theih a si.

Nihin October 5, zaanlei suimilam 4:00 hrawng ah a laam mi phu hna nih an i citmi motor cu break a ṭhatlo caah aa lat tiah theih a si. “Atu tiang ah nunnak liammi hi minung 5 an si, emergency in zohkhenh mi hi 15 hrawng an si, cu ai hliam mi hna cu sizung ah kalpi an si” tiah mi bawmchanhnak a tuahtu phu chungtel pakhat nih a chim.
Cu motor chung ah cun pa 21 le nu 7 an i tel i, cu chung ah pa 15, nu 5 le ngakchia kum 2 tluk nih hliamhma an tuar i, minung 5 an nunnak a liam tiah theih a si.

Kani Peng Ah SAC Tinbaw Nihnih Chung Kah An Tong, Minung 15 Hrawng An Thi, Sagaing ramṭhen Kani peng ah Chindwin tiva in a rak kaimi SAC ralkap le Daung Luth Linn -LPDF phufonh kar kahdohnak nihnih chung a chuak tiah theih a si.

SAC ralkap tinbaw 13 cu October ni 4 zaanlei suimilam 3 hrawng ah Pansan (ပန်းဆိုင်း) khua pawngah Daung Luth Linn PDF le tualchung hriamtlaiphu hna nih an kahdoh hna i SAC tinbaw cu an rawk i minung 15 leng an thi tiah LPDF hna sin in theih a si.

October ni 4, Pansan khua ah SAC tinbaw cu tualchung hriamtlaiphu he fonh in kan kah hna, an mah lei zong nih hriamngan in a kan kah ve i kaphnih kar kahnak a chuak, SAC lei zeizat an thih cu fiangin theih a si lo. October ni 3 kahdohnak ah cun SAC lei thawng an i thanhnak radio line kan tlaih i 15 hrawng cu an thi tiah kan theih tiin Daung Luth Linn LPDF in ṭuanvo ngeitu pakhat nih a chim.

Myawaddy-Wawlay Lam Cung Ah SAC Ralkap Cu Drone In Bomb Thlakhnawh An Ton Caah Ralkap 2 An Thi, 8 Hliamhma An Pu, Karen ramkulh, KNU Brigade 4 hmunram Myawaddy-Wawlay lam ah umhmun a khuarmi SAC ralkap pawl cu, drone in bomb kan thlakhnawh hna caah SAC ralkap 2 an thi, Officer 1 telh in ralkap 8 hliamhma an pu, tiah Cobra Column nih cathanh an chuah.

Nizaan October 4 chun sml 12:30 ah SAC ralkap cu KNLA, PDF ṭangṭi phu Cobra, Brigade Companny 2 hna i bawm in an kah hna caah kaphnih kar kahdohnak a chuak. Federal Wings drone phu, Yawngni Companny drone phu hna nih bomb an thlak hnawh caah Kha Mah Yah 102 in ralkap 2 an thi, 8 hliamhma an pu, tiah theih a si.

October 4 chun ah Tatma 44 Beoha(ဗျူဟာ) 441 an umnak pura ah Federal Wings Drone phu nih bomb an thlak, asinain a thimi zat fiang in theih a si rih lo. PDF ṭangṭi lei in a thimi le aa hliammi an um lo, tiah theih a si.

Khuapau Dohthlennak Ah Ai Telmi Sianginn Cachimtu Saya/mah Vialte Cu Mi Ralṭha An Si Tiin NUG Nih Upatnak A Pek Hna Khuapau dohthlennak ah aa tel i hranhram uknak dohnak ah ai telmi sianginn cachimtu saya/mah vialte cu zalonnak hmuhnak dingah a cawlcangmi mi ralṭha an si, tiin NUG fimcawnnak zung nih upat peknak cathanh an chuah.

Vawleicung Saya/mah Ni ah khuapau dohthlennak ah nunnak a pe mi, zohchia tuk in thah a tongmi siangngakchia hna zong zalonnak hmuh nakding caah a cawlcangmi mi ralṭha an si, tiin NUG fimcawnnak zung nih an langhter.
SAC nih sianginn cachimtu saya/mah le siangngakchia an thahmi hna hi 150 tluk an si i, a thong leng an tlaih hna rih hna, tiah NUG fimcawnnak zung nih an langhter.

Sagaing ramthen, Watlat peng ah PDF nih SAC ralkap 6 an thah hna, Sagaing ramthen, Watlat peng Sannaingkuai(စိုင်နိုင်ကွေ့) pawngah PDF nih SAC ralkap cu lamhruang in kan bawh hna i kan kahdoh hna caah SAC ralkap 6 an thi tiah nizaan October 4 ah Chidwin Attack Force nih an thanh.

October 3 zaanlei sml 3 hrawngah Watlet peng in Hlataw khua leiah rallam a sialmi SAC ralkap 80 hrawng cu, hriamngan le hriamhme in kan kahdoh hna i kaphnih kar kahdohnak sml 1:30 chung hrawng a chuak.

Cu kahdohnak ah cun SAC ralkap 6 an thih caah Yuatharkyi khua in SAC ralkap dang nih an rak bomh hna nain kanmah tualchung hriamtlaiphu lei cu hliamtuar um loin hnu kan tolh than tiah Chindwin Attack Force in tuanvo ngeitu pakhat nih a chim.

Myanmar Rammi Minung 4 Ah 1 Nih Eidin Kongah Har An Tong, Myanmar rammi minung pali ah minung pakhat nih zatuak 20% in eidin kongah har an tong tiah World Food Programme(WFP) le (FAO) nih an thanh. Eidin kongah har a tongmi hna ramkulh le ramthen hna cu, Chin, Kachin,

Rakhine, Shan, Sagaing, Magwe le Kaya hna ah an si i, Yangon le Mandalay zong ah, rian a ngei lomi hna nih cun eidin kongah har an tong ve tiah theih a si. SAC nih hramhram uknak an lak hnuin Myanmar mipi hna nih eidin leiin siseh thil dangdang ah siseh harnak an tong i zatuak in 40% nih eidin kong ah harnak an tong tiah theih a si.

Pyu Khua Hlun Taye Khit Tayar(သရေခေတ္တရာ) Ah Electric Tlanglawng Ser Ding In Kan I Zuam Cuahmah – Min Aung Hlaing, Hlanlio Pyu(ပျူ) khua hlun Taye Khit Tayar(သရေခေတ္တရာ) ah khualtlawng mi hna, fawi zaang deuh in an um kal khawh nakding ah electric tlanglawng serding kan tawlrel cuahmah. Cun Russia rammi an rak tlawn khawh nakding ah Myanmar-Russia hawikomhnak phu kan ser lai, tiah Min Aung Hlaing nih a chim.

Min Aung Hlaing cu nizaan October 4 ah Pago ramṭhen, Pyi pengkomh ummi chawleh chawhrawlnak tuahtu(MSME) hna he tonpumhnak an ngeihnak hmun ah atu bantukin a chim hi a si. “Keimah pumpak zong hin khualtlawn hi tha ka pek mi a si. Pyi pengkomh cu hlanlio kawl miphun nunphung aa semnak hmunhma pakhat zong a si. Minthang pura zong tampi a umnak hmun a si caah tlanglawng lam hi biapi in kan ser chuah a hau. Hmailei ah electric tlanglawng kal kho ding in kan i zuam cuahmah” tiah Min Aung Hlaing nih cun a chim.

Ram chung, ramleng khualtlawng mi lemsawi khawh nakding ah Pyi pengkomh mizapi nih nan i zuam awk a si. Russia rammi hna zong Myanmar ram an rak tlawn khawhnak ding ah khua kip hmunkip in i hawikomhnak phu kan ser lai, tiah a chim chap.

Tannitharyi Ramṭhen Nyaungpinkwin(ညောင်ပင်ကွင်း) Khua Ah Pyusawhti Pakhat Cu A Meithal He Tlaih A Tong, Tannitharyi ramṭhen, Tanintharyi peng Nyaungpinkwin(ညောင်ပင်ကွင်း) khua ah pyusawhti Ko Naing cu M-16 meithal he tlaih a tong, tiah theih a si.

Pyusawhti Ko Naing cu nizaan October 4 zanlei sml 3:30 hrawngah ti kholh dingin a kal lioah Naga PDF nih an tlaih, tiah theih a si. Ko Naing cu M-16 meithal zun 1, kutcheh bomb lung 1, meithal kuan 157, kuan bawm 5 le meithal kuan kham angki 1 he kan tlaih i, cunglei nawlngeitu hna sinah kan ap, tiah Naga PDF an langhter.

SAC Nih Mingalardone Dawr Khan Zaakhat Leng Cu Ni 15 Chungah An Hrawh Ter Hna, SAC nih Yangon Mingalardone(မင်္ဂလာဒုံ) dawr khan a zaa leng cu, ni 15 chungah hrawh dih ding in nawl an kan pek, tiah dawr khan ngeitu hna nih an chim.

A hlan tein dawr khan cu mi nih an i hlan pengmi a si ko buah a ruang um loin ni 15 chungah dawr khan vialte nan hrawh dih hna lai, tiah SAC nih dawr khan ngeitu hna cu an chimh hna. Nan hrawh lo ahcun upadi ning in kan in hrawhpiak dih hna lai tiah an tlerhkhawnh hna, tiah theih a si.

“Mingalardone chaklei, a hlan lio motor dinhnak hmun pawng dawr khan, Cinema pawng hrawng dawr khan, a dihlak ah 100 leng cu an kan hrawhter dih,” tiah dawr khan ngeitu hna nih cun aa chim. Mingalardone dawr khan cu Than Shwe chan lioah ralkap fund caah le USDP party fund ca ah an rak sakmi a si. Kum fate dawr khan hlan man pek peng a si. Cu dawr hna cu sipin area hmun a si caah SAC nih hrawh ding in nawl an kan pek hi a si, tiah dawr ngeitu hna nih cun an chim.

Myawaddy-Wawlay Lam Cung Ah SAC Ralkap Cu Drone In Bomb Thlakhnawh An Ton Caah Ralkap 2 An Thi, 8 Hliamhma An Pu, Karen ramkulh, KNU Brigade 4 hmunram Myawaddy-Wawlay lam ah umhmun a khuarmi SAC ralkap pawl cu, drone in bomb kan thlakhnawh hna caah SAC ralkap 2 an thi, Officer 1 telh in ralkap 8 hliamhma an pu, tiah Cobra Column nih cathanh an chuah.

Nizaan October 4 chun sml 12:30 ah SAC ralkap cu KNLA, PDF ṭangṭi phu Cobra, Brigade Companny 2 hna i bawm in an kah hna caah kaphnih kar kahdohnak a chuak. Federal Wings drone phu, Yawngni Companny drone phu hna nih bomb an thlak hnawh caah Kha Mah Yah 102 in ralkap 2 an thi, 8 hliamhma an pu, tiah theih a si.

October 4 chun ah Tatma 44 Beoha(ဗျူဟာ) 441 an umnak pura ah Federal Wings Drone phu nih bomb an thlak, asinain a thimi zat fiang in theih a si rih lo. PDF ṭangṭi lei in a thimi le aa hliammi an um lo, tiah theih a si.

Launglone, Pakokku Le Ye Ah Pyusawhti Le Khuabawi 6 Kahthah An Tong, Launglone Le Palaw Ah Pyusawhti 3 Kahthah An Tong, Tanintharyi ramṭhen, Launglone peng Panalay(ပန္ဒလဲ) khua pawng ah pyusawhti 3 cu, nizaan October 4 ah Launglone peng PDF nih an kah thah hna, tiah Dawei Information Center sinin theih a si.

Nizaan zanlei sml 1:30 hrawng ah LLPDF le DDT Companny 3 nih pyusawhti Thaung Nang, Min Naing le Tin Shing cu an kah thah hna. Kutser meithal zun 1, kuan 3, phone 2, cycle 1, pyusawhti min cazin, liecence, tangka kyats 63,800 le thilri cheukhat hna zong PDF ṭangṭi phu nih an lak dih, tiah theih a si. Pyusawhti Nga Zaw a kuttang minung an si i, khuami harnak an pek hna caah kan kah thah hna, tiah LLPDF ralkap pakhat nih a chim.

Ngaanzun Ah SAC Ralkap Kuttang Rianṭuantu Khuabawi Hla Myint Kahthah A Tong, October 2 zinglei sml 10:10 ah Mandalay ramṭhen, ngaanzun peng Nyaungpin Yu(ညောင်ပင်ရိုး ) khuami SAC ralkap kuttang rianṭuantu, USDP party chairman hlun, Hla Myint cu NYSGF, Man Shwe Gyia PDF, NZN Revolution Force le One Giluerrilla phu hna i bawm in an kah thah, tiah theih a si.

Ye Peng Ah SAC Ralkap Thawng Petu Aung Myint Kahthah A Tong, Mon ramkulh, Ye peng Kyunglaung(ကျူံလောင်း) khua hlun ummi SAC ralkap thawng petu Aung Myint cu, nizaan October 4 zinglei sml 9:00 ah a inn chungah meithal zun 15 in kan kahthah, tiah Mon State Revolutionary Organization (MSRO) nih cathanh an chuah.

Aung Myint nih a luancia March thla 18, MSRO phu nih motor an remh lioah SAC ralkap a chimh hna i, an kah hna caah ralkap Kyaw Zin Htet le kum 14 ngakchia pakhat an nunnak a rak liam. Pakokku Ah Inn Zaa-uktu SAC Ralkap Kuttang Rianṭuan Kyaw Sein Htun Kahthah A Tong, Magway ramṭhen, Pakokku peng No.15 sang ummi inn zaa-uktu Kyaw Sein Htun cu min hngalh lomi hriamtlai phu khat nih October 2 zaanlei ah meithal in an kahthah. Kyaw Sein Htun cu thil a zuar pah in SAC ralkap thawng petu a si, tiah theih a si.

Chin ramkulh Kanpetlet Pengah, Ralzaam Pakhat Ti Ah A Paam!! Chin ramkulh, Kanpetlet peng, Yeelaungpan khua, Angia-Kathin(အညာကတင်း) ralzaam camp in ralzaam pakhat Kyaw Than@ U Ha paing 45 cu, nizaan October 4 zaanlei sml 4 hrawngah, Kathin (ကတင်း)tiva ah ti ah a paam tiah theih a si.

Kanpetlet Angia-Kathin khua in ralzaam camp a kir lei ah Kathin tiva nih a fenh. Khuami hna nih kan kawl i ralzaam camp kan phak pi ah cun a nunnak a liam cang tiah khuami hna sinin theih a si. Ti ah a paammi Kyaw Than @ U Ha Paing ruak cu, Angia-Kathin ralzaam camp in, Yeelaungpaing khua ah an tlunpi hnu ah a ruak cu an vui te lai tiah theih a si. Crd-The Chin Post