Sandah Piah Tik Ah Ralrin A Herh Bak Mi Pawl

Sandah Piah Tik Ah:
********************
1. NLD he a pehtlai mi thilri paohpaoh hman lo ah a tha. 2. NLD he a pehtlai mi thilri kan hman tik ah ramdang mi hmuhning ah NLD party lawng nih tuahmi ah rel sual a fawite. 3. Poster kan taar tik ah mirangca tampi in telh chih ding, vawleicung pumpi nih fawi tein hngalh khawh colh a si. 4. Palek le ralkap he nan iton tik ah an thinhun ding in au hnawh lo ding. Bia chiakha hman lo ding.

5. Palek le ralkap pawl kha dinti le pangpar zong pek khawh i zuam ding. Mipi lei ah ttang kho ding tiang in an lunglaak khawh izuam ding. 6. Ralkap le palek cu mipi vengtu nan si, mipi nih lahkhah pekmi nan si caah mipi lei nan ttan ding a si tiah nemte in chimh khawh i zuam le an lungfiannak ding in chimh izuam ding. 7. Cozah thilri siseh, mipi thilri siseh hrawhhral nak tuah hrimhrim lo ding.

Chin Mino Hna Sin Biacah; Chin mino hna ralkap cozah dohnak caan tha nan ngeih hi nan iuar dingah ka ruah. Nan ngeihmi caan tha kha raltha tein hmai nawr khawh i zuam chih uh. Dothlennak nih pasaltha le nusaltha a hrin tawn hna. kan miphun chung in bochan thlak pasaltha le nusaltha nan chuak lai. Kan zoh thla tuk hna. Chin mino hna le sianghleirun siangakchia hna nih mah dothlennak hi hmaisuang in nawl hram uh. A dihdongh tiang ngol loin pehzulh khawh izuam uh, nanmah chan i cozah nan thlen khawh ahcun hmailei fanau hna le techinfapar, (next generation) hna nih a theipar an zuun lai.

Nan ule chan ah kan si khawh tawk kan i zuam, thisen tampi, nunnak tampi, hremnak le temtuarnak phunphun tampi kan tuar nain kan hlawh a tling kho lo, nanmah chan ah kan hlawhtling hram seh. Kanmah chan i kan hlawh tlin lo ruangah nanmah chan ah nan tuar, nanmah chan i nan hlawhtlin lo ahcun nan naule, nan fale chan nih an tuar te lai. Ram ca le miphun caah tuanbia dawh tial khawh izuam hram uh. Kan thinlung dihlak in kan in dirpi hna. Chin mino hna upatnak le bochannak tampi he, Salai Lairamthang 88 Generation