Secretary Antony Blinken le Secretary of Defense Lloyd Austin Cu Japan Ram Tokyo Khualipi An Phan

Kawlram pumpi ralhrang phu nih uknak ruruhranghrang in an laakmi kongah Japan cozah he tonbiaruahnak ngeih dingin American State Secretary Antony Blinken le Humhimnak lei vuanci Lloyd Austin (United States Department of Defense
Office of the Secretary of Defense) hna cu March 15, 2021 ni ah Japan ram khualipi Tokyo tluang tein an phan cang tiah thawng theih a si. Hi khualtlawn nak kong he pehtlai in President Joe Biden nih Hruaitu dirhmun a vun tlaih hnu ah avoi khatnak ramleng khualtlawnnak a si tiah theih a si.

March 15-18, 2021 tiang an rau lai tiah thawng theih a si. A liam cia zarh chungah American, Japan, Australia le India hna cu hawikom ton biaruahnak an rak ngeih cang hnu ah tu bantuk khualtlawn nak lam hi an pehzulhmi a si tiah theih a si. Secretary Antony Blinken le Secretary of Defense Lloyd Austin khualtlawn nak ah an i ceih bik dingmi cu China Sea chungah zalong deuh in tlunkal khawhnak le North Korea kong, Myanmar ram ralkap nih uknak an laknak kong an i ruah lai tiah theih a si.

Relchap, 2021 Myanmar Revolution. Covid-19 le Kawlram nih vawlei le tulio news cu a khar ngaingai. Thinphang, laklawh, bizi, stress le vansang in kan um lulh cio. Lamzawh, CDM le CRPH in Kawl ralkap uknak le 2008 phunghram cu “hrawh le thlen” kan timh liomi si. Nikhat hnu nikhat an thi thluamah. Tlaih i, hremmi le thongthlakmi an tam. Kawl Ralkap (KR) nih a thiamnak, tthawn, hriamnam le nawlngeihnak vialte hmang in “lamzawhnak, CDM le CRPH” hi dihdonghter le block dih ai zuam cuahmah lio si. Nunnak tampi liam cang. Thisen tampi chuak cang. Tlaihmi le hremmi an tampi cang.

Tuhi ttihnak he hngahmi pahnih kan ngei. Pakhatnak cu CRPH cawlcanghnak in “international organizations” silole “hriamnam tthawng ram” nih KR hi van zuamhnawh in tthio dih sehlaw tihi si. CRPH rianttuannak ah Dr. SaSa cu hmaisuang in a um. CRPH hruainak in “federal democracy, ralkap, palik, cozah tbk” umter hi ruahmi zong si. Aung San Suu Kyi (ASSK) le NLD ramchung an cawlcangh khawh ti lo caah, CRPH le Dr. SaSa hi ramleng ah an van biapi ve. Cucaah, a biapi takmi cu Dr. SaSa himnak hi si. Fx a nupi le fale hna KR nih an tlaih sual hna cun, balo si kho. Cun, amah lila hi KR nih an tlaih silole KR nih a lam kip hmang in an suam khawh sual cun, balo si kho. Ralrin le fimkhur taktak hau tulio cu.

Kan hngahmi pahnihnak cu “ramchung raltuknak (RR) – civil war” hi si. Lamzawh le CDM lawng a za ti lo. KR nih nawlngeihnak zapi sin ap le pek hrimhrim ai tim lo. Meithal, hremnak le hriamnam in zapi cu a phomh cang hna. Zapi nih meithal silole hriamnam in “mah nunnak” ai runven hau cang. Pumpak runvennak ah hriamnam lak le tlaih hau cang. Cun, Tlangcung Ralkap (TR) nih zapi le ram caah, KR kah lawlaw ding timhtuah si cang (ai kaap pah cangmi zong an um). Ramchung Raltuknak (RR) a van tlun taktak cun, tulio lamzawh le CDM chung tonmi, tuarmi, harnak le thihnak let tampi zapi nih intuar si lai.

Lamzawh, CDM, CRPH le RR in KR uknak, nawlngeihnak le 2008 phunghram hi kan hrawk in thleng kho taktak hnga maw? Zeidah kan rian le tuahvo cio si? 2021 Revolution hi ai thawknak lawng si rih (Feb. 6, 2021). A thla le kum in a kal khomi si. Cucaah, lungsau, teirial, lungrual, ralrin le fimkhur taktak hau. Ramkhel tactics ah palhnak le thlahphoihnak kan tuah sual cun, kan balo kho (SM chan si le, thlahphoih sual fawite). Cun, dirkamhnak thilri ah felfai le dinfel taktak hau. Dirkamhnak organization hna dirh hau lai – register, document le cazin tbk tuahnak ah. Hi pinah, tulio hi “fake news” hrial khawh bak an hau (kehkuainak um lonak caah).

Mah vial kha “kherhhlainak – analysis” ka van tuah khawhmi siseh. Video le hmanthlak ttihnung cu ka zoh ngam lo – rak ka tagged in hrawmh hlah uh. Note: Denmark ummi zong Feb. 9, 2021 (milu 300 in 400 kar), March 13, 2021 (milu 400 in 500 kar) tiah lamzawhnak kan ngei cang. March 28, 2021 ah anmah Denmark tawlrelnak in lamzawh um tthan lai. 2021 Myanmar Revolution caah, ralzam dirhmun in kan ti khawh tawk tete kan rak tuahpi ve ko hna. Kan intemtuarpi ve ko hna. Jesuh nih “teinak kan pe hram sehlaw”. Credit: Van Nun Lian