Saya PaHmun Bia Hi Atulio Caan Ah Biatak Tein Kan Ruah Aherh.

Saya PaHmun Bia Hi Atulio Caan Ah Biatak Tein Kan Ruah Aherh.
===========================
Atulio hi tlangcungmi kan caah canttha asi kho. Zeibantuk uknak achuak zongah, ‘Kawlram buainak aum tik paoh ah tlangcungmi kan caah rak kan ruahpiak u kan ti hna tikah atu buainak hi miphun kong asi lo. Tlangcungmi nan covo kong rak chuahpi rih hla u, Democracy kan hmuh tikah nan kong kan ruah than teh lai arak kan ti ton. Cucaah atubantuk caan lio ahhin Tlangcungmi nih zeitindah kan caah aphi atthabik kan hmuh khawh lai ti hi kan ruah aherh. Buainak cu aphunphun aum ko lai. Kan innchungkhar kong kan ruah hmasa aherh. ‘Saya Pahmun’ Acunglei Saya Pahmun achimmi hi atulio can ah biatak tein kan ruah aherh, Ralkap uknak kan thlak i, democracy kan hmuh zongah kan covo akanpek ttung lo ahcun kanmah kel kan si than ko lai.

Cucaah tlangcungmi nih cun atu lio can ahhin Aa,Na Sin kan duh loh, Democracy kan duh ti men lawngin auding kan si loh, Federal le self determination kan duh tiin au chihding kan si. politics kan timi hi abuai lio ah kan covo kong kan lutpi thiam ahcun kan caah Innkaa aa awn khawhmi asi, MNF nih India Cozah arak doh lio ah Chakma pawl nih caanttha ah anrak lak i, Autonomous district council India Cozah sinah anrak hal tikah fawite in arak pek hna, Kha lio ahkhan Chakma nih rak hal loin atu ahhin hal hna sehlaw, ‘zeitikhmanah apek duh ti hna lailoh, Mizo nih an duh nemmam ti la loh. 88 buai lio ahkhan UWSA-Wa pawl nih Bama communits party in anchuak i,atu UWSA hi an dirh, Kawl ralkap he an ibomh i Bama communist party kha an kah hna. Cucaah Khin Ngunt te nih mah tein iuknak nawl an rak pek hna, Atu UWSA nih an ngahmi uknak khi Federal nak hmanhin asang deuhmi asi, Khi bantuk covo anhmuh mi khi,’kha lio ahkhan rak hal loin atu ahhin hal hna sehlaw zeibantuk Cozah hman nih apek hna ka zumh lo. Buainak kha caanttha ah anrak hmanthiam caah atu an covo an hmuhnak khi asi.

Naitan Min Aung Hlaing biachim ngai tikah Kawlram mi Bangladesh ah azam mi hna ka lak hna lai ati, Rohingya pawl kha achim duhmi asi, Rohingya pawl hi lak hna sehlaw, an covo kha apek taktak hna asi ahcun Rohingya cah cun Min Aung Hlaing hi zalawnnak anpa asi hnga i, Rohingya pawl kha kan mawtchiat hna ahcun kanmah palh asi lai.Cucaah politics buainak hi kapkhat lawng in zoh loin chungkhar caah ruah hmasa aherh an titonnak khi asi.

Cucaah atulio buainak ahhin kan miphun Covo hi zeitindah kan luh pi khawh lai? ti hi pakhatnak ah kan chiah aherh, Hmunkip ah aum mi kan miphun nih sandah kan piah tikah Federal kan duh ti hi pakhat nak ah kan aupi hmasa aherh, Atulio Cozah thar an sermi CRPH sin zong ahhin federal kong hi biatak tein kan lutpi chih aherh. Ralkap uknak kan duh lo, Democracy kan duh ti lawngin kan au ahcun Democracy aa naa sin ah kan tla khawh tthan, Cucaah Tlangcungmi kan caah cun Aa Na Sin thlak le democracy hmuh le federal hmuh hi hmunkhat te ah kan kalpi aherh. Van Neih Thang