Sehtan Nih Bible Zeitindah A Hman?

Satan nih Bible zeitindah ahman?

Satan hi muichia, ṭihnung le fihnung bantukin siloin dawhngaiin, nemngaiin, panhngaiin, feltein, ṭhatein le lungsautein rianṭuanmi mifel asi. Satan nih Bible hi kan hman bantuktein ahman ve ko. Kan rel bantukin le kan hngalh zat hi ahngalh dih ve. Asinain aa tinhmi cu “Biatak le Dinnak” lam in pialter i ṭhatnak lam ah zulhter i Khrih nganh asi. Cun thilṭha le nunzia dawh an cawnpiak lai, na sualnak an thuhpiak lai i Jesuh Khrih he naa ton khawhlo dinghi a mission cu asi.

Bible a rel huahalomi le Thiang Thlarau bawmhnak a colomi cu Satan nih fawitein hlen khawh asi. Zeitcatiah Satan nih Bible a thiam tuk!

Satan nih, Dawtnak kong an cawnpiak khawh lai. Zaangfahnak le zawnruahnak an cawnpiak lai. Midang bawmhnak le peknak an cawnpiak lai. Thilṭha tuahnak le ṭhatnak an cawnpiak lai. Umtu ziazaṭhat le hmaipanh an cawnpiak lai. Midang he rualremtein umṭi/kalṭi an cawnpiak lai. Rumnak le fimnak hmuhnak lam an cawnpiak lai. Taksa duhnak le inuamhnak an cawnpiak lai. Nangmah na ṭhawnnak le na biapitnak an cawnpiak lai. Iseihchiahnak le izumhnak an cawnpiak lai. Vawlei kalning le chantiluan an cawnpiak lai. Vawlei ah hnangamnak an cawnpiak lai. Miphun paohpoah kan ikhat dih ti an cawnpiak lai. Vawlei ah thilṭha na tuah hi na covo asi ti an cawnpiak lai. Biaknak tampi aṭhatnak le an ikhahnak an cawnpiak lai.

Asinain, Zungzal nunnak kong an cawnpiak lai lo. Zungzal thihnak kong an cawnpiak lai lo. Hell ram kong an chim ngam lai lo. Vanram kong an cawnpiak duh lai lo. Jesuh Khrih chuahnak kong an chim lai lo. Jesuh Khrih thihnak kong an cawnpiak lai lo. Jesuh Khrih thawnhṭhannak an cawnpiak lai lo.

Khrih lawnghi zungzal nunnak lam asi ti an cawnpiak lai lo. Khrih hi Lam, Biatak le Nunnak asi ti an cawnpiak lai lo.
Misual na si, ingaihchih ti an cawnpiak lai lo. Thihhnu Thlarau kong an cawnpiak lai lo. Satan sining, characters an cawnpiak lai lo. Khrih sining, characters an cawnpiak lai lo. Van le vawlei sernak kong an cawnpiak lai lo. Biatak le dinnak kong an cawnpiak lai lo.

Satan nih na ruahnak an tlaih khawh i duhsahtein an lem i na thinlung a lak khawh hnucun na thisa chungah a cawnpiaknak hram a sih lai. Cutikah an bochan lai i, an seihchiah i, a ralkap ṭhabik ah an hman lai.

Cutikah Jesuh Khrih thawngṭhachim tu heh tiah na soisel cang hna lai i, na doh cang lai. Evangelists pawl an sualnak le an palhnak na kawl lai i, an thang na chiat cang hna lai. Pastors thangchiat loin na mitkuh thaw ti lai lo. Mikong ceih le mithangchiat in na nunnak na hmang cang lai. Bible le na kut an ihlaat thluahmah lai. Thlacam le na aw an ihlaat thluahmah lai. Biakinn le na pum an iṭhen thluahmah lai. Thangṭhatnak hla le na guitar an iṭhen thluahmah lai. Biatak le dinnak he nan iral thluahmah lai. Khrih nawlbia nakin human right sang deuh le a ṭha deuh ah na pom cang lai.

Minung lawngte na zoh lai i, minung duhnak in bia na chim cang lai, khua na ruah lai, khua na khaan lai i, rianṭuan naa thok cang lai. Chawva lawngte na kawl lai i, zeithilpaoh chawva hmuhnak ahcun lih zong na chim ngam cang lai, hlen zong na ngamh cang lai, hrawkhrawl zong na thiam cang lai, mithanh zong na ngamh cang lai. Cun na nun aa nuamh ko ahcun Bawipa nawlbia zong zeiah na rel ti lai lo.

Satan nih na thluak le na ruahnak an ṭhawl mi hi sualnak le ṭhahlonak in an cawnpiakmi siloin Bible bia tein an cawnpiak i, sualnak, ṭhatlonak le thihnak lei ah an hruai i, Khrih nawlbia chungin an pialpimi tu asi. Satan nihcun a hram leiin siloin apar/atheipar leiin an cawnpiak lai. Hram ngeilo athi dingmi asi. Jesuh Khrih nihcun hramthukpi an thlak piak hnu ah atheipar an par ter lai. Na nunnak le na nunhlun le atu na dirhmun kha izohhmanh fiangtein na hmuh lai.

Hi questions pawl hi ihal law, Satan cawnpiaknak ah maw na um Khrih chungah dah na um naa fiang ngai lai. 1. Jesuh Khrih hi ka herh taktak maw? Ka herh ka ti ahcun zeitindah nifatin ka hman? 2. Jesuh Khrih nawlbia hi biapi ah ka chia maw? Zeitindah biapi ahcun ka chiah? 3. Jesuh Khrih hi pakhatnak ka chia maw? Zeitindah ka chiah ka ti khawh? 4. Biatak hi zeidah asi? Dinnak hi zeidah asi? Zeitindah cu hna cu ka hman hna? 5. Atu bakin thining law Vancung ah ka kai bak lai tiah na chim kho maw? Zeitindah na chim khawhnak cu asi? 6. Thiang Thlarau in hrinṭhan ka si tiah na chim kho maw? Zeitindah Thiang Thlarau na ngeih cu na theih?

7. Misual ka si i, sualnak ingaihchih aherh tiah zei sualnak khidah naa ngaihchih lai? Zeitindah ngaihchih cu asi? 8. Miṭha naa ti khawhnak zeitindah naa tahning asi? Miṭha na sinak cu khoikaa dah na hmuh? 9. Atu na ngeihmi inn, chawva, motor le rian sungdih law na thinlung put zeitindah a um hnga? Atu na thinlung put hi teh zeitindah an ngeih ter? 10. Thlacam le Bible rel nih thazaang ṭhawnnak an pe maw? An pek ahcun ziah nifatin na tuah khawh hnga lo? Jesuh Khrih nih ka thinlung a ka uk taktak maw tihi ruahlo awk aṭhalomi abiapitukmi asi. Credit: James Vanneilian

Leave a Reply

Your email address will not be published. Required fields are marked *