Senator Dean Smith hi Chin Miphun le Kawlram kong a ruat taktakmi asi

Senator Dean Smith hi Chin Miphun le Kawlram kong a ruat taktakmi asi. Tuni a zung ah a ka sawm i; Australia Cozah sinah zei pawl dah ka chim lai? timi pawl kong ka sin in hngalh a duhmi tete kan iruah. Direct in Foreign Minister le Prime Minister sinah a phak ter khawh caah a biapi ngaingai. Tulio ramkhel sining le mipi nih an duhmi pawl, tam ngai ka chimh ve. Tampi kan iruahmi lak ah ka lung a ka suk ngaimi;

Tuluk le Russie an dirhmun hi kan huat ning aa khat taktak. India nih Tlangcungmi cungah a hmuh ning le Kawl Ralkap Cozah he an ikhahnak zong; kan ruahnak aa khat ngaingai.

Sipuazi (economic sanctions) phihkenhnak hi; “ralbawi pawl an zei a poilo zia le mipi misifak kan harning ah” kan hmuh ning kan ikhat ngaingai fawn.

Australia i Kawlram in sianginn a rak kaimi le, hi doh-aunak a dih hnu ah ramchungmi hna lak ah ralzam (Asylum seekers and political refugees) pawl an karh te kho, cucu ruahcia ngai a hau kan ti.

Atu lam cungah a aumi hna hi, an duhmi an hmuhlo sual ahcun; an ithim dingmi cu hriamtlaih in doh hi asi te lai. Cu caah ramchung ral (Civil War) fakpi in a tho te kho’ tiin ka ruahnak le ka hmuhning ka chim.

2020 thimnak in thimmi palai pawl nih an dirhmi CRPH hi Australia Cozah nih nan cohlan ahcun a thatuk lai tiin ka chimh. NLD leiin bia an ka ronhmi asi caah ka chim piak ve hna.

Ramkhel riantuan pawl nihhin Rohingya kong lawng hi an hngalh. Cu caah Tlangcung miphun hna nih nan aw nan thanter chinchin a hau tiin ruahnak a ka pek.

Hi kongah hin Kawlrammi pawl lungrualte in rian tuanti a herhning le atu lio kan cawlcangh ning ka chimh. Western Australia Myanmar Democratic Network (WAMDN) kan dirhnak le Perth ah kan timhtuahmi pawl zong kan iruah.
Tuzan zong Kawlrammi hruaitu pawl sawm in biaruahnak ngeih dingin timhtuahnak a ngei than. Ramchung lei an aunak lawng cuanh sawh loin; kan umnak ram cio ah kan si khawh tawk in kan chimrel cio a hau! Credit: Ram Tinthei